Markos 1:1-45
-
Chchol mantal li Juan ti chakʼ ichʼvoʼe (1-8)
-
Laj yichʼ voʼ li Jesuse (9-11)
-
Pasat ta preva yuʼun Satanas li Jesuse (12, 13)
-
Lik xchol mantal ta Galilea li Jesuse (14, 15)
-
Takatik ta ikʼel baʼyel jchankʼopetik (16-20)
-
Laj yichʼ lokʼesel ibal sba pukuj (21-28)
-
Ep poxtavan ta Kapernaum li Jesuse (29-34)
-
Nom bu bat spas orasion (35-39)
-
Laj yichʼ poxtael jun vinik ti ip ta kʼaʼemal chamele (40-45)
1 Li slikeb lekil aʼyejetik* ta sventa Jesukristo ti jaʼ Xnichʼon Diose:
2 jaʼ jech kʼuchaʼal xi tsʼibabil yuʼun li j-alkʼop Isaiase: «(¡Kʼelo avil! Voʼon ta jtak batel baʼyel ta atojolal li kaj-almantale, jaʼ jbabe chbat avuʼun sventa chchapan abe.)
3 Oy buchʼu xi tsots ch-avan ta takixokol balumile: ‹¡Chapanbeik li sbe Jeovae!,* tukʼibtasbeik li sbee›».
4 Li Juan ti chakʼ ichʼvoʼe te oy ta takixokol balumil, te la xcholbe skʼoplal ti skʼan xichʼ voʼ li krixchanoetik sventa chakʼik ta ilel ti sutesoj yoʼontonike* xchiʼuk ti tspasbat perton li smulike.
5 Jech oxal chaʼa, skotol li buchʼutik te oyik ta yosilal Judea xchiʼuk skotol li buchʼutik te nakalik ta Jerusalene batik sventa bat skʼelik, vaʼun akʼbat yichʼik voʼ* ta Ukʼum Jordan xchiʼuk jamal laj yal li smulike.
6 Li skʼuʼ spokʼ Juane ta tsotsil kameyo pasbil xchiʼuk nukul li xchuk xchʼute; kʼulub* tstiʼ xchiʼuk teʼtikal pom tsloʼ.
7 Xi la xchol batel mantale: «Li Buchʼu tsʼakal chtal kuʼune jaʼ mas tsots yabtel, mu jta-o ta jtsuban* jba sventa ta jtitunbe li yakʼil xonobe.
8 Li voʼone laj kakʼ avichʼik voʼ, yan li stuke chakʼ avichʼik chʼul espiritu».*
9 Li vaʼ kʼakʼale, lik tal ta Nasaret ta yosilal Galilea li Jesuse xchiʼuk akʼbat yichʼ voʼ yuʼun Juan ta Ukʼum Jordan.
10 Jaʼ noʼox ti lokʼ ta voʼe, laj yil jam li vinajele, vaʼun laj yil yal tal chʼul espiritu ti xkoʼolaj kʼuchaʼal palomae,
11 vaʼun laj yichʼ aʼiel jun yechʼomal eil ta vinajel: «Voʼot Jnichʼonot, jkʼanojot, ximuyubaj* avuʼun».
12 Vaʼun ta anil noʼox tijbat yoʼonton yuʼun chʼul espiritu sventa xbat ta takixokol balumil.
13 Jech oxal te kom 40 kʼakʼal li ta takixokol balumile xchiʼuk te pasat ta preva yuʼun li Satanase.* Te xchiʼuk jtiʼaval chonbolometik, pe koltaat yuʼun li anjeletike.*
14 Vaʼun kʼalal laj yichʼ chukel li Juane, bat ta Galilea li Jesuse, la xchol batel li lekil aʼyejetik yuʼun Diose
15 xchiʼuk xi chale: «Kʼot xa ta pasel li yorail ti albil onoʼoxe xchiʼuk nopajem xa tal li Ajvalilal yuʼun Diose.* Suteso avoʼontonik xchiʼuk oyuk xchʼunel avoʼontonik ta stojolal li lekil aʼyejetike».
16 Kʼalal yakal chanav batel ta tiʼ Nab Galileae, te laj yil li Simon xchiʼuk Andrese, ti sbankil yitsʼin sbaike, yakal ta stikʼ yalel snutiʼik sventa tsakob choy ta yut nab, yuʼun jtsakchoyetik.
17 Jech oxal, xi albatik yuʼun li Jesuse: «Laʼ tsʼakliikun, vaʼun krixchanoetik xa chatsakik kuʼun jech kʼuchaʼal chatsakik choye».
18 Vaʼun laj yiktaik ta anil li snutiʼik sventa tsakob choye xchiʼuk la stsʼakliik batel.
19 Kʼalal namaj batel jutuke, te laj yil Santiago xchiʼuk Juan ti sbankil yitsʼin sbaike, ti jaʼ li xnichʼnab Sebedeoe, te tikʼilik ta varko* xchiʼuk yakal ta stsʼis snutiʼik sventa tsakob choy;
20 vaʼun ta anil noʼox ikʼatik batel. Jech oxal te laj yiktaik ta varko li stotik ti jaʼ li Sebedeoe xchiʼuk li sviniktake, vaʼun la stsʼakliik batel.
21 Te une batik ta Kapernaum.
Kʼalal jaʼo lik skʼakʼalil Savadoe,* och batel li ta nail tsobobbaile* xchiʼuk lik chanubtasvanuk.
