Lukas 8:1-56
-
Chiʼinat batel yuʼun antsetik li Jesuse (1-3)
-
Lokʼolkʼop ta sventa jtsʼunolajel (4-8)
-
Ti kʼu yuʼun tstunes lokʼolkʼopetik li Jesuse (9, 10)
-
Laj yichʼ chapbel smelolal li lokʼolkʼop ta sventa jtsʼunolajele (11-15)
-
Muʼyuk kʼusi stakʼ nujanbel li kantile (16-18)
-
Smeʼ xchiʼuk yitsʼinabtak Jesus (19-21)
-
La spajes tsatsal ikʼaloʼ li Jesuse (22-25)
-
La stak batel pukujetik ta chitometik li Jesuse (26-39)
-
Stseb Jairo. Jun ants ti la spikbe li skʼuʼ slapoj ta sba Jesuse (40-56)
8 Kʼalal mu toʼox jaluk yechʼel taje, lik xanavuk ta jujun jteklum xchiʼuk ta jujun bikʼtal lumetik, chchol batel mantal xchiʼuk chalbe batel skʼoplal li lekil aʼyejetik sventa Ajvalilal yuʼun Diose. Te xchiʼuk batel li lajchaʼvoʼe,
2 xchiʼuk te oy jayvoʼ antsetik ti laj yichʼik lokʼesbel pukujetik ti toj chopolike xchiʼuk ti poxtaatike, june jaʼ li Maria ti Magdalena chalbeike, ti laj yichʼ lokʼesbel vukvoʼ pukuje;
3 te oy Juana ti jaʼ li yajnil Kusae, ti oy kʼusi akʼbil sbain yuʼun Erodese, te oy Susana xchiʼuk yantik epal antsetik ti laj yakʼbeik kʼusitik oy yuʼunik sventa tskoltaike.
4 Vaʼun, kʼalal la stsob sba epal krixchanoetik xchiʼuk li buchʼutik chbat ta jujun jteklum sventa chbat skʼelik Jesuse, te lik yal jun lokʼolkʼop:
5 «Oy jun jtsʼunolajel ti bat stsʼun sbekʼ stsʼunobe. Kʼalal lik svij batele te kʼot jlom ta xokon be xchiʼuk laj ta pechʼel ta tekʼel, vaʼun laj ta mut.
6 Jlome te kʼot ta sba ton, kʼalal jave takij ta skoj ti takin slumale.
7 Jlome te kʼot ta chʼixtik, jaʼ yuʼun laj ta netʼel kʼalal chʼi tal xchiʼuk li chʼixtike.
8 Jlom xtoke te kʼot ta lekil balumil, jaʼ yuʼun kʼalal jave sien laj yakʼ sat li jlome». Jaʼ yuʼun xi tsots laj yal kʼalal laj yoʼontone: «Akʼo yaʼi li buchʼu oy xchikin sventa chaʼie».
9 Pe li yajchankʼoptake la sjakʼbeik kʼusi van smelolal li lokʼolkʼop taje.
10 Xi albatike: «Li voʼoxuke cha-akʼbat anaʼik kʼusi smelolal li kʼusitik chʼul ti mukul skʼoplal* ta sventa li Ajvalilal yuʼun Diose, pe li yan krixchanoetike ta lokʼolkʼop chichʼik albel, jaʼ yuʼun akʼo mi yakal chilik yilel, pe mu xilik; akʼo mi yakal chaʼiik, pe mu xaʼibeik smelolal.
11 Veno, li smelolal li lokʼolkʼope jaʼ liʼe: li sbekʼ tsʼunobile jaʼ li skʼop Diose.
12 Ti bu laj yichʼ tsʼunel ta xokon bee jaʼ skʼoplal li buchʼutik laj yaʼiike, vaʼun chtal li Diabloe, tslokʼesbe ta yoʼontonik li skʼop Dios sventa mu xchʼunik xchiʼuk ti mu sta skolelike.
