Markos 13:1-37
13 Kʼalal lokʼ batel ta temploe xi albat yuʼun jun yajchankʼope: «Jchanubtasvanej, ¡kʼelo avil!, ¡toj echʼ xa noʼox kʼupil sba li tonetike xchiʼuk ti kʼu to yelan vaʼanbil li kʼusitik liʼe!».
2 Pe xi takʼbat yuʼun li Jesuse: «¿Mi xavil skotol li kʼusitik mukʼtik vaʼanbil liʼe? Chichʼ jinesel skotol, mi jpʼejuk ton kajal chkom ta sba yan ton liʼe».
3 Kʼalal jaʼo te chotol ta Vits Olivatik ta yeloval temploe, li Pedro, Santiago, Juan xchiʼuk Andrese xi la sjakʼbeik ta mukule:
4 «Albun kaʼikutik, ¿bakʼin chkʼot ta pasel li kʼusitik taje xchiʼuk kʼusi senyail kʼalal poʼot xa xlaj skotol li kʼusitik liʼe?».
5 Vaʼun xi lik albatikuk yuʼun li Jesuse: «Kʼelo me abaik, mu me xalajik ta loʼlael.
6 Ep buchʼutik chtalik ta jbi xchiʼuk xi chalike: ‹Voʼon maʼ taje›, vaʼun ep buchʼutik chlajik ta loʼlael.
7 Jech xtok, kʼalal chavaʼiik ti oy paskʼop liʼe xchiʼuk ti oy paskʼop ta nome, mu me xaxiʼik ta jyalel; persa chkʼot ta pasel skotol li kʼusitik taje, pe maʼuk to me li slajebe.
8 »Yuʼun chlik skontrain sbaik jujun mukʼta jteklum,* chlik skontrain sbaik ajvaliletik, ch-echʼ nikel ta buyuk noʼox xchiʼuk chtal viʼnal. Taje jaʼ slikeb xkʼuxul vokolil.*
9 »Kʼelo me abaik lek li voʼoxuke. Li krixchanoetike chakʼoxuk ta kʼabal ta nail chapanobbailetik, tsmajoxuk ta nail tsobobbailetik, jech xtok, voʼon ta jkoj chavichʼik vaʼanel ta stojolal itsʼinal ajvaliletik xchiʼuk ta stojolal bankilal ajvaliletik sventa xaʼiik mantal li stukike.
10 Jech xtok, baʼyel chichʼ cholel ta skotol jteklumetik li lekil aʼyejetike.
11 Pe kʼalal ikʼbiloxuk batel sventa cha-akʼatik ta kʼabale, mu me xavul avoʼontonik kʼusi chkʼot avalik, moʼoj, jaʼ alik li kʼusi cha-akʼbat anaʼik li vaʼ orae, yuʼun maʼuk voʼoxuk ti chakʼopojike, moʼoj, jaʼ chkʼopoj li chʼul espiritue.
12 Jech xtok, li buchʼu xchiʼil noʼox sbaik ta vokʼele* chakʼ ta kʼabal sventa xichʼ milel li xchiʼil ta vokʼele, jaʼ jech tspas ta stojolal xnichʼon ek li totile, li alab nichʼnabiletik eke chlik skontrain li stot smeʼike, vaʼun chakʼik ta milel.
13 Chavichʼik pʼajel yuʼun skotol krixchanoetik ta jkoj. Pe jaʼ chkol li buchʼu chkuch yuʼun kʼalal to ta slajebe.
14 »Pe kʼalal mi la ataik ta ilel li kʼusi ibal sba ti chlajesvan ti te vaʼal ti bu mu stakʼ xvaʼie (akʼo tojobuk ta yaʼibel smelolal li jkʼelvune), vaʼun li buchʼutik te oyik ta Judeae akʼo jatavikuk batel ta vitstik.
15 Li buchʼu te oy ta sjol snae akʼo mu xyal xchiʼuk mi jaʼuk xbat yichʼ tal jtosuk li kʼusitik oy ta yut snae;
16 li buchʼu te oy ta yosile akʼo mu sut skʼel li kʼusitik yiktaoj sventa chbat yichʼ tal li skʼuʼ tslap ta sbae.
17 ¡Toj abol sbaik li antsetik ti xchiʼuk yolike xchiʼuk li antsetik ti chchuʼun to yolik li vaʼ kʼakʼale!
