Lukas 7:1-50
-
Xchʼunel yoʼonton jun bankilal soltaro (1-10)
-
La xchaʼkuxesbe skerem jun ants ta Nain li Jesuse (11-17)
-
Laj yichʼ kʼupil kʼoptael li Juan J-akʼ-ichʼvoʼe (18-30)
-
Chichʼ alel ti chchapanat li jkʼol kuxlejal ti jtoybae (31-35)
-
Laj yichʼ pasbel perton jun ants ti ojtikinbil kʼuchaʼal jpasmulile (36-50)
-
Lokʼolkʼop ta sventa viniketik ti oy yilike (41-43)
-
7 Kʼalal laj yoʼonton ta yalbel krixchanoetik li kʼusi onoʼox chalbee och batel ta Kapernaum.
2 Ti bu taje oy jun bankilal soltaro* ti oy jun smoso ti skʼanoj tajeke, toj tsots ip xchiʼuk ta xa xcham.
3 Kʼalal laj yaʼibe skʼoplal li Jesuse, la stak batel moletik* yuʼun judaetik* sventa xbat yikʼik tal, yuʼun tskʼan ti akʼo xtal poxtabatuk li smosoe.
4 Vaʼun xi kʼot skʼanbeik vokol Jesus li buchʼutik laj yichʼik takel batele: «Sta-o ti xakoltae,
5 yuʼun skʼanoj li jlumalkutike xchiʼuk jaʼ la svaʼan li snail jtsobobbailkutike».
6 Jaʼ yuʼun bat xchiʼuk j-ikʼvanejetik li Jesuse. Kʼalal jutuk xaʼox skʼan xkʼot ta nae, stakoj xaʼox batel yamigotak li bankilal soltaro sventa xi xkʼot yalbeike: «Bankilal, mu xavakʼ avokol, yuʼun mu jta-o ti cha-och ta yut jnae.
7 Jech oxal, muʼyuk ay jkʼelot ta skoj ti mu jta-o chkaʼie. Pe alo ti chkole, vaʼun chkol li jmosoe.
8 Yuʼun pasbilun noʼox ta mantal ek xchiʼuk ta jpas ta mantal soltaroetik xtok, kʼalal ‹¡Batan!›, mi xkut li june, ta xbat. ‹¡Laʼ!›, mi xkut li jun xtoke, chtal. ‹¡Paso liʼe!›, mi xkut li jmosoe, tspas».
9 Toj labal sba laj yaʼi Jesus kʼalal laj yaʼi li kʼusitik taje, te une joypʼij, la skʼel batel li epal krixchanoetik ti tstsʼakliate xchiʼuk xi laj yalbee: «Chkalboxuk avaʼiik ti muʼyuk buchʼu jech toj mukʼ xchʼunel yoʼonton jtaoj li ta Israele».
10 Kʼalal sutik batel ta na li buchʼutik laj yichʼik takel batele, poxtajem xa kʼot staik li mosoile.
11 Kʼalal mu toʼox jaluk yechʼel taje bat ta jteklum Nain, te tijilik batel ek li yajchankʼoptake xchiʼuk li epal krixchanoetike.
12 Kʼalal jutuk xaʼox skʼan xkʼot ta stiʼ jteklume, ¡kʼelo avil un!, te telbil tal jun anima, jaʼ skerem jun ants ti jun noʼox li yole. Jech xtok, jaʼ jun meʼon ants. Te chiʼinbil tal yuʼun epal krixchanoetik ta jteklum li antse.
13 Kʼalal la sta ta ilel li antse, kʼuxubaj ta yoʼonton li Kajvaltike xchiʼuk xi laj yalbee: «Mu xa xa-okʼ».
14 Te une nopaj batel, la spikbe li svayebe xchiʼuk pajik ta xanbal li buchʼutik stelojik batele. Vaʼun xi laj yalbee: «Xi chkalbote kerem: ¡Likan!».
15 Te une, choti li animae xchiʼuk lik kʼopojuk, vaʼun li Jesuse laj yakʼbe skerem li meʼile.
16 Vaʼun xiʼik ta jyalel skotolik xchiʼuk xi lik stoybeik skʼoplal Diose: «Vul ta lokʼel jun mukʼul j-alkʼop ta jtojolaltik» xchiʼuk «Laj xa yakʼ tal sat Dios ta stojolal li steklumale».
17 Puk batel skʼoplal ta sjunul Judea xchiʼuk li ta jteklumetik ti oy ta sjoylejale.
18 Vaʼun, li Juane albat yuʼun yajchankʼoptak li kʼusitik taje.
19 Jaʼ yuʼun la stak ta ikʼel chaʼvoʼ yajchankʼoptak li Juane, la stak batel sventa xi sjakʼbeik li Kajvaltike: «¿Mi voʼot li Buchʼu chtale, o mi yan-o buchʼu ta jmalakutik?».
