Lukas 5:1-39
5 Jun veltae, kʼalal jaʼo te vaʼal ta xokon nab ta Jenesaret* li Jesuse, laj ta netʼel yuʼun epal krixchanoetik, yuʼun tskʼan chaʼiik li skʼop Diose.
2 Vaʼun te laj yil ti te kotajtik chaʼkot varko* ta tiʼ nabe, pe jaʼo lokʼemik li jtsakchoyetike, yuʼun yakal tsap snutiʼik sventa tsakob choy.
3 Te muy li ta jkot varko taje, jaʼ li svarko Simone, laj yalbe ti akʼo stikʼ ochel jutuk ta yut nabe. Vaʼun te choti li ta varkoe, te lik xchanubtas tal li epal krixchanoetike.
4 Kʼalal laj yoʼontone, xi laj yalbe li Simone: «Tikʼo ochel ta natil nab li avarkoe, vaʼun te xajipik yalel li anutiʼik sventa tsakob choye».
5 Pe xi la stakʼ li Simone: «Jchanubtasvanej, sjunul akʼobal laj kakʼbekutik yipal ta saʼel, pe muʼyuk bu la jtakutik, pe ta skoj ti voʼot chavale ta jip yalel li nutiʼ sventa tsakob choye».
6 Kʼalal la sjipik yalele, batsʼi ep tajek la staik li choye. Jech, solel lik jatuk li snutiʼik sventa tsakob choye.
7 Jaʼ yuʼun, la svelkʼobtaik* sventa xtal koltaatikuk yuʼun li xchiʼiltakik ti te tikʼilik ta yan varkoe, vaʼun talik, la snojesik xchaʼkotal li varkoe, ta xa x-och yalel ta nab.
8 Kʼalal laj yil Simon Pedro taje, la skejan sba ta stojolal li Jesuse xchiʼuk xi laj yale: «Chʼako aba ta jtojolal Kajval, yuʼun jpasmulil vinikun».
9 Ta skoj ti batsʼi ep la stsakik choye chʼayal to kʼot yoʼonton li Pedro xchiʼuk li xchiʼiltake,
10 jaʼ jech laj yaʼi sbaik ek li Santiago xchiʼuk Juane, li xnichʼnab Sebedeoe, ti jaʼ xchiʼiltak li Simone. Pe xi laj yalbe Simon li Jesuse: «Mu xa xaxiʼ. Yuʼun liʼ ta ora xchiʼuk ta jelavele jaʼ xa chasaʼ kuʼun li kuxul krixchanoetik jech kʼuchaʼal chasaʼ choye».
11 Jaʼ yuʼun la slokʼesik ta tiʼ nab li svarkoike, te laj yiktaik skotol, vaʼun la stsʼakliik batel.
12 Ta yan velta kʼalal jaʼo te oy ta jun jteklume, ¡kʼelo avil!, ¡te oy jun vinik ti ip ta kʼaʼemal chamele! Kʼalal la sta ta ilel Jesus li vinike, la spatan sba ta lum xchiʼuk xi la skʼanbe vokole: «Kajval, ti xakʼanuke, xuʼ xapoxtaun».
13 Jech oxal chaʼa, la syeʼ batel skʼob, la spik xchiʼuk xi laj yalbee: «¡Ta jkʼan! Kolan. Ta ora noʼox sakchʼay li skʼaʼemal chamele».
14 Vaʼun laj yalbe mantal ti mu me buchʼu kʼusi xalbee, xchiʼuk xi laj yalbee: «Pe batan, bat akʼo aba ta ilel ta stojolal li palee xchiʼuk akʼo li matanal jech kʼuchaʼal yaloj Moises ta skoj ti lapoxtaje, sventa xakʼik venta li kʼusi kʼot ta pasele».
15 Pe mas to puk batel skʼoplal, jaʼ yuʼun la stsob-o sba tal epal krixchanoetik sventa chaʼiik li kʼusitik chale xchiʼuk sventa xichʼ poxtabel li xchamelike.
16 Akʼo mi jech, te chbatilan ti bu stuktuk chʼikil sventa stuk oye, yuʼun bat spas orasion.
17 Oy jun kʼakʼal kʼalal jaʼo chchanubtasvane, te chotolik li jfariseoetik* xchiʼuk li jchanubtasvanejetik ta Mantal ti likemik tal ta skotol bikʼtal lumetik ta Galilea, ta Judea xchiʼuk ta Jerusalen; te chkoltaat ta sjuʼel Jeova sventa chpoxtavan li Jesuse.
18 ¡Kʼelo avil un!, te kʼot viniketik ti xchechojik tal jun vinik ta svayeb* ti alubem sbekʼtale, lik skʼelik kʼusi xuʼ spasik sventa tstikʼik ochel, yuʼun chbat yakʼik ta stojolal li Jesuse.
19 Jaʼ yuʼun muyik ta jol na ta skoj ti mu x-ochike, yuʼun tsinil tajek li krixchanoetike, jech oxal la stotsbeik li stejail na sventa te xchechik yalel xchiʼuk svayeb li jchamele, yoʼ te xakʼik ta oʼlol tajek ti bu oy li krixchanoetik ta yeloval li Jesuse.
