Markos 11:1-33
11 Vaʼun, kʼalal nopajik xaʼox batel ta Jerusalen, ta Betfague xchiʼuk ta Betania te ta Vits Olivatike, la stak batel chaʼvoʼ yajchankʼoptak li Jesuse
2 xchiʼuk xi laj yale: «Batanik li ta bikʼit lum ti leʼ xa akʼelojik batele, vaʼun mi la-ochike, te chukul chataik ta ora jkot chʼiom vuro ti muʼyuk buchʼu skajlebinoj-oe; titunik, vaʼun ikʼbeikun tal.
3 Pe mi oy buchʼu xi chalboxuke: ‹¿Kʼusi chapasik leʼe?›, xi xavalbeike: ‹Yuʼun chtun yuʼun li Kajvaltike, pe te tstak sutel tal ta ora›».
4 Vaʼun batik, te chukul la staik ta tiʼ na li chʼiom vuroe, te oy ta pana ta xokon kaye, te une la stitunik tal.
5 Pe xi laj yalik jlom li buchʼutik te vaʼajtike: «¿Kʼusi chapasik ti chatitunik li chʼiom vuroe?».
6 Jaʼ jech la stakʼbeik ti kʼu onoʼox yelan albilik yuʼun Jesuse; te une koltaatik tal.
7 Laje laj yikʼbeik tal Jesus li chʼiom vuroe, la slambeik ta sba li skʼuʼ slapoj ta sbaike, vaʼun kaji li Jesuse.
8 Jech xtok, ep krixchanoetik la skʼiik ta be li skʼuʼ slapoj ta sbaike, yantike la skʼasik tal kʼob teʼ ta osiltik.
9 Li buchʼutik jbabe batel xchiʼuk li buchʼutik tijilik batel ta spate xi x-avet chalike: «¡Avokoluk, chabio! ¡Akʼo sta bendision li buchʼu chtal ta sbi Jeovae!
10 ¡Akʼo sta bendision li Ajvalilal chtal ta tsʼakal yuʼun jtotik Davide! ¡Avokoluk, chabio, voʼot ti ta toyol oyote!».
11 Te une och batel ta Jerusalen, ta yut templo,* la skʼel batel skotol li kʼusitik ta jujujote, pe ta skoj ti bat xa tajek orae bat ta Betania xchiʼuk li lajchaʼvoʼike.
12 Ta yokʼomal kʼalal chlokʼik xaʼox ta Betaniae lik viʼnajuk.
13 Te la sta ta ilel teʼel igo ta nom ti naka yanal oye, vaʼun bat skʼel mi oy kʼusi sta. Pe muʼyuk kʼusi la sta kʼalal kʼote, jaʼ noʼox yanal, yuʼun maʼuk yorail tsatin.
14 Jaʼ yuʼun xi laj yalbe li teʼel igoe: «Muʼyuk xa buchʼu tslobot-o li asate». Te yabinoj yajchankʼoptak li kʼusi laj yale.
15 Vaʼun kʼotik ta Jerusalen. Te och batel ta templo xchiʼuk lik snuts lokʼel skotol li buchʼutik te chchonolajik xchiʼuk chmanolajik ta temploe, la svalkʼunbe xmexaik li jeltakʼinetike xchiʼuk la svalkʼunbe svankaik li buchʼutik chchonik palomae.
16 Jech xtok, mu xakʼ ti oy buchʼu xjelav xchiʼuk yikatsik li ta temploe.
17 Xi chanubtasvane xchiʼuk xi laj yale: «¿Mi mu xiuk tsʼibabile chaʼa: ‹Spasobil orasion sventa skotol jteklumetik chichʼ albel li jnae?›. Pe li voʼoxuke apasojik xa ta xchʼen j-elekʼetik».
18 Kʼalal laj yaʼiik li bankilal paleetik xchiʼuk li jchanubtasvanejetik ta Mantal taje, lik skʼelik kʼuxi xuʼ smilik; yuʼun xiʼtaojik ta skoj ti chʼayal to chkʼot yoʼontonik skotol li epal krixchanoetik ta sventa ti kʼu yelan chchanubtasvane.
19 Lokʼik batel ta jteklum kʼalal bat xaʼox kʼakʼale.
20 Pe kʼalal te echʼik ta sob yokʼomale, laj yilik ti takijem xa li teʼel igoe, kʼalal to ta yibel takijem.
21 Vul ta sjol Pedro taje, jaʼ yuʼun xi laj yale: «¡Kʼelo avil Rabi!,* takijem xa li teʼel igo la achopol kʼoptae».*
22 Vaʼun xi takʼbatik yuʼun li Jesuse: «Oyuk xchʼunel avoʼontonik ta stojolal Dios.
23 Ta melel chkalboxuk avaʼiik ti buchʼu xi chalbe li vits liʼe: ‹Lokʼan batel, bat jipo aba ta nab›, xchiʼuk ti muʼyuk xchibet chale, ti oy lek xchʼunel yoʼonton ti chkʼot ta pasel li kʼusi chale, ta me xkʼot ta pasel yuʼun.
24 Jaʼ yuʼun chkalboxuk avaʼiik ti skotol li kʼusitik chavalik ta orasion xchiʼuk ti chakʼanike oyuk xchʼunel avoʼontonik, ataojikuk xa yaʼel, yuʼun ta onoʼox xa-akʼbatik.
25 Kʼalal oy bu chavaʼan abaik ta spasel orasion xtoke, pasbeik me perton li buchʼu oy smul avuʼunike, sventa jech ta spasboxuk perton apaltailik ek li Atotik ta vinajele».
26 *——
27 Te talik yan velta ta Jerusalen. Kʼalal jaʼo te chanav ta temploe, te nopajik tal li bankilal paleetike, li jchanubtasvanejetik ta Mantale xchiʼuk li moletike.
28 Xi laj yalbeike: «¿Bu la ata avabtel ti jech chapas li kʼusitik liʼe? ¿O buchʼu laj yakʼbot li avabtel sventa chapas li kʼusitik liʼe?».
29 Xi la stakʼ li Jesuse: «Oy kʼusi ta jakʼboxuk ek. Takʼbeikun, vaʼun chkalboxuk bu la jta kabtel ek ti jech ta jpas li kʼusitik liʼe.
30 ¿Bu lik tal li yabtel Juan ti laj yakʼ ichʼvoʼe, mi ta vinajel o mi ta stojolal krixchanoetik? Takʼbeikun».
31 Vaʼun xi lik yalbe sbaike: «‹Ta vinajel›, mi xkutike, xi chalbutike: ‹¿Kʼu yuʼun muʼyuk xachʼunbeik chaʼa?›.
32 Pe ¿mi ta xkaltik ti ‹Ta stojolal krixchanoetike›?». Xiʼik ta skoj li epal krixchanoetike, yuʼun jaʼ jun j-alkʼop chilik ta melel li Juane.
33 Jech oxal xi la stakʼbeik li Jesuse: «Mu jnaʼkutik». Vaʼun xi takʼbatik yuʼun li Jesuse: «Muʼyuk chkalboxuk bu la jta kabtel ek ti jech ta jpas li kʼusitik liʼe».
Tsʼibetik ta yok vun
^ Kʼelo glosario.
^ Jaʼ jun biil ti ichʼbil ta mukʼ ti jaʼ jech ch-albat li jun jchanubtasvanej juda vinike.
^ Kʼelo glosario.
^ Muʼyuk te chvinaj ta jlom voʼneal vunetik li versikulo liʼe, yuʼun muʼyuk te li ta Tsʼibetik laj yakʼ ta naʼel Diose.