20 Kʼalal kʼotik ta stojolale, xi laj yalbeike: «Jaʼ la stakunkutik tal li Juan J-akʼ-ichʼvoʼ sventa xi ta jakʼbotkutike: ‹¿Mi voʼot li Buchʼu chtale, o mi yan-o buchʼu ta jmalakutik?›».
21 Li vaʼ orae la xpoxta ep jchameletik, li buchʼutik tsots xchamelike, li buchʼutik uʼuninbil yuʼun pukujetik ti toj chopolike xchiʼuk ep maʼsatetik la sjambe sat.
22 Xi takʼbatik yuʼun li Jesuse: «Batanik, bat albeik Juan li kʼusi laj avilik xchiʼuk li kʼusi laj avaʼiike: Li maʼsatetike xilik osil, li koxoetike chanavik, li buchʼutik ipik ta kʼaʼemal chamele yakal chkolik, li pakʼchikinetike yakal chaʼiik kʼoponel, li buchʼutik chamemike yakal chchaʼkuxiik* xchiʼuk li buchʼutik abol sbaike yakal chichʼik cholbel li lekil aʼyejetike.
23 Xchiʼuk xmuyubaj noʼox* li buchʼu muʼyuk smakoj yok ta jkoje».
24 Kʼalal batik xaʼox li yajchankʼoptak Juane, xi laj yalbe epal krixchanoetik ta sventa Juan li Jesuse: «¿Kʼusi lokʼ akʼelik li ta takixokol balumile? ¿Mi jaʼ lokʼ akʼelik jtekʼuk aj ti xlaʼaʼet ta ikʼe?
25 ¿Kʼusi lokʼ akʼelik un chaʼa? ¿Mi jaʼ lokʼ akʼelik jun vinik ti toyol stojol skʼuʼ spokʼtak slapoje? ¡Yuʼun te oyik ta sna ajvaliletik maʼ li buchʼutik toj kʼupil sba skʼuʼ spokʼike xchiʼuk ti toj echʼem kʼusitik oy yuʼunike!
26 ¿Kʼusi lokʼ akʼelik ta melel chaʼa? ¿Mi jaʼ jun j-alkʼop? Chkalboxuk avaʼiik ta melel ti jaʼ mas to jelavem skʼoplale, jaʼ mu sta li jun j-alkʼope.
27 Taje jaʼ li buchʼu xi tsʼibabil skʼoplale: ‹¡Kʼelo avil! ¡Voʼon ta jtak batel baʼyel ta atojolal li kaj-almantale, jaʼ jbabe chbat avuʼun sventa chchapan abe!›.
28 Chkalboxuk avaʼiik ti muʼyuk buchʼu mas jelavem skʼoplal vokʼem* tal ta stojolal junuk ants jech kʼuchaʼal li Juane, pe li buchʼu mas bikʼit skʼoplal li ta Ajvalilal yuʼun Diose jaʼ mas to jelavem skʼoplal ti jaʼ mu sta li Juane».
29 (Kʼalal laj yaʼiik sjunul jteklum xchiʼuk jtsobpatanetik taje laj yalik ti tukʼ li Diose, yuʼun laj yichʼik voʼ ti kʼu yelan laj yakʼ ichʼvoʼ li Juane.
30 Pe muʼyuk bu la stsakik ta mukʼ li tojobtasel akʼbatik yuʼun Dios li jfariseoetik xchiʼuk li buchʼutik lek chanemik ta Mantale, yuʼun muʼyuk bu laj yichʼik voʼ ta stojolal Juan.)
31 «Jaʼ yuʼun chaʼa, ¿buchʼu ta jkoʼoltas-o li krixchanoetik ta jkʼol kuxlejal liʼe, buchʼu xkoʼolajik-o?
32 Jaʼ xkoʼolajik kʼuchaʼal uni ololetik ti chotajtik ta chʼivit ti xi chapta sbaike: ‹La jupankutik avaʼiik amay, pe muʼyuk xa-akʼotajik, kʼalal xi-avetkutik ta at-oʼontone muʼyuk bu xa-okʼik›.
33 Jaʼ jech ek, muʼyuk bu sveʼ tal pan* xchiʼuk muʼyuk bu xuchʼ tal vino li Juan J-akʼ-ichʼvoʼe, pe xi chavalike: ‹Ochem pukuj ta yoʼonton›.