13 Ti bu laj yichʼ tsʼunel ta sba tone jaʼ skʼoplal li buchʼutik la xchikintaik li skʼop Diose xchiʼuk ti xkuxet noʼox yoʼontonik* la xchʼamike, pe chʼabal yibel; chchʼunik kʼuk sjalil, pe chchʼak sbaik lokʼel kʼalal chtal prevaetike.
14 Yan ti bu laj yichʼ tsʼunel ta chʼixtike jaʼ skʼoplal li buchʼutik la xchikintaik li skʼop Diose, pe ta skoj ti jochatik batel yuʼun li kʼusitik tsvul-o yoʼontonike, li kʼulejale xchiʼuk li kʼusitik tskʼupin ta xkuxlejalike, chlajik ta netʼel xchiʼuk muʼyuk bu chyijub lek satik.
15 Pe ti bu oy ta lekil balumile jaʼ skʼoplal li buchʼutik la xchikintaik li skʼop Dios ta slekil yutsil yoʼontonike, tstekʼan lek ta yoʼontonik, chakʼ satik xchiʼuk chkuch yuʼunik.
16 »Kʼalal tstsan kantil li jun krixchanoe, muʼyuk kʼusi tsnujanbe o chakʼ ta yolon tem, moʼoj, tskajan ta skajleb kantil sventa xilbeik xojobal li buchʼutik ch-och batel ta yut nae.
17 Yuʼun muʼyuk kʼusi nakʼal ti muʼyuk chichʼ akʼel ta ojtikinele, jech xtok muʼyuk kʼusi mukul tajek ti muʼyuk chichʼ naʼel xchiʼuk ti muʼyuk chichʼ vinajesele.
18 Jaʼ yuʼun tsʼet chikintaik ti kʼu yelan chavaʼiike, yuʼun li buchʼu oy yuʼune ta to x-akʼbat mas, yan li buchʼu chʼabal yuʼune, kʼajomal noʼox chpojbat ti kʼu yepal oy yuʼun snopoje».
19 Vaʼun tal kʼelatuk yuʼun smeʼ xchiʼuk yitsʼinabtak, pe mu stakʼ xnopajik batel ti bu oy ta skoj li epal krixchanoetike.
20 Jaʼ yuʼun xi albate: «Li ameʼ xchiʼuk avitsʼinabe te vaʼalik ta pana, yuʼun tskʼan tskʼelikot».
21 Xi takʼbatike: «Liʼe jaʼ jmeʼ xchiʼuk jaʼ jbankil kitsʼinabtak, yuʼun chaʼiik li skʼop Diose xchiʼuk tspasik li kʼusi chale».
22 Oy jun kʼakʼale ochik batel ta varko* li Jesus xchiʼuk yajchankʼoptake xchiʼuk xi laj yalbee: «Jelavkutik batel ta jot nab». Jaʼ yuʼun lik xanavikuk batel xchiʼuk svarkoik.
23 Pe kʼalal jaʼo chanavik batel ta varkoe, vay li Jesuse. Vaʼun tal xibal sba tsatsal ikʼ li ta nabe, jech oxal lik nojuk xa ta voʼ li svarkoike xchiʼuk lik yil svokolik.
24 Vaʼun bat skʼelik xchiʼuk bat stijik, xi laj yalbeike: «¡Jchanubtasvanej, Jchanubtasvanej, chichamkutik xa!». Vaʼun vaʼi xchiʼuk la stsak ta utel li ikʼe xchiʼuk li nab ti xyukʼlajet tajeke, vaʼun tsʼij xi likel li ikʼ xchiʼuk nabe, jech oxal chʼan xi likel.
25 Vaʼun xi albatike: «¿Bu oy li xchʼunel avoʼontonike?». Pe xiʼik ta jyalel xchiʼuk chʼayal to kʼot yoʼontonik xchiʼuk xi laj yalbe sbaike: «¿Buchʼu xa noʼox ta melel leʼe?, yuʼun kʼalal ta ikʼ xchiʼuk ta nab tspas ta mantal xchiʼuk chchʼunbat».
