Markos 4:1-41
-
LOKʼOLKʼOPETIK SVENTA AJVALILAL (1-34)
-
Jtsʼunolajel (1-9)
-
Ti kʼu yuʼun tstunes lokʼolkʼopetik li Jesuse (10-12)
-
Laj yichʼ chapbel smelolal li lokʼolkʼop ta sventa jtsʼunolajele (13-20)
-
Muʼyuk bu chichʼ nujanbel moch li kantile (21-23)
-
Ti kʼu yelan chapʼisvanike (24, 25)
-
Jtsʼunolajel vinik ti chvaye (26-29)
-
Bekʼ mostasa (30-32)
-
Laj yichʼ tunesel lokʼolkʼopetik (33, 34)
-
-
La spajes tsatsal ikʼaloʼ li Jesuse (35-41)
4 Te lik chanubtasvanuk ta tiʼ nab yan velta, vaʼun toj ep xa noʼox tajek krixchanoetik la stsob sbaik tal ta stojolal. Jech oxal te muy chotluk ta jkot varko* xchiʼuk och batel jutuk li ta yut nabe, pe skotol li epal krixchanoetike te vaʼalik ta tiʼ nab.
2 Jech oxal chaʼa, ep kʼusitik ta lokʼolkʼop lik yakʼbe xchan xchiʼuk xi laj yal kʼalal yakal chchanubtasvane:
3 «Aʼio avaʼiik. ¡Kʼelo avilik! Li jtsʼunolajele oy kʼusi bat stsʼun.
4 Kʼalal lik svij batel li tsʼunobile te kʼot jlom ta xokon be, vaʼun laj ta mut.
5 Jlom tsʼunobile te kʼot ta tontik ti bu muʼyuk lek slumale, jech oxal ta anil noʼox jav ta skoj ti muʼyuk pim slumale.
6 Pe kʼalal lokʼ tal Kʼakʼale la xchikʼ, jech xtok ta skoj ti chʼabal nat yibele takij.
7 Jlom tsʼunobile te kʼot ta chʼixtik, jaʼ yuʼun laj ta netʼel kʼalal chʼi talel li chʼixtike, jech oxal muʼyuk bu satin.
8 Pe li jlome te kʼot ta lekil balumil, jaʼ yuʼun jav xchiʼuk chʼi, vaʼun lek lik satinuk, 30 laj yakʼ sat li jlome, 60 laj yakʼ sat li jlome xchiʼuk 100 laj yakʼ sat li jlome».
9 Vaʼun xi to laj yale: «Akʼo yaʼi li buchʼu oy xchikin sventa chaʼie».
10 Vaʼun kʼalal stuk xa te oye, li buchʼutik te oy ta spat xokon xchiʼuk li lajchaʼvoʼike lik sjakʼbeik skʼoplal li lokʼolkʼopetike.
11 Xi albatike: «Voʼoxuk akʼbiloxuk li kʼusi chʼul ti mukul skʼoplal* ta sventa li Ajvalilal yuʼun Diose, pe li yan krixchanoetike ta lokʼolkʼop chichʼik albel skotol,
12 jaʼ yuʼun akʼo mi yakal chilik yilel, pe mu xilik; akʼo mi yakal chaʼiik yilel, pe mu xaʼibeik smelolal, jech xtok muʼyuk bu tsutik tal xchiʼuk ti xichʼik akʼbel pertone».
13 Xi albatik xtoke: «Li voʼoxuke mu xavaʼibeik smelolal li lokʼolkʼop taje, jech oxal chaʼa, ¿kʼuxi xa noʼox chavaʼibeik smelolal li yantik lokʼolkʼopetike?
14 »Li jtsʼunolajele tstsʼun skʼop Dios.
15 Li skʼop Dios ti laj yichʼ tsʼunel ta xokon bee, jaʼ skʼoplal li buchʼutik naka to laj yaʼibeik li skʼop Diose; vaʼun chtal lokʼesbatuk ta yoʼontonik yuʼun Satanas li skʼop Dios ti laj yichʼ tsʼunel ta yoʼontonike.
16 Jaʼ jech ek li skʼop Dios ti laj yichʼ tsʼunel ta tontike jaʼ skʼoplal li buchʼutik naka to laj yaʼibeik li skʼop Diose, vaʼun xkuxet noʼox yoʼonton* la xchʼamik.
17 Pe chʼabal nat yibel yakʼoj ta yoʼontonik, akʼo mi jech, te oyik kʼuk sjalil, vaʼun ta ora la smak yokik kʼalal lik yil tsots svokolik xchiʼuk kʼalal lik yichʼik kontrainel ta skoj li skʼop Diose.
18 Oy yantik ti laj yichʼ tsʼunel ta chʼixtike. Taje jaʼ skʼoplal li buchʼutik chaʼiik skʼop Diose,
19 pe ta skoj li vul oʼonton ta sventa skotol li kʼusitik oy ta balumile,* li jloʼlavanej kʼulejal ti tsots sjuʼele xchiʼuk skotol li kʼusitik tskʼan oʼontonale chilbajin xchiʼuk tsnetʼ li skʼop Diose, vaʼun muʼyuk xa bu chakʼ sat.
20 Ta slajeb une, li butik laj yichʼ tsʼunel ta lekil balumile jaʼ skʼoplal li buchʼutik chaʼiik li skʼop Diose xchiʼuk ti lek chchʼamike, vaʼun 30 laj yakʼ sat li jlome, 60 laj yakʼ sat li jlome xchiʼuk 100 laj yakʼ sat li jlome».