20 Kʼalal ilbat li xchʼunel yoʼontonike, xi laj yale: «Vinik, pasbil xa perton li amultake».
21 Vaʼun xi lik snopik li jchanubtasvanejetik ta Mantal* xchiʼuk li jfariseoetike: «¿Buchʼu xa noʼox leʼe ti chchopol kʼopoj ta stojolal Diose? ¿Mi mu junuk noʼox ti buchʼu xuʼ spas perton li mulile, ti jaʼ li Diose?».
22 Pe li Jesuse laj yakʼ venta li kʼusi yakal tsnopike, jaʼ yuʼun xi laj yale: «¿Kʼu yuʼun ti jech chanop ta avoʼontonike?
23 ¿Kʼusi mas kʼun ta alel, mi jaʼ ti xi chichʼ alele: ‹Pasbil xa perton li amultake›, o mi jaʼ ti xi chichʼ alele: ‹Vaʼlan, xanavan›, xie?
24 Pe sventa xanaʼik ti tsots yabtel yichʼoj ta balumil li Xnichʼon krixchano* sventa tspas perton muliletike... —xi laj yalbe li buchʼu alubem sbekʼtale—: Xi chkalbote: vaʼlan, tamo batel li avayebe, batan ta ana».
25 Vaʼun te skʼelojik vaʼi, la stam li svayebe, vaʼun bat ta sna, lik stoybe skʼoplal li Diose.
26 Vaʼun toj labal sba laj yil skotolik, lik stoybeik skʼoplal Dios xchiʼuk xiʼik ta jyalel, xi laj yalike: «¡Toj labal xa noʼox sba ti kʼusitik laj kiltik avie!».
27 Kʼalal jech kʼot ta pasele, lokʼ batel xchiʼuk te laj yil jun jtsobpatan ti Levi sbie, te chotol ti bu chichʼ tojel patane, xi laj yalbee: «Laʼ tsʼakliun».
28 Jaʼ yuʼun te laj yikta skotol, vaʼi xchiʼuk lik stsʼakli batel.
29 Vaʼun, li Levie laj yakʼ lek veʼel ta sna ta sventa li Jesuse, te chveʼik ep jtsobpatanetik xchiʼuk yan krixchanoetik.
30 Pe lik bikʼtal kʼopojikuk li jfariseoetik xchiʼuk li xchiʼiltakike, li jchanubtasvanejetik ta Mantale, xi laj yalbeik li yajchankʼoptak Jesuse: «¿Kʼu yuʼun jmoj chaveʼik, cha-uchʼbolajik xchiʼuk li jtsobpatanetik xchiʼuk li jpasmuliletike?».
31 Xi takʼbatik yuʼun li Jesuse: «Muʼyuk bu chtun yuʼunik doktor li buchʼutik muʼyuk ipike, jaʼ noʼox chtun yuʼunik li buchʼutik ipike.
32 Li voʼone maʼuk tal jtak ta ikʼel li buchʼutik tukʼike, jaʼ tal jtak ta ikʼel li jpasmuliletik sventa sutes yoʼontonike».
33 Xi laj yalbeike: «Nopajtik noʼox tspasik ayuno* li yajchankʼoptak Juane xchiʼuk tskʼanik vokol, jaʼ jech tspasik li yajchankʼoptak jfariseoetik eke, pe li avajchankʼoptake chveʼik xchiʼuk ch-uchʼbolajik noʼox».
34 Xi albatik yuʼun li Jesuse: «Mu xuʼ spasik ayuno avuʼunik li yamigotak jnupunel kʼalal liʼ to xchiʼukik li jnupunele, ¿mi mu jechuk?
35 Pe chkʼot me skʼakʼalil ta melel ti chpojbatik batel li jnupunele, vaʼun jaʼ to tspasik ayuno li vaʼ kʼakʼale».
36 Xi albatik jun lokʼolkʼop xtoke: «Muʼyuk me buchʼu chtuchʼ lokʼel jtuchʼuk pokʼ ta jlik achʼ kʼuʼil pokʼil sventa tspakʼ li ta mol kʼuʼil pokʼile. Yuʼun mi jech tspase li achʼ pokʼe ta me xjat lokʼel, jech xtok mu me snup-o sba xchiʼuk mol pokʼ li achʼ pokʼe.
37 Jech xtok, muʼyuk me buchʼu te chchʼol achʼ vino li ta yav vino* ti mol xae. Yuʼun mi jech tspase li achʼ vinoe ta me sjatbe li yav vinoe, vaʼun ta me xmal xchiʼuk ta me sok li yav vino eke.
38 Pe li achʼ vinoe skʼan te xichʼ chʼolel li ta achʼ yav vinoe.
39 Mu me skʼan xuchʼ achʼ vino li buchʼu yuchʼoj xa mol vinoe, yuʼun xi chale: ‹Jaʼ mas toj lek ta uchʼel li mol vinoe›».
Tsʼibetik ta yok vun
^ Jaʼ xkaltik, nab ta Galilea.
^ O: «kanova».
^ O: «la sjimkʼobtaik».
^ Kʼelo glosario.
^ O: «skamiya».
^ Kʼelo glosario.
^ Kʼelo glosario.
^ O: «chikta sveʼelik»; «chikta yiximik»; «chikta yotik»; «chtuchʼ xchʼutik». Kʼelo glosario.
^ Yav vino pasbil ta snukulil chonbolometik.