26 Te kʼotik ta stiʼil yosilal jerasaetik ti te oy ta jot Galileae.
27 Kʼalal yal ta varkoe te nupat ta be yuʼun jun vinik te ta jteklum, ti ochem pukuj ta yoʼontone. Voʼne xa ti muʼyuk slap-o skʼuʼ spokʼ xchiʼuk ti muʼyuk xa bu xkʼot ta snae, moʼoj, yuʼun ta mukinal* oy.
28 Tsots avan kʼalal laj yil Jesuse xchiʼuk la skejan sba ta stojolal, xi laj yale: «¿Kʼusi chasaʼ liʼ eke Jesus, Xnichʼon Mukʼul Dios? Tsots ta jkʼanbot vokol, mu xavakʼbun jvokol».
29 (Yuʼun li Jesuse laj yalilanbe mantal li ibal sba pukuj ti akʼo xlokʼ ta stojolal li vinike. Yuʼun ep ta velta laj yuʼunin* li vinike xchiʼuk ep ta velta yichʼoj chukbel yok skʼob ta kadena, lek chabibil, pe xchakʼlajet noʼox yuʼun ta tuchʼel li kadenae xchiʼuk ch-ikʼat batel yuʼun li pukuj ti bu nom stuktuk bu chʼikile.)
30 Pe xi jakʼbat yuʼun li Jesuse: «¿Kʼusi abi?». Xi la stakʼe: «Lejion»,* yuʼun ep pukujetik ochem ta stojolal li vinike.
31 Xchiʼuk ep ta velta tsots la skʼanbeik vokol ti akʼo mu xjipatik yalel ta xabe.*
32 Vaʼun te xlamet chveʼ jtsop epal chitom ta yok vits, lek ep li chitome, jaʼ yuʼun la skʼanbeik vokol ti akʼo xtakatik batel yoʼ bu oy li chitometike, vaʼun albatik ti xuʼe.
33 Te une lokʼik ta stojolal vinik li pukujetike, bat stikʼ sbaik ta chitometik, anil bat skotolik ta tayal chʼentik li chitometike, la sjip sbaik yalel ta nab, vaʼun te jikʼavik.
34 Pe jatavik li jchabichitometik kʼalal laj yilik li kʼusi kʼot ta pasele, batik ta jteklum xchiʼuk ta stiʼiltak jteklum sventa chalbeik skʼoplal taje.
35 Lokʼ batel li krixchanoetik sventa tskʼelik ti kʼusi kʼot ta pasele. Batik ta stojolal Jesus, vaʼun te la staik li vinik ti lokʼ pukujetik ta stojolale; slapoj xa skʼuʼ spokʼ xchiʼuk talem xa lek xchʼulel, te chotol ta yok Jesus; vaʼun xiʼik ta jyalel.
36 Li buchʼutik laj yilike lik xchapik kʼuxi poxtaj li vinik ti uʼuninbil yuʼun pukuje.
37 Vaʼun li epal krixchanoetik ti likemik ta yosilal jerasaetike lik skʼanbeik vokol ti akʼo xlokʼ batel te li Jesuse, yuʼun solel xiʼik ta jyalel. Vaʼun muy ta varko xchiʼuk lokʼ batel.
38 Pe tsots lik skʼanbe vokol Jesus li vinik ti lokʼ pukujetik ta stojolale sventa chbat xchiʼin, akʼo mi jech xi albat sventa chtakat sutele:
39 «Sutan batel ta ana xchiʼuk alilano batel li kʼusitik la spas Dios ta atojolale». Vaʼun la stam batel sbe, bat yal ta sjunul jteklum li kʼusi la spas Jesus ta stojolale.
40 Kʼalal sut batel li Jesuse toj lek chʼamat yuʼun li epal krixchanoetike, yuʼun smalaojik xa onoʼox.
41 Pe ¡kʼelo avil!, te nopaj tal jun vinik ti Jairo sbie, bankilal jpasmantal ta nail tsobobbail. La skejan sba ta yok Jesus xchiʼuk la skʼanbe vokol ti akʼo xbat ta snae,
42 yuʼun oy jun stseb ti jun noʼoxe, te van lajchebuk jabil yichʼoj, ta xa xcham li tsebe.
