Mateo 13:1-58
-
LOKʼOLKʼOPETIK SVENTA AJVALILAL (1-52)
-
Jtsʼunolajel (1-9)
-
Ti kʼu yuʼun tstunes lokʼolkʼopetik li Jesuse (10-17)
-
Laj yichʼ chapbel smelolal li lokʼolkʼop sventa jtsʼunolajele (18-23)
-
Trigo xchiʼuk chopol tsʼiʼlel (24-30)
-
Bekʼ mostasa xchiʼuk levadura (31-33)
-
Jaʼ sventa xkʼot ta pasel li albil kʼop ti laj yichʼ tunesel lokʼolkʼopetike (34, 35)
-
Laj yichʼ chapbel smelolal li lokʼolkʼop ta sventa li trigo xchiʼuk li chopol tsʼiʼlele (36-43)
-
Kʼulejal ti mukule xchiʼuk li perla ton ti toj leke (44-46)
-
Nutiʼ sventa tsakob choy (47-50)
-
Achʼ kʼulejal xchiʼuk mol kʼulejal (51, 52)
-
-
Laj yichʼ pʼajel ta slumal stuk li Jesuse (53-58)
13 Li vaʼ kʼakʼale, lokʼ batel ta na li Jesuse xchiʼuk te bat chotluk ta tiʼ nab,
2 vaʼun te la stsob sbaik tal epal krixchanoetik ta stojolal, jaʼ yuʼun te muy chotluk ta varko,* yan li epal krixchanoetike te vaʼalik ta tiʼ nab.
3 Vaʼun ep kʼusitik lik yalanbe ta lokʼolkʼopetik, xi laj yale: «¡Kʼelo avilik! Oy jun jtsʼunolajel ti oy kʼusi bat stsʼune.
4 Kʼalal lik svij batel li tsʼunobile te kʼot jlom ta xokon be, vaʼun laj ta mut.
5 Jlome te kʼot ta tontik ti bu muʼyuk lek slumale, jech oxal ta anil noʼox jav ta skoj ti muʼyuk pim slumale.
6 Pe kʼalal lokʼ tal Kʼakʼale la xchikʼ, jech xtok ta skoj ti chʼabal nat yibele takij.
7 Jlome te kʼot ta chʼixtik, jaʼ yuʼun laj ta netʼel kʼalal chʼi talel li chʼixtike.
8 Jlom xtoke te kʼot ta lekil balumil, jaʼ yuʼun lek lik satinuk, 100 laj yakʼ sat li jlome, 60 laj yakʼ sat li jlome xchiʼuk 30 laj yakʼ sat li jlome.
9 Akʼo yaʼi li buchʼu oy xchikine».
10 Vaʼun talik li yajchankʼoptake xchiʼuk xi laj yalbeike: «¿Kʼu yuʼun chatunes lokʼolkʼopetik kʼalal chachanubtas li krixchanoetike?».
11 Xi takʼbatike: «Li voʼoxuke cha-akʼbat anaʼik kʼusi smelolal li kʼusitik chʼul ti mukul skʼoplal* ta sventa li Ajvalilal ta vinajele, pe li krixchanoetik leʼe muʼyuk ch-akʼbat snaʼik.
12 Yuʼun li buchʼu oy yuʼune ta to x-akʼbat mas, jech ch-epaj mas li kʼusitik oy yuʼune; yan li buchʼu chʼabal yuʼune, kʼajomal noʼox chpojbat ti kʼu yepal oy yuʼune.
13 Jaʼ yuʼun ta jtunes lokʼolkʼopetik kʼalal ta jchanubtasike, yuʼun tskʼelik pe muʼyuk bu tstabeik sbalil, chaʼiik pe muʼyuk bu tstabeik sbalil, jech oxal mi jaʼuk xaʼibeik smelolal taje.
14 Jaʼ jech chkʼot ta pasel ta stojolalik li albil kʼop ti xi yaloj Isaiase: ‹Chavaʼiik yilel, pe muʼyuk bu chavaʼibeik smelolal, chakʼelik yilel, pe mu xavilbeik smelolal.
