Markos 7:1-37
7 Vaʼun li jfariseoetik xchiʼuk jlom jchanubtasvanejetik ta Mantal ti likemik tal ta Jerusalene, la sjoyobtaik li Jesuse.
2 Vaʼun laj yilik ti oy junantik yajchankʼoptak ti ikʼ skʼob chveʼike, jaʼ xkaltik, ti muʼyuk bu spokoj skʼobike.*
3 (Yuʼun li jfariseoetik xchiʼuk skotol judaetike* jaʼ to chveʼik mi kʼalal to ta xukʼub tspok li skʼobike, yuʼun ta sjunul yoʼonton tspasik skotol li kʼusitik nopem xaʼi tspas krixchanoetik ta voʼnee,
4 xchiʼuk kʼalal tsutik tal ta chʼivite jaʼ to chveʼik mi laj xaʼox sakubtas sbaike. Oy to ep kʼusitik nopem xaʼiik spasel ta sjunul yoʼontonik ti akʼbilik komele, jech kʼuchaʼal ti chakʼbeik yichʼ voʼ kopaetik, jarraetik xchiʼuk li vasoetik* pasbil ta kovree.)
5 Jaʼ yuʼun xi jakʼbat yuʼun li jfariseoetik xchiʼuk jchanubtasvanejetik ta Mantale: «¿Kʼu yuʼun muʼyuk tstsakik ta mukʼ avajchankʼoptak li kʼusitik nopem xaʼi tspas krixchanoetik ta voʼnee, ti ikʼ skʼob chveʼike?».
6 Xi albatike: «Jloʼlavanejetik, ta melel jaʼ akʼoplalik li kʼusi laj yal j-alkʼop Isaias ti xi tsʼibabile: ‹Li jteklum liʼe ta yeik noʼox chichʼikun ta mukʼ, pe li yoʼontonike nom tajek oy ta jtojolal.
7 Muʼyuk sbalil ti chichʼikun-o ta mukʼe, yuʼun jaʼ noʼox smantaltak krixchanoetik li kʼusi chakʼik ta chanele›.
8 Chatenik komel li smantaltak Diose, pe jaʼ ta sjunul avoʼonton chapasik li kʼusitik nopem xaʼi tspas krixchanoetike».
9 Xi to albatik xtoke: «Lek xatojobik kʼu yelan chapasik sventa mu xachʼunbeik li smantal Dios yoʼ jaʼ xapasik li kʼusitik nopem xavaʼiik spasele.
10 Jech kʼuchaʼal liʼe, xi laj yal li Moisese: ‹Ichʼo ta mukʼ atot ameʼ›, xchiʼuk xi laj yale: ‹Tsta slajel li buchʼu chchopol kʼopoj* ta stojolal stot o smeʼe›.
11 Pe xi chavalik li voʼoxuke: ‹Buchʼuuk noʼox ti xi chalbe stot o smeʼe: «Li kʼusi oy kuʼune laj xa kakʼ ta korvan (jaʼ xkaltik, jun matanal akʼbil ta stojolal Dios), mu xa xuʼ jkoltaot»›,
12 jaʼ jech mu xa kʼusi xavakʼbeik spas jsetʼuk ta stojolal stotik o smeʼik.
13 Kʼalal jech chapasike jaʼ jech muʼyuk sbalil avuʼunik li skʼop Dios ta skoj li kʼusitik nopem xavaʼiik spasel ti la ajelubtasbeik komel li yantike. Xchiʼuk ep to kʼusitik chapasik ti xkoʼolajtik kʼuchaʼal taje».
14 Jech oxal, laj yikʼ yan velta li epal krixchanoetike xchiʼuk xi lik yalbee: «Chikintaik akotolik li kʼusi chkale xchiʼuk aʼibeik smelolal.
15 Maʼuk tsokesat-o li kʼusi ch-och ta ye jun krixchanoe, moʼoj, yuʼun jaʼ tsokesat-o li kʼusi chlokʼ ta ye jun krixchanoe».
16 *——
17 Kʼalal ochem xaʼox ta jpʼej na ti bu nom xa yiloj li epal krixchanoetike, lik jakʼbatuk yuʼun yajchankʼoptak ta sventa li lokʼolkʼope.
18 Jaʼ yuʼun xi albatike: «¿Mi yuʼun mu to xavakʼik venta ek jech kʼuchaʼal li stukike? ¿Mi mu xavakʼik venta ti maʼuk tsokesat-o li kʼusi ch-och ta ye jun krixchano
19 ta skoj ti maʼuk ta yoʼonton ch-oche, ti ta xchʼut ch-och xchiʼuk ti chlokʼ batel ta letrinae?». Jaʼ jech laj yakʼ ta aʼiel ti sak* skotol li kʼusitik chichʼ lajesele.