21 Xi to albatike: «Muʼyuk bu chichʼ ichʼel tal sventa chichʼ nujanbel moch* o chichʼ akʼel ta yolon tem li kantile, ¿mi mu jechuk? ¿Mi mu tauk xichʼ ichʼel tal sventa chichʼ kajanel ta skajleb?
22 Yuʼun muʼyuk kʼusi nakʼal ti muʼyuk chichʼ akʼel ta naʼele; muʼyuk kʼusi mukul tajek ti muʼyuk chichʼ vinajesele.
23 Li buchʼu oy xchikin sventa chaʼie, akʼo yaʼi».
24 Xi albatik xtoke: «Tsʼet chikintaik li kʼusi chavaʼiike. Ti kʼu yelan chapʼisvanike jaʼ jech chavichʼik pʼisel ek, jech, ta to xa-akʼbatik xchiʼil.
25 Yuʼun li buchʼu oy yuʼune ta to x-akʼbat mas, yan li buchʼu chʼabal yuʼune, kʼajomal noʼox chpojbat ti kʼu yepal oy yuʼune».
26 Xi to laj yal batele: «Jaʼ jech li Ajvalilal yuʼun Diose xkoʼolaj kʼuchaʼal jun vinik ti la stsʼun tsʼunobil ta yosile.
27 Chvay ta akʼobaltik xchiʼuk chlik ta kʼakʼaltik, vaʼun chjav xchiʼuk toyol chchʼi li tsʼunobile —kʼu yelan chkʼot ta pasel ta melel, mu snaʼ maʼ taje—.
28 Ta kʼunkʼun chakʼ sat stuk li balumile: baʼyel chjav tal, te une chvinaj bu ch-ayan li sate, ta slajeb une chnoj ta sat.
29 Pe jaʼ noʼox mi yijub li sate, chtuchʼ ta jos,* yuʼun kʼot xa yorail chichʼ tuchʼel».
30 Xi to laj yal batel xtoke: «¿Kʼusi ta jkoʼoltastik-o li Ajvalilal yuʼun Diose, o kʼusi lokʼolkʼopal xuʼ xkalbetik-o smelolal?
31 Xkoʼolaj kʼuchaʼal jpʼej bekʼ mostasa* ti jaʼ li bu mas bikʼit ta skotol li bekʼ tsʼunobiletik ta balumil kʼalal chichʼ tsʼunele.
32 Pe kʼalal mi laj xaʼox yichʼ tsʼunele, chjav tal xchiʼuk toj mukʼ chbat, jaʼ bikʼit chkom skotol li yantik itaje xchiʼuk mukʼtik skʼobkʼobtak, jech oxal te chtal xkuxik ta yaxinal li mutetik chvil ta vinajele».
33 Naka ta lokʼolkʼopetik laj yalbe skʼoplal skʼop Dios jech kʼuchaʼal taje, jaʼ to ti bu kʼalal xaʼibeik smelolale.
34 Ta melel, muʼyuk kʼusi laj yakʼbe xchanik mi mu ta lokʼolkʼopuk laj yale, pe skotol li kʼusitike ta mukul laj yalbe smelolal li yajchankʼoptake.
35 Kʼalal ch-ikʼub xa osil li vaʼ kʼakʼale, xi laj yalbe li yajchankʼoptake: «Jelavkutik batel ta jot».
36 Jaʼ yuʼun kʼalal laj xaʼox skʼoponik komel li krixchanoetike laj yikʼik batel ta varko li Jesuse, jaʼ jech laj yikʼik batel ti kʼu yelan la staike, xchiʼuk te oy yan varkoetik ti bu oy svarkoal Jesuse.
37 Pe xjumet tal mukʼta xibal sba tsatsal ikʼ xchiʼuk lik smajilan varko ta skoj ti tsyukʼilan sba li nabe, jech oxal jutuk xa muʼyuk xnoj ta voʼ li varkoe.
38 Pe te yakal chvay ta chak varko li stuke, vayal ta xonjolil. Vaʼun tal stijik xchiʼuk xi laj yalbeike: «Jchanubtasvanej, ¿mi mu aventa-o ti chichamkutik xae?».
39 Jech oxal, lik xchiʼuk la stsak ta utel li ikʼe xchiʼuk xi laj yalbe li nabe: «¡Anchan! ¡Tsʼijlan!». Vaʼun chʼab li ikʼe xchiʼuk chʼan xi likel.
40 Vaʼun xi albatike: «¿Kʼu yuʼun chaxiʼik? ¿Mi yuʼun chʼabal to xchʼunel avoʼontonik?».
41 Pe xiʼik ta jyalel xchiʼuk xi laj yalbe sbaike: «¿Buchʼu xa noʼox ta melel leʼe? Yuʼun kʼalal ta ikʼ xchiʼuk ta nab chchʼunbat smantal».
Tsʼibetik ta yok vun
^ O: «kanova».
^ Kʼelo glosario.
^ O: «pʼij noʼox yoʼn»; «nichim noʼox yoʼonton».
^ Kʼelo glosario.
^ S.gr.: «tsnujanbe jun moch ti chtun ta spʼisobil kʼusitike».
^ «Jun lukluk natil kuchilu ti jaʼ sventa xtuchʼobil li kʼusitik tsʼunbile o sventa chichʼ tsobbel-o sat.»
^ Jaʼ jtos bikʼit bekʼ tsʼunobil ti chchʼi ta Palestinae. Taje te van chanibuk metro staylej chchʼi xchiʼuk oy skʼobkʼobtak.
