Mateo 16:1-28
16 Li jfariseoetik xchiʼuk jsaduseoetike te nopajik tal ta stojolal Jesus, vaʼun la skʼanbeik ti akʼo yakʼ ta ilel junuk senyail ta vinajel sventa chakʼik ta prevae.
2 Xi takʼbatike: «Xi chavalik kʼalal ch-och xa akʼobale: ‹Lek kʼepel, yuʼun lek tsoj li vinajele›,
3 xi chavalik li ta sobe: ‹Chtal voʼ xchiʼuk oy sik maʼ tanae, yuʼun lek tsoj li vinajele pe limil›. Xanaʼik skʼelel kʼu yelan li vinajele, pe li senyailtak kʼakʼale mu xanabeik smelolal.
4 Li jkʼol kuxlejal ti toj chopol liʼe xchiʼuk ti muʼyuk tukʼ chakʼ sba ta stojolal Diose* yakalik-o ta sabel junuk senyail, pe muʼyuk bu ch-akʼbat yilik junuk senyail, jaʼ noʼox li senyail Jonase». Laj une bat, te iktaatik komel.
5 Vaʼun li jchankʼopetike jelavik batel ta jot, pe chʼay ta sjolik yichʼel batel spanik.*
6 Xi albatik yuʼun li Jesuse: «Vikʼiluk me lek asatik xchiʼuk kʼelo me abaik ta skoj slevadurail* li jfariseoetik xchiʼuk jsaduseoetike».
7 Vaʼun xi lik yalbe sbaike: «Muʼyuk laj kichʼ tal li jpantike».
8 Snaʼoj Jesus li kʼusi tsnopike, jaʼ yuʼun xi laj yale: «¿Kʼu yuʼun jech chavalbe abaik ta skoj ti chʼabal apanike, krixchanoetik ti jutuk xchʼunel avoʼontonike?
9 ¿Mi yuʼun mu to xavakʼik venta o mi yuʼun mu xvul ta ajolik ti veʼik voʼmil viniketik ta voʼob pane, xchiʼuk ti jayib to moch la atsobike?
10 ¿O kʼalal veʼik chanmil viniketik ta vukub pane, xchiʼuk ti jayib to mukʼtik moch noj avuʼunik kʼalal la atsobike?
11 ¿Kʼuxi ti mu xavakʼik venta ti maʼuk laj kalbe skʼoplal pane? Pe kʼelo me abaik ta skoj slevadurail li jfariseoetik xchiʼuk jsaduseoetike».
12 Vaʼun laj yaʼibeik smelolal ti maʼuk albatik ti skʼan skʼel sbaik ta skoj li slevadurail pane, moʼoj, jaʼ ta skoj li chanubtasel chakʼ jfariseoetik xchiʼuk jsaduseoetike.
13 Kʼalal te xaʼox oy ta yosilal Sesarea yuʼun Filipo li Jesuse, xi lik sjakʼbe li yajchankʼoptake: «¿Buchʼu la jaʼ chalik li Xnichʼon krixchanoe?».
14 Xi laj yalike: «Jlome chalik ti voʼot la li Juan J-akʼ-ichʼvoʼe, yantike chalik ti voʼot la li Eliase, jlome chalik ti voʼot la li Jeremiase o voʼot la junuk j-alkʼop».
15 Xi albatike: «Pe li voʼoxuke, ¿buchʼuun avalojik?».
16 Xi la stakʼ li Simon Pedroe: «Voʼot li Kristoote, li Xnichʼon kuxul Diose».
17 Xi takʼbat yuʼun li Jesuse: «Muyubajan noʼox* Simon, xnichʼon Jonas, yuʼun maʼuk laj yakʼbot anaʼ li buchʼu oy sbekʼtal xchiʼuk xchʼichʼele, moʼoj, jaʼ laj yakʼbot anaʼ li Jtot ta vinajele.
18 Xi chkalbot xtoke: voʼot Pedroot,* ta jvaʼan jtsobobbail li ta sba ton liʼe, vaʼun muʼyuk bu tstsalat yuʼun li yochebaltak Mukinale.*
19 Voʼon chkakʼbot li syaveal Ajvalilal ta vinajele, jaʼ yuʼun kʼusiuk noʼox ti chachuk liʼ ta sba balumile jaʼ me li kʼusi chukbil xa ta vinajele, xchiʼuk kʼusiuk noʼox ti chatitun liʼ ta sba balumile jaʼ me li titunbil xa ta vinajele».
20 Vaʼun tsots laj yalbe mantal yajchankʼoptak ti mu me buchʼu xalbeik batel ti jaʼ li Kristoe.
21 Jaʼo xa te lik yalbe tal yajchankʼoptak Jesus ti persa skʼan xbat ta Jerusalen xchiʼuk ti toj ep chil svokol ta skʼob moletik,* bankilal paleetik, jchanubtasvanejetik ta Mantal xchiʼuk ti chlaj ta milele, vaʼun ti chchaʼkuxi ta yoxibal kʼakʼale.
22 Vaʼun li Pedroe parte laj yikʼ batel li Jesuse, xi tsots laj yalbe mantale: «Oyuk slekil avoʼonton ta atojolal, Kajval; ta batsʼi melel mu jechuk chkʼot ta atojolal taje».
23 Pe li Jesuse joypʼij, vaʼun xi laj yalbe li Pedroe: «¡Akʼo aba ta jpat Satanas! Chamakbun kok, yuʼun maʼuk chanop li snopben Diose, jaʼ chanop li snopben krixchanoetike».
24 Vaʼun xi laj yalbe yajchankʼoptak li Jesuse: «Mi oy buchʼu tskʼan chtal ta jtojolale akʼo sten ta yoʼonton xkuxlejal, akʼo xkuch li jtel teʼ sventa vokolile* xchiʼuk akʼo stsʼakliun-o batel.
25 Yuʼun li buchʼu tspoj yaʼi xkuxlejale ta me xchʼay yuʼun, yan li buchʼu chchʼay xkuxlejal ta jkoje jaʼ me tsta.
26 Ta melel, ¿kʼusi sbalil tstabe li jun krixchano mi laj yuʼunin skotol li kʼusi oy ta balumil, pe ti jaʼ chchʼay li xkuxlejale? ¿O kʼusi chakʼ ta xkʼexol li xkuxlejal jun krixchanoe?
27 Yuʼun li Xnichʼon krixchanoe ta smukʼulal Stot chtal xchiʼuk yaj-anjeltak, vaʼun jaʼ jech chakʼbe stojol li krixchanoetik ti kʼu yelan stalelalik ta jujuntale.
28 Ta melel chkalboxuk avaʼiik ti oy jlom li buchʼutik liʼ vaʼalik ti muʼyuk bu tspasik preva ta jyalel li lajelale, jaʼ to me mi baʼyel laj yilik chtal ta Ajvalilal yuʼun li Xnichʼon krixchanoe».
Tsʼibetik ta yok vun
^ S.gr.: «sloʼlael nup chiʼilil».
^ Kʼelo glosario.
^ Kʼelo glosario.
^ O: «Pʼijuk noʼox avoʼn»; «Nichimuk noʼox avoʼonton».
^ Li ta griegoe jaʼ skʼan xal: «Ton, jxetʼ ton».
^ O: «Ades». Kʼelo glosario.
^ Kʼelo glosario.
^ Kʼelo glosario.