15 Yuʼun tsatsubem xa yoʼonton li jteklum liʼe, li kʼusi chaʼiike mu xchʼunik; yalel smakoj xchikinik xchiʼuk smakoj satik sventa mu kʼusi xilik-o batel ta satik xchiʼuk ti mu kʼusi xaʼiik li ta xchikinike, xchiʼuk mi jaʼuk xaʼibeik smelolal ta yoʼontonik, jech oxal mu sutik tal ta jtojolal sventa jpoxtaik›.
16 »Pe xmuyubaj noʼox* asatik li voʼoxuke, yuʼun xilik lek li kʼusi tskʼelike, xchiʼuk li achikinike yuʼun xaʼiik lek.
17 Yuʼun ta melel chkalboxuk avaʼiik ti ep j-alkʼopetik xchiʼuk tukʼil viniketik oy ox ta yoʼonton tskʼel yaʼiik li kʼusitik chakʼelik lek voʼoxuke, pe muʼyuk bu xilik, xchiʼuk oy ox ta yoʼonton chaʼiik li kʼusitik chavaʼiik voʼoxuke, pe muʼyuk bu xaʼiik.
18 »Jaʼ yuʼun li voʼoxuke chikintaik li lokʼolkʼop ta sventa jtsʼunolajele.
19 Kʼalal oy buchʼu chchikintabe skʼoplal li Ajvalilale pe ti mu xaʼibe smelolale, chtal li buchʼu toj chopole,* vaʼun tslokʼesbe ta yoʼonton li kʼusi tsʼunbile; taje jaʼ skʼoplal li kʼusi laj yichʼ tsʼunel ta xokon bee.
20 Yan ti bu laj yichʼ tsʼunel ta tontik ti bu muʼyuk lek slumale jaʼ skʼoplal li buchʼu chaʼibe skʼoplal li Ajvalilale xchiʼuk ti xkuxet noʼox yoʼonton chchʼam ta orae.
21 Pe chʼabal nat yibel yakʼoj ta yoʼonton, akʼo mi jech, te oy kʼuk sjalil, vaʼun ta ora la smak yok* kʼalal lik yil tsatsal vokolil xchiʼuk kʼalal lik yichʼ kontrainel ta skoj skʼoplal li Ajvalilale.
22 Yan ti bu laj yichʼ tsʼunel ta chʼixtike jaʼ skʼoplal li buchʼu chchikintabe skʼoplal li Ajvalilale, pe ti chlaj ta netʼel ta skoj li vul oʼonton ta sventa skotol li kʼusitik oy ta balumile* xchiʼuk ta skoj li jloʼlavanej kʼulejal ti tsots sjuʼele, vaʼun muʼyuk xa bu chakʼ sat.
23 Pe ti bu laj yichʼ tsʼunel ta lekil balumile, jaʼ skʼoplal li buchʼu chchikintabe skʼoplal li Ajvalilale xchiʼuk ti chaʼibe smelolale, vaʼun toj lek lik satinuk ta batsʼi melel, 100 laj yakʼ sat li jlome, 60 laj yakʼ sat li jlome xchiʼuk 30 laj yakʼ sat li jlome».
24 Xi lik yal yan lokʼolkʼope: «Li Ajvalilal ta vinajele xuʼ xichʼ koʼoltasel kʼuchaʼal jun vinik ti la stsʼun lekil tsʼunobil ta yosile.
25 Pe kʼalal yakal chvay li krixchanoetike te tal li yajkontrae, vaʼun la stsʼun chopol tsʼiʼlel* ti bu tsʼunbil trigoe, laj une bat.
26 Kʼalal lik javuk li kʼusi tsʼunbile xchiʼuk lik ayanuk tal li sate, lik vinajuk tal ek li chopol tsʼiʼlele.
27 Jaʼ yuʼun xi tal albatuk yuʼun smosotak li yajval nae: ‹Kajval, ¿mi mu naka lekil tsʼunobiluk la atsʼun li ta avosile? Vaʼun chaʼa, ¿bu lokʼ tal li chopol tsʼiʼlele?›.
28 Xi albatike: ‹Leʼe jaʼ la stsʼun jun vinik ti jaʼ kajkontrae›. Xi laj yalbe yajvalik li mosoiletike: ‹Vaʼun chaʼa, ¿mi chakʼan chbat jbulkutik lokʼel?›.