34 Li Xnichʼon krixchanoe chveʼ tal xchiʼuk ch-uchʼbolaj tal, pe xi chavalike: ‹¡Kʼelo avilik! ¡Jaʼ jun vinik ti mu x-echʼ yoʼonton ta veʼel xchiʼuk ta yuchʼel vinoe, jaʼ yamigo jtsobpatanetik xchiʼuk jpasmuliletik!›.
35 Manchuk mi jech, li pʼijilale chvinaj ti tukʼ skʼoplal ta skoj skotol li xnichʼnabe.»
36 Vaʼun oy jun jfariseo ti chalilanbe tajek ti akʼo xbat veʼuk ta snae. Vaʼun och batel ta sna jfariseo li Jesuse xchiʼuk te choti ta veʼel ta mexa.
37 ¡Kʼelo avil un!, oy jun ants ti ojtikinbil kʼuchaʼal jpasmulil li ta jteklume, laj yaʼi ti te chveʼ ta sna jun jfariseo li Jesuse, laj yichʼ batel muil aseite, xchʼoloj batel ta jarra ti pasbil ta alavastroe.*
38 Te kʼot skejan sba ta spat li Jesuse, ta stsʼel yok, lik okʼuk xchiʼuk lik xtʼuxubtasbe yok ta yaʼlel sat xchiʼuk la skusbe ta stsotsil sjol. Jech xtok, la skʼunil tsʼutsʼbe* li yoke xchiʼuk la smalbe li muil aseitee.
39 Kʼalal laj yil li jfariseo ti ikʼvan ta veʼele, xi la snop ta yoʼontone: «Ti j-alkʼopuk ta melel li vinik liʼe, xojtikin jechuk buchʼu li antse xchiʼuk snaʼoj jechuk ti kʼu yelan stalelal li buchʼu la spik okile, ti jaʼ jun jpasmulile».
40 Pe xi laj yal li Jesuse: «Oy kʼusi chkalbot, Simon». Xi la stakʼe: «Alo kaʼitik, Jchanubtasvanej».
41 «Oy chaʼvoʼ viniketik ti oy yilik ta stojolal jun vinik ti chakʼ ta chʼamunel stakʼine; li june oy 500 ta sep denario* yil, pe li june 50 ta sep.
42 Kʼalal mu xa sut yilik li viniketik taje, ta sjunul yoʼonton la xchʼaybe yil xchaʼvoʼalik. Jaʼ yuʼun chaʼa, ¿buchʼu junukal mas skʼanoj?»
43 Xi la stakʼ li Simone: «Ta jnope jaʼ ti buchʼu mas ep chʼaybat yile». Xi albate: «Oy arason, jech avaʼuk».
44 Te une, joypʼij li Jesuse, la skʼel batel li antse xchiʼuk xi laj yalbe li Simone: «¿Mi xavil li ants liʼe? Kʼalal li-och ta yut anae muʼyuk laj avakʼbun voʼ sventa li koke. Yan li ants liʼe la xtʼuxubtasbun kok ta yaʼlel sat xchiʼuk la skus ta stsotsil sjol.
45 Muʼyuk bu la atsʼutsʼun maʼ voʼote, jaʼuk li ants liʼe muʼyuk bu lajem-o yoʼonton ta skʼunil tsʼutsʼel kok ti kʼu xa sjalil li-och tale.
46 Muʼyuk bu la amalbe aseite li jole, jaʼuk li ants liʼe la smalbe muil aseite li koke.
47 Ta skoj taje, chkalbot avaʼi ti pasbil xa perton li smultake manchuk mi toj ep, yuʼun toj echʼ noʼox kʼanvan; yan li buchʼu jutuk noʼox chkʼanvane jutuk noʼox chichʼ pasbel perton».
48 Vaʼun xi laj yalbe li antse: «Pasbil xa perton li amultake».
49 Xi la snopik li buchʼutik te chveʼik ta mexae: «¿Buchʼu xa noʼox li vinik leʼe, ti tspas perton muliletike?».
50 Pe xi laj yalbe ants li Jesuse: «Laj xa skoltaot li xchʼunel avoʼontone; junuk avoʼonton batan».
Tsʼibetik ta yok vun
^ Jaʼ li buchʼu sbainoj o ti tspas ta mantal sien soltaroe.
^ Kʼelo glosario.
^ Kʼelo glosario.
^ Kʼelo glosario.
^ O: «pʼij noʼox yoʼn»; «nichim noʼox yoʼonton».
^ O: «ayanem».
^ Kʼelo glosario.
^ Kʼelo glosario.
^ O: «butsʼbe»; «tsʼutsʼunbe».
^ Kʼelo glosario.
