Mateo 21:1-46
-
Laj yichʼ kʼupil kʼoptael li Jesuse (1-11)
-
La xchʼuba templo li Jesuse (12-17)
-
Laj yichʼ chopol kʼoptael teʼel igo (18-22)
-
Laj yakʼbeik ta preva li yabtel Jesuse (23-27)
-
Lokʼolkʼop ta sventa chaʼvoʼ kerem (28-32)
-
Lokʼolkʼop ta sventa jtsʼunolajeletik ti jmilvanejetike (33-46)
-
La spʼajik li ton ta chikin na ti mas tsots skʼoplale (42)
-
21 Kʼalal nopajik ta Jerusalen xchiʼuk ti kʼotik xaʼox ta Betfague ta Vits Olivatike, la stak batel chaʼvoʼ yajchankʼoptak li Jesuse
2 xchiʼuk xi laj yale: «Batanik li ta bikʼit lum leʼe, vaʼun te chukul chataik ta ora jkot meʼ vuro xchiʼuk jkot chʼiom vuro; titunik, vaʼun ikʼbeikun tal.
3 Xi xavalik mi oy buchʼu kʼusi chalboxuke: ‹Yuʼun chtun yuʼun li Kajvaltike›. Vaʼun tskoltaboxuk ta anil sventa xavikʼik tal».
4 Taje jaʼ jech kʼot ta pasel sventa xkʼot ta pasel li kʼusi xi albil ta stojolal j-alkʼope:
5 «Xi xavalbeik li stseb Sione:* ‹¡Kʼelo avil! Chtal ta atojolal li Ajvalil avuʼune, lek manxo, kajal chtal ta jkot vuro, jech, ta sba jkot chʼiom vuro, stsʼunbal jkot vuro›».
6 Vaʼun batik li jchankʼopetike xchiʼuk jaʼ jech tajek la spasik kʼuchaʼal chanubtasatik yuʼun li Jesuse.
7 Laje laj yikʼbeik tal li meʼ vuro xchiʼuk yole, la slambeik ta sba li skʼuʼ slapoj ta sbaike, vaʼun te la skajlebin li Jesuse.
8 Jutuk mu skotoluk li epal krixchanoetike la skʼi ta be li skʼuʼ slapoj ta sbaike, yantike lik skʼasik tal kʼob teʼ sventa chchexanik ta be.
9 Jech xtok li epal krixchanoetik ti jbabe batel xchiʼuk li buchʼutik tijilik batel ta spate xi x-avet chalike: «¡Avokoluk, chabio li Xnichʼon Davide! ¡Akʼo sta bendision li buchʼu chtal ta sbi Jeovae! ¡Avokoluk, chabio, voʼot ti ta toyol oyote!».
10 Kʼalal och batel ta Jerusalen une, xvochlajetik sjunul li jteklume xchiʼuk xi chalike: «¿Buchʼu leʼe?».
11 Li epal krixchanoetike xi chalilanike: «¡Jaʼ li j-alkʼop Jesuse, likem tal ta Nasaret ta Galilea!».
12 Och batel ta templo li Jesuse, la snuts lokʼel skotol li buchʼutik te chchonolajik xchiʼuk chmanolajik ta temploe, la svalkʼunbe xmexaik li jeltakʼinetike xchiʼuk la svalkʼunbe svankaik li buchʼutik chchonik palomae.
13 Xchiʼuk xi laj yalanbee: «Xi tsʼibabile: ‹Spasobil orasion chichʼ albel li jnae›, pe li voʼoxuke apasojik xa ta xchʼen j-elekʼetik».
14 Jech xtok, te tal maʼsatetik xchiʼuk koxoetik ta stojolal Jesus li ta temploe, vaʼun la xpoxtaan.
15 Ilinik tajek li bankilal paleetik xchiʼuk li jchanubtasvanejetik ta Mantal kʼalal laj yilik li kʼusitik labal sba la spase xchiʼuk kʼalal xi x-avetik ta templo li kʼox keremetike: «¡Avokoluk, chabio li Xnichʼon Davide!».