29 Xi laj yale: ‹Moʼoj, yuʼun xiʼeluk te kapal xlokʼ avuʼunik ta bulel li trigo kʼalal chabulik li chopol tsʼiʼlele.
30 Jaʼ lek akʼo jmoj chʼiuk jaʼ to mi laj yichʼ tsobele; vaʼun kʼalal mi kʼot yorail chichʼ tsobele xi chkalbe li buchʼutik tstsobike: tsobik baʼyel li chopol tsʼiʼlele, jujuyom xachukik sventa xichʼ chikʼel; vaʼun jaʼ to xatsobik li trigo sventa xakʼejik li ta snail kuʼune›».
31 Xi lik yal yan lokʼolkʼope: «Li Ajvalilal ta vinajele xkoʼolaj kʼuchaʼal jpʼej bekʼ mostasa* ti laj yichʼ batel jun vinik sventa chbat stsʼun ta yosile.
32 Taje jaʼ li bu mas bikʼit ta skotol li bekʼ tsʼunobiletike, pe kʼalal chchʼie toj mukʼ chbat, jaʼ bikʼit chkom skotol li yantik itaje, tspas ta jtekʼ teʼ, jaʼ yuʼun chtal li mutetik chvil ta vinajele, te chtal xkuxik ta skʼobkʼobtak».
33 Xi laj yal yan lokʼolkʼope: «Li Ajvalilal ta vinajele xkoʼolaj kʼuchaʼal levadura* ti laj yichʼ batel jun ants sventa chbat svotsʼ ta arina ti oxpʼis spʼisol ti lek mukʼtike, vaʼun la sitʼes skotol li arinae».
34 Skotol li kʼusitik laj yalbe epal krixchanoetik li Jesuse naka ta lokʼolkʼop laj yalbe. Ta melel, muʼyuk kʼusi laj yakʼbe xchanik mi mu ta lokʼolkʼopuk laj yale,
35 sventa xkʼot ta pasel li kʼusi xi albil skʼoplal ta stojolal j-alkʼope: «Ta lokʼolkʼopetik chikʼopoj, ta jpukbe batel skʼoplal li kʼusi mukul tal skʼoplal li ta slikebale».*
36 Te une kʼalal laj xaʼox skʼopon komel li epal krixchanoetike och batel ta yut na. Te talik ta stojolal Jesus li yajchankʼoptake xchiʼuk xi laj yalbeike: «Albun kaʼikutik kʼusi smelolal li lokʼolkʼop ta sventa li chopol tsʼiʼlel ta osile».
37 Xi la stakʼe: «Li buchʼu la stsʼun li lekil tsʼunobile jaʼ li Xnichʼon krixchanoe,
38 li osile jaʼ li krixchanoetike. Yan li lekil tsʼunobile jaʼ li xnichʼnab Ajvalilale, pe li chopol tsʼiʼlele jaʼ li xnichʼnab buchʼu toj chopole,*
39 li jkontrainvanej ti la stsʼune jaʼ li Diabloe. Li stsobel kʼusitik tsʼunbile jaʼ skʼoplal kʼalal poʼot xa xlaj skotol li kʼusitik oy ta balumile* xchiʼuk li buchʼutik tstsobike jaʼ skʼoplal li anjeletike.
40 Jaʼ jech kʼuchaʼal chichʼ tsobel li chopol tsʼiʼlel xchiʼuk ti chichʼ chikʼel ta kʼokʼe, jaʼ jech chichʼ pasel kʼalal poʼot xa xlaj skotol li kʼusitik oy ta balumile.
41 Ta stak tal yaj-anjeltak li Xnichʼon krixchanoe, vaʼun jaʼ ta stsobik lokʼel li ta Ajvalilal skotol li kʼusitik tsmak-o yokike xchiʼuk tstsobik lokʼel li jpaschoplejaletike,
42 vaʼun te tstenik yalel ta mukʼta kʼokʼ, jaʼ te ti bu ch-okʼik xchiʼuk ti chkʼux stanal* yeike.
43 Li vaʼ kʼakʼale, li ta Ajvalilal yuʼun Stotike ta me xakʼ xojobalik kʼuchaʼal xojobaj tajek Kʼakʼal li buchʼutik tukʼike. Akʼo yaʼi li buchʼu oy xchikine.