18 Pasilanik orasion sventa mu ta inviernouk xkʼot ta pasel,
19 yuʼun li vaʼ kʼakʼale jaʼ skʼakʼalil tsatsal vokolil ti muʼyuk bu jech kʼotem-o ta pasel kʼalal lik meltsajuk tal li kʼusitik pasbil yuʼun Diose xchiʼuk kʼalal to li avie, mi jaʼuk chtal yan velta xtok.
20 Jech ta melel, ti muʼyukuk bu tsjutukajesbe skʼakʼalil Jeova taje, muʼyuk buchʼu chkol ti jechuke. Pe ta skoj li buchʼutik tʼujbil ti jaʼ stʼujoj stuke, sjutukajesojbe li skʼakʼalile.
21 »Vaʼun mi oy buchʼu xi chalboxuk xtoke: ‹¡Kʼelo avilik! Liʼ oy li Kristoe› o ‹¡Kʼelo avilik! Leʼ oye›, mu me xachʼunik.
22 Yuʼun chtal jloʼlavanej Kristoetik xchiʼuk jloʼlavanej j-alkʼopetik, vaʼun tspasik kʼusi senyailtak xchiʼuk kʼusitik labal sba sventa chloʼlavanik, xchiʼuk xuʼ van sloʼlaik ek li buchʼutik tʼujbile.
23 Jaʼ yuʼun li voʼoxuke chaʼa, kʼelo me abaik; baʼyel xa onoʼox laj kalboxuk skotol.
24 »Pe li vaʼ kʼakʼale, kʼalal mi echʼ xaʼox li tsatsal vokolil taje, ta x-ikʼub li Kʼakʼale, muʼyuk xa bu chakʼ xojobal li Ue,
25 chpʼaj yalel tal li kʼanaletik ta vinajele xchiʼuk ta me xnik li juʼelaletik te oy ta vinajele.
26 Te une ta xilik chtal ta ba tok xchiʼuk smukʼta juʼel xchiʼuk smukʼulal li Xnichʼon krixchanoe.
27 Vaʼun tstak tal li anjeletike xchiʼuk tstsob li buchʼutik tʼujbil yuʼun ti oyik ta xchanjotal xchikin balumile, ti chlik ta jot stiʼil balumil kʼalal to ta jot stiʼil vinajele.
28 »Tana un, oyuk kʼusi xachanik li ta lokʼolkʼop ta sventa li teʼel igoe: kʼalal ch-uninaj skʼobkʼobtak xchiʼuk ti chlokʼ yanale anaʼojik ti chnopaj xa tal li veranoe.
29 Jaʼ jechoxuk ek, kʼalal chavilik chkʼot ta pasel li kʼusitik taje, naʼik me ti nopol xa xtale, ti ta tiʼ na xa oye.
30 Ta melel chkalboxuk avaʼiik ti muʼyuk onoʼox bu chlaj li jkʼol kuxlejal liʼe jaʼ to mi kʼot ta pasel skotol li kʼusitik taje.
31 Ch-echʼ skʼoplal li vinajel xchiʼuk balumile, pe li kʼusi chkale mi jaʼuk onoʼox bu ch-echʼ skʼoplal.
32 »Ta sventa li skʼakʼalil o li yorail taje muʼyuk buchʼu snaʼ, mi jaʼuk li anjeletik ta vinajele mi jaʼuk li Nichʼonile, jaʼ noʼox snaʼ li Totile.
33 Teuk-o me asatik, vikʼiluk-o me asatik, yuʼun mu xanaʼik kʼusi ora chkʼot li yorail akʼbile.
34 Yuʼun taje jaʼ jech kʼuchaʼal jun vinik ti bat ta nome, ti laj yikta komel li snae xchiʼuk ti laj yakʼbe sventain li smosotake, laj yakʼbe yabtelik ta jujuntal xchiʼuk laj yalbe ti vikʼiluk me sat li jchabitiʼnae.
35 Jech oxal chaʼa vikʼiluk me asatik, yuʼun mu xanaʼik bakʼin chtal li yajval nae, mi ta bat kʼakʼal, mi ta oʼlol akʼobal, mi yechʼel xaʼox oʼlol akʼobal* o mi ta sob tajek,
36 yuʼun kʼalal mi vul ta lokʼel ta ora noʼoxe, jaʼ jech mu vayaluk staoxuk.
37 Pe li kʼusi chkalboxuke, jaʼ jech chkalbe skotolik ek: vikʼiluk me asatik».
Tsʼibetik ta yok vun
^ O: «nasion».
^ S.gr.: «xkʼuxul alajel».
^ O: «ayanele».
^ S.gr.: «jaʼo kʼalal ch-okʼ kotse».