16 Vaʼun xi laj yalbeik li Jesuse: «¿Mi laj avaʼi li kʼusi chalike?», vaʼun xi la stakʼe: «Laj kaʼi. ¿Mi muʼyuk achanojik liʼe chaʼa: ‹Ta ye ololetik xchiʼuk ta ye li buchʼutik ta to xchuʼunik ti chkʼupil kʼoptavanike›?».
17 Laje laj yikta komel li krixchanoetike xchiʼuk lokʼ batel li ta jteklume, bat ta Betania, vaʼun te echʼ yuʼun akʼobal.
18 Kʼalal sob tajek sut tal ta jteklum ta yokʼomale lik viʼnajuk.
19 Laj yil teʼel igo li ta bee, bat skʼel, pe muʼyuk kʼusi la sta, naka yanal noʼox, xi laj yalbee: «Muʼyuk xa chasatin-o». Vaʼun ta ora noʼox takij li teʼel igoe.
20 Chʼayal to kʼot yoʼontonik li jchankʼopetik kʼalal laj yilik taje, xi laj yalike: «¿Kʼuxi xa noʼox ti ta ora takij li teʼel igoe?».
21 Vaʼun xi takʼbatik yuʼun li Jesuse: «Ta melel chkalboxuk avaʼiik ti mi oy xchʼunel avoʼontonik xchiʼuk mi muʼyuk xachibetike, maʼuk noʼox tspas avuʼunik kʼuchaʼal la jpasbe li teʼel igoe, yuʼun mi ‹Lokʼan batel, bat jipo aba ta nab›, mi xavutik ek li vits liʼe, jaʼ jech tspas.
22 Xchiʼuk mi oy xchʼunel avoʼontonike, kʼusiuk noʼox ti chakʼanik ta orasione chataik».
23 Kʼalal te xaʼox oy ta yut templo une, li bankilal paleetik xchiʼuk li moletik ta jteklume talik ta stojolal Jesus kʼalal yakal chchanubtasvane xchiʼuk xi laj yalbeike: «¿Bu la ata avabtel ti jech chapas li kʼusitik liʼe? Xchiʼuk, ¿buchʼu laj yakʼbot li avabtele?».
24 Xi la stakʼ li Jesuse: «Oy jtos kʼusi ta jakʼboxuk ek. Mi laj avalbeikune, chkalboxuk bu la jta kabtel ek ti jech ta jpas li kʼusitik liʼe:
25 ¿Bu lik tal li yabtel Juan ti laj yakʼ ichʼvoʼe? ¿Mi ta vinajel o mi ta stojolal krixchanoetik?». Pe xi lik yalbe sbaike: «‹Ta vinajel›, mi xkutike, xi chalbutike: ‹¿Kʼu yuʼun muʼyuk xachʼunbeik chaʼa?›.
26 Pe ‹Ta stojolal krixchanoetik›, mi xkutike, chakʼ xiʼel li epal krixchanoetike, yuʼun jaʼ jun j-alkʼop chilik li Juane».
27 Jech oxal xi la stakʼbeik li Jesuse: «Mu jnaʼkutik». Vaʼun xi takʼbatike: «Muʼyuk chkalboxuk bu la jta kabtel ek ti jech ta jpas li kʼusitik liʼe.
28 »¿Kʼu xachiik? Oy jun vinik ti oy chaʼvoʼ skereme. Bat skʼopon li baʼyele, xi laj yalbee: ‹Jkerem, bat abtejan avi li ta tsʼusubtike›.
29 Vaʼun xi la stakʼe: ‹Mu jkʼan xibat›, pe chopol laj yaʼi sba ta tsʼakal, jech oxal bat.
30 Bat skʼopon li xchaʼvoʼale, jaʼ noʼox jech laj yalbe xtok. Vaʼun xi la stakʼe: ‹Chibat, tot›, pe muʼyuk bu xbat.
31 ¿Bu junukal ta xchaʼvoʼalik ti la spasbeik li kʼusi tskʼan yoʼonton stotike?». Xi takʼavike: «Jaʼ li baʼyele». Vaʼun xi albatik yuʼun li Jesuse: «Ta melel chkalboxuk avaʼiik: jaʼ jbabe batel avuʼunik ta Ajvalilal yuʼun Dios li jtsobpatanetik xchiʼuk li jchonbail antsetike.*
32 Yuʼun tal ta atojolalik li Juan sventa chakʼ avilik li sbelel tukʼilale, pe muʼyuk bu xachʼunbeik. Pe li jtsobpatanetik xchiʼuk li jchonbail antsetike jaʼ la xchʼunik. Yan li voʼoxuke, akʼo mi jech laj avilik, muʼyuk bu chopol xavaʼi abaik ta tsʼakal sventa xachʼunbeik.