44 »Li Ajvalilal ta vinajele xkoʼolaj kʼuchaʼal jun kʼulejal ti te mukul ta osiltike, ti la sta jun vinik xchiʼuk ti la smuke; ta skoj ti xkuxet tajek yoʼontone bat xchon skotol li kʼusitik oy yuʼun sventa tsman li osil taje.
45 »Jech xtok, li Ajvalilal ta vinajele xkoʼolaj kʼuchaʼal jun jmanolajel ti nom snaʼ xanav sventa tsaʼ perla ton ti toj lekike.
46 Kʼalal la sta jpʼej perla ton ti toj toyol stojole, bat, bat xchon ta anil li kʼusitik oy yuʼune, vaʼun la sman.
47 »Jech xtok, li Ajvalilal ta vinajele xkoʼolaj kʼuchaʼal jlik nutiʼ sventa tsakob choy ti jipbil yalel ta nabe xchiʼuk ti jeltos choyetik tstsob tale.
48 Kʼalal noj une, la xjochik lokʼel ta tiʼ nab, te la xchotan sbaik sventa tstʼujik yoʼ xchʼamik ta moch ti bu toj lekike, pe la stenik batel ti butik mu xtune.
49 Taje jaʼ jech chkʼot ta pasel kʼalal poʼot xa xlaj skotol li kʼusitik oy ta balumile. Chlokʼik tal li anjeletike, chtal xchʼakik li buchʼutik toj chopolik ti te kapal ta stojolal li buchʼutik tukʼike,
50 vaʼun te tstenik yalel ta mukʼta kʼokʼ, jaʼ te ti bu ch-okʼik xchiʼuk ti chkʼux stanal yeike.
51 »¿Mi laj avaʼibeik smelolal skotol taje?». «Laj», xutik.
52 Vaʼun xi albatike: «Mi jaʼ jeche chaʼa, skotol li jchanubtasvanej kʼalal chanubtasbil ta sventa li Ajvalilal ta vinajele xkoʼolaj kʼuchaʼal jun vinik ti jaʼ yajval nae, ti tslokʼes tal kʼusitik achʼ xchiʼuk kʼusitik mol li ta skʼulejale».
53 Kʼalal laj yoʼonton ta yalel lokʼolkʼopetik li Jesuse, lokʼ batel te.
54 Te une tal ta slumal stuk, te lik chanubtasvanuk ta snail stsobobbailik, vaʼun chʼayal to kʼot yoʼontonik xchiʼuk xi laj yalike: «¿Bu la sta spʼijil li vinik leʼe xchiʼuk kʼuxi ti tspas skʼelobiltak juʼelale?
55 ¿Mi mu jaʼuk van li xnichʼon karpintero leʼe? ¿Mi mu Mariauk sbi li smeʼe chaʼa, mi mu jaʼuk yitsʼinabtak li Santiago, Jose, Simon xchiʼuk li Judase?
56 ¿Mi mu liʼuk nakalik ta jlumaltik li yixleltake? Vaʼun chaʼa, ¿kʼuxi ti spas yuʼun skotol li kʼusitik leʼe?».
57 Jaʼ yuʼun lik smak yokik ta skoj. Pe xi albatik yuʼun li Jesuse: «Jaʼ noʼox muʼyuk ichʼbil ta mukʼ ta slumal stuk xchiʼuk ta sna li j-alkʼope».
58 Jech oxal chaʼa, ta skoj ti chʼabal xchʼunel yoʼontonike muʼyuk bu ep la spas skʼelobiltak juʼelal te.
Tsʼibetik ta yok vun
^ O: «kanova».
^ Kʼelo glosario.
^ O: «pʼij yoʼn xvinaj»; «nichim noʼox yoʼonton».
^ O: «Satanas».
^ O: «chʼay xchʼunel yoʼonton».
^ Kʼelo glosario.
^ Jaʼ jtos chopol jobel ti oy svenenoal ti xkoʼolaj tajek kʼuchaʼal trigoe.
^ Jaʼ jtos bikʼit bekʼ tsʼunobil ti chchʼi ta Palestinae. Taje te van chanibuk metro staylej chchʼi xchiʼuk oy skʼobkʼobtak.
^ Kʼelo glosario.
^ O: «Jaʼ van skʼoplal kʼalal lik tal li stsʼunbal krixchanoetike».
^ O: «Satanas».
^ Kʼelo glosario.
^ O: «sbakil».