Vaʼun solel netʼbil batel yuʼun epal krixchanoetik li Jesus kʼalal yakal ta xanbale.
43 Xchiʼuk te oy jun ants ti oy xa ta lajcheb jabil ti mu xmak xchamele, muʼyuk bu staoj ti buchʼu xuʼ xpoxtaate.
44 Te nopaj batel ta spat, la spikbe li stsitsimal skʼuʼ slapoj ta sbae, vaʼun ta ora mak li xchamele.
45 Jaʼ yuʼun xi laj yal li Jesuse: «¿Buchʼu ti la spikune?». Kʼalal laj yalik ti muʼyuk buchʼu pikvane, xi laj yal li Pedroe: «Jchanubtasvanej, kakalot ta oʼlol yuʼun li epal krixchanoetike xchiʼuk solel tsnetʼoxuk».
46 Pe xi laj yal li Jesuse: «Oy buchʼu la spikun, yuʼun laj kaʼi* ti lokʼ juʼele».
47 Kʼalal laj yakʼ venta ants ti vinaje, xtʼeltʼun tal ta xiʼel, la skejan sba ta stojolal xchiʼuk jamal laj yalbe sjunul jteklum ti kʼu yuʼun la spike xchiʼuk ti kʼuxi poxtaj ta anile.
48 Xi albat yuʼun Jesus li antse: «Jtseb, lapoxtaj xa ta skoj li xchʼunel avoʼontone. Junuk avoʼonton batan».
49 Kʼalal yakal to ta loʼil li Jesuse te tal jun yajkʼopojel li bankilal jpasmantal ta nail tsobobbaile, xi laj yale: «¡Cham xa maʼ li atsebe! Altik xa chavakʼbe svokol li Jchanubtasvaneje».
50 Xi takʼbat yuʼun Jesus kʼalal laj yaʼi taje: «Mu xaxiʼ, jaʼ noʼox skʼan oyuk xchʼunel avoʼonton, yuʼun ta xkol li atsebe».
51 Kʼalal kʼot li ta nae, muʼyuk buchʼu yan laj yikʼ ochel, jaʼ noʼox li Pedroe, li Juane, li Santiagoe xchiʼuk li stot smeʼ tsebe.
52 Pe yakal chokʼitaik tseb skotol li krixchanoetike xchiʼuk tsmaj stiʼ yoʼontonik ta at-oʼonton. Jaʼ yuʼun xi laj yal li Jesuse: «Mu xa xa-okʼik, yuʼun muʼyuk bu chamem li tsebe, jaʼ noʼox yakal chvay».
53 Kʼalal jech laj yaʼiike, lik stseʼintaik sventa tslabanik yuʼun snaʼojik ti chamem xae.
54 Pe la stsakbe skʼob li tsebe xchiʼuk xi laj yalbee: «Tseb, ¡likan!».
55 Vaʼun sut tal xchʼulel* li tsebe, ta anil noʼox lik xchiʼuk laj yal mantal Jesus ti akʼo smakʼlinike.
56 Ta melel, mu xa snaʼ kʼusi tspasik li stot smeʼe, pe albatik mantal ti mu me buchʼu xalbeik li kʼusi kʼot ta pasele.
Tsʼibetik ta yok vun
^ Kʼelo glosario.
^ O: «pʼij noʼox yoʼnik»; «nichim noʼox yoʼontonik».
^ O: «kanova».
^ Kʼelo glosario.
^ O: yikʼaluk van ti «voʼne xa onoʼox ti tsots yuʼuninoj li vinike».
^ Li jun lejione jaʼ jvokʼ soltaroetik mas tsots skʼoplal li ta voʼneal Romae. Li jpʼel kʼop liʼe jaʼ skʼoplal ti toj epe.
^ Kʼelo glosario.
^ O: «laj kakʼ venta».
^ O: «yip xkuxlejal». Pneu·ma ta griego. Kʼelo glosario.