33 »Aʼiik yan lokʼolkʼop xtok: Oy jun vinik ti jaʼ yajval osile, la stsʼun tsʼusub, la sjoy ta koral, la sjom jun mukʼta chʼen sventa spitsʼobil li tsʼusube,* la svaʼan jun toyol kʼelob osil, vaʼun laj yakʼbe slokʼ* jtsʼunolajeletik, laje lokʼ batel ta nom.
34 Kʼalal sta xa yorail chtaʼaj li tsʼusube, la stak batel smosotak ti bu oy li jtsʼunolajeletik sventa stsobik tal li tsʼusube.
35 Pe li jtsʼunolajeletike la stsakbeik li smosotake, june la smajik, li june la smilik, li june laj yakʼbeik ton.
36 Jaʼ yuʼun la stak batel yan smosotak, mas xa ep la stak batel, jaʼ mu sta li ta baʼyele, pe jaʼ noʼox jech la spasbeik xtok.
37 Ta slajebal xa une la stak batel xnichʼon ta stojolalik xchiʼuk xi laj yale: ‹Jaʼ chichʼik ta mukʼ li jkereme›.
38 Xi laj yalbe sbaik li jtsʼunolajeletik kʼalal laj yilik li nichʼonile: ‹Leʼe jaʼ li buchʼu chichʼ komel kʼusitike. ¡Laʼik, bat jmiltik, vaʼun chkichʼbetik komel li kʼusitik chuʼunine!›.
39 Jech oxal la stsakik, la sjipik lokʼel li ta tsʼusubtike, vaʼun la smilik.
40 Jaʼ yuʼun, mi tal li yajval tsʼusube, ¿kʼusi van tspasbe li jtsʼunolajeletik taje?».
41 Xi laj yalbeik li Jesuse: «Chakʼ talel jtos xibal sba* lajelal ta skoj ti chopolike, xchiʼuk yan xa-o jtsʼunolajeletik chakʼbe slokʼ li tsʼusubtik yuʼune, jaʼ chakʼbe li buchʼutik ch-akʼbat li tsʼusub kʼalal mi taʼaje».
42 Xi albatik yuʼun li Jesuse: «¿Mi muʼyuk achanojik-o ta Tsʼibetik:* ‹Li ton ti la spʼajik li jvaʼanej naetike jaʼ li ton ta chikin na* ti mas tsots skʼoplal kʼoteme. Ta stojolal Jeova likem tal taje xchiʼuk labal sba chkiltik›?
43 Jaʼ yuʼun chkalboxuk avaʼiik ti chavichʼik pojbel li Ajvalilal yuʼun Diose, jaʼ chichʼ akʼbel li jteklum ti bu lek snaʼ xakʼ sate.
44 Jech xtok, lilijem chkom li buchʼu kajal chkʼot li ta sba ton taje. Yan li buchʼu chyal tal ta sbae pukuk* chkom ta jyalel».
45 Kʼalal laj yaʼiik li lokʼolkʼopetik laj yal Jesus li bankilal paleetik xchiʼuk li jfariseoetike, laj yakʼik venta ti jaʼ skʼoplalike.
46 Akʼo mi tskʼan chchukik, chakʼ xiʼel chaʼiik ta skoj li epal krixchanoetike, yuʼun jaʼ jun j-alkʼop chilik.
Tsʼibetik ta yok vun
^ Kʼelo glosario.
^ Kʼelo glosario.
^ Kʼelo glosario.
^ O: «laj yakʼbe xchʼamun».
^ O: «jtos chopol».
^ Kʼelo glosario.
^ Kʼelo glosario.
^ O: «polvo»; «tsʼubil lum»; «tan».