20 Xi laj yal xtoke: «Pe li kʼusitik chlokʼ ta ye jun krixchanoe jaʼ li kʼusitik tsokesat-oe.
21 Yuʼun ta yut yoʼonton chlik tal li kʼusi toj chopol tsnop krixchanoetike, li mulivajele,* li elekʼe, li milvaneje,
22 li sloʼlael nup chiʼilile,* li xpichʼetel oʼontonale, li kʼusi toj chopol chichʼ pasele, li loʼlaele, li talelal toj kʼexlal sbae,* li itʼixale,* li chopol kʼopojele, li toybaile xchiʼuk li bolibele.*
23 Skotol li kʼusitik toj chopol taje ta yut oʼontonal chlik tal xchiʼuk jaʼ tsokesat-o li jun krixchanoe».
24 Lik batel te, laje bat ta yosilal Tiro xchiʼuk Sidon. Te och batel ta jpʼej na, yuʼun mu skʼan ti oy buchʼu snaʼe, akʼo mi jech, vinaj onoʼox.
25 Jech oxal ta anil noʼox laj yaʼibe skʼoplal Jesus jun ants ti uʼuninbil yuʼun ibal sba pukuj li yuni tsebe, tal ta stojolal xchiʼuk la skejan sba ta yok.
26 Jaʼ jun jgresia* ants, likem* tal ta Fenisia, ta yosilal Siria,* vaʼun tsots lik skʼanbe vokol ti akʼo slokʼesbat li pukuj oy ta stojolal stsebe.
27 Pe xi albate: «Jaʼ akʼo nojuk xchʼut baʼyel li ololetike, yuʼun mu lekuk mi ta jpojbetik span* li ololetik sventa chkakʼbetik li uni neneʼ tsʼiʼetike».
28 Pe xi la stakʼ li antse: «Jech avaʼuk bankilal, pe li uni neneʼ tsʼiʼetike ta to slajesik ek li xchʼuchʼulil chlilij yalel ta xmexa ololetike».
29 Xi albat ta skoj taje: «Ta sventa ti jech laj avale, batan; lokʼem xa ta stojolal atseb li pukuje».
30 Vaʼun bat ta sna, te puchʼul* ta tem la sta li yuni tsebe, lokʼem xa li pukuje.
31 Kʼalal lokʼ ta Tiro li Jesus sventa tsut batel ta Nab Galileae, te echʼ ta Sidon xchiʼuk te echʼ ta yosilal Dekapolis.
32 Yikʼojbeik tal jun vinik ti pakʼchikine xchiʼuk ti vokol chkʼopoje, vaʼun la skʼanbeik vokol ti akʼo yakʼ skʼob ta stojolale.
33 Jech oxal parte laj yikʼ batel li vinike, la xchʼak lokʼel ta stojolal li epal krixchanoetike. Vaʼun la stikʼ ochel sniʼ skʼob li ta jujun xchikin vinike, xchiʼuk kʼalal laj xaʼox stubta li skʼobe la spikbe li yokʼe.
34 Laj une la skʼel muyel vinajel, tsots la sjikʼ yoʼonton xchiʼuk xi laj yalbee: «Efata», taje jaʼ skʼan xal: «Akʼo jamuk».
35 Vaʼun jam xchikin li vinike xchiʼuk meltsaj li skʼopojele, jech oxal lek xa lik kʼopojuk.
36 Laje laj yal mantal ti mu me buchʼu xalbeike, pe kʼalal jech laj yal mantale mas to la spukbeik batel skʼoplal.
37 Ta melel, chʼayal tajek kʼot yoʼontonik xchiʼuk xi laj yalike: «Lek la spas skotol li kʼusitike. Xaʼi xa yuʼun kʼalal ta pakʼchikinetik xchiʼuk xkʼopoj xa yuʼun kʼalal ta umaʼetik».
Tsʼibetik ta yok vun
^ Jaʼ skʼoplal ti muʼyukuk yikʼobalik jech kʼuchaʼal chal Mantale.
^ Kʼelo glosario.
^ Kʼelo glosario.
^ O: «spʼajoj».
^ Muʼyuk te chvinaj ta jlom voʼneal vunetik li versikulo liʼe, yuʼun muʼyuk te li ta Tsʼibetik laj yakʼ ta naʼel Diose.
^ Kʼelo glosario.
^ Por·nei·a ta griego. Kʼelo glosario.
^ Kʼelo glosario.
^ O: «sonsoibele».
^ S.gr.: «sbekʼ satil ti ch-itʼixaje».
^ «Aseljeia» ta griego. Kʼelo glosario.
^ Kʼelo glosario.
^ O: «vokʼem»; «ayanem».
^ Kʼelo glosario.
^ Kʼelo glosario.
^ O: «metsel»; «mochol»; «taʼal».