22 Vaʼun chʼayal to kʼot yoʼontonik ta skoj ti kʼu yelan chanubtasvane, yuʼun vinaj ti tsots yabtel ti kʼu yelan chanubtasvane, mu jechuk kʼuchaʼal li jchanubtasvanejetik ta Mantale.*
23 Li vaʼ ora eke, te oy jun vinik ta snail stsobobbailik ti uʼuninbil yuʼun ibal sba* pukuje,* xi tsots avane:
24 «¿Kʼusi chasaʼ liʼ eke, Jnasaretal Jesus? ¿Mi yuʼun tal alajesunkutik? ¡Lek xakojtikin buchʼuot, voʼot li Buchʼu chʼul* yuʼun Diose!».
25 Pe li Jesuse la stsak ta utel, xi laj yalbee: «¡Anchan, lokʼan ta stojolal li vinike!».
26 Vaʼun li ibal sba pukuje, kʼalal laj xaʼox sjip ta lum li vinik ta skoj ti la slikesbe stupʼ-ikʼ xchiʼuk ti tsots avane, lokʼ batel ta stojolal li vinike.
27 Jech oxal chaʼa, ta skoj ti toj labal sba laj yil skotol krixchanoetike lik svulilan sbaik xchiʼuk xi laj yalike: «¿Kʼusi xa noʼox leʼe? ¡Achʼ ti kʼu yelan chchanubtasvane! Yuʼun kʼalal ta ibal sba pukujetik tsots chakʼbe mantal xchiʼuk chchʼunbat smantal».
28 Vaʼun ta anil noʼox puk batel skʼoplal ta buyuk noʼox ta sjunul yosilal Galilea.
29 Te une lokʼik batel li ta nail tsobobbaile, vaʼun batik ta sna Simon xchiʼuk Andres, te xchiʼukik ek li Santiago xchiʼuk Juane.
30 Vaʼun te puchʼul* la staik li smeʼniʼ Simone, yuʼun ip ta kʼokʼ, jech oxal laj yalbeik li Jesuse.
31 Vaʼun nopaj batel, la stsakbe skʼob xchiʼuk la snit likel, jech tupʼ li skʼakʼale, vaʼun lik meltsanbatuk sveʼelik.
32 Kʼalal chʼay xaʼox batel Kʼakʼal xchiʼuk ti ch-ikʼub xa osile, li krixchanoetike laj yikʼbeik tal li buchʼutik ip chaʼiike xchiʼuk li buchʼutik uʼuninbilik yuʼun pukujetike,
33 xchiʼuk te la stsob sbaik ta mero tiʼ na sjunul li jteklume.
34 Jech oxal la xpoxta ep krixchanoetik ti jeltos xchamelike xchiʼuk la slokʼes ep pukujetik, pe muʼyuk bu laj yakʼ xkʼopoj li pukujetike, yuʼun snaʼojik ti jaʼ li Kristoe.*
35 Sob tajek lik ta yokʼomal, kʼalal ikʼ to osile, vaʼun nom bu bat xchiʼuk te lik spas orasion.
36 Pe li Simon xchiʼuk li buchʼutik te xchiʼuke bat saʼik,
37 kʼalal la staike, xi laj yalbeike: «Skotol krixchanoetik yakal tsaʼoxuk».
38 Pe xi la stakʼe: «Batik ta yan lum, batik li ta jteklumetik ti nopolik noʼoxe, sventa ta jchol mantal te xtok, yuʼun jaʼ sventa ti lokʼemun tale».
39 Bat onoʼox un, bat xchol mantal li ta snailtak stsobobbailik ta sjunul yosilal Galileae xchiʼuk la slokʼes pukujetik.
40 Jech xtok, te tal jun vinik ta stojolal ti ip ta kʼaʼemal chamele,* la skejan sba xchiʼuk xi la skʼanbe vokole: «Ti xakʼanuke, xuʼ xapoxtaun».
41 Vaʼun kʼuxubaj ta yoʼonton, la syeʼ batel skʼob, la spik xchiʼuk xi laj yalbee: «¡Ta jkʼan!; kolan».
42 Ta ora noʼox sakchʼay li skʼaʼemal chamele, te une poxtaj.
43 Vaʼun tsots laj yalbe mantal xchiʼuk la stak batel,
44 xi laj yalbee: «Aʼio avaʼi, mu me buchʼu kʼusi xavalbe un; pe batan, bat akʼo aba ta ilel ta stojolal li palee* xchiʼuk akʼo li matanal jech kʼuchaʼal yaloj Moises ta skoj ti lapoxtaje, sventa xakʼik venta li kʼusi kʼot ta pasele».
45 Pe kʼalal lokʼ batel li vinike jamal laj yal batel xchiʼuk la spukbe batel skʼoplal ta buyuk noʼox. Jech oxal chaʼa, mu xa bu xuʼ x-och batel ta yeloval krixchanoetik ta junuk jteklum li Jesuse; nom bu chkom ti bu chʼabal krixchanoetike. Akʼo mi jech, te chbatilanik-o ta stojolal Jesus li krixchanoetik ti yantik-o bu likemik tale.
Tsʼibetik ta yok vun
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ O: «jkujan»; «jnijan»; «jtsapan».
^ Kʼelo glosario.
^ O: «pʼij koʼn»; «nichim koʼonton».
^ Kʼelo glosario.
^ Kʼelo glosario.
^ Kʼelo glosario.
^ O: «kanova».
^ O: «skʼakʼalil kuxob oʼontonal». Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ O: «metsel»; «mochol»; «taʼal».
^ Kʼelo glosario.
^ Kʼelo glosario.
^ Kʼelo glosario.
