Mateo 23:1-39
23 Vaʼun la skʼopon epal krixchanoetik li Jesuse xchiʼuk la skʼopon li yajchankʼoptake, xi laj yale:
2 «Chotolik ta xchotleb Moises li jchanubtasvanejetik ta Mantal xchiʼuk li jfariseoetike.
3 Jaʼ yuʼun chaʼa, pasik xchiʼuk chʼunik skotol li kʼusitik chalboxuke, pe mu me xachanik li kʼusitik tspasike, yuʼun jaʼ noʼox chalik, pe muʼyuk tspasik li kʼusitik chalike.
4 Tstsʼalbeik alal ikatsiletik xchiʼuk tskajanbeik ta snekeb li krixchanoetike, pe li stukike mi jaʼuk jsetʼ skʼan spik ta sniʼ skʼobik.
5 Skotol li kʼusitik tspasike jaʼ ta skoj ti tskʼan ch-ilatik yuʼun krixchanoetike, yuʼun li stukike tsmukʼibtasik li bikʼit kaxa* ti te tikʼil tsʼibetik ti tstunesik sventa xchabiatike, xchiʼuk tsnatubtas li stsitsimal skʼuʼ spokʼike.
6 Jaʼ kʼupil chaʼi ti te chchotiik ti bu mas tsotsik skʼoplal li ta jujun kʼine xchiʼuk jaʼ lek chaʼi chchotiik li ta sbacholal chotlebal ta nail tsobobbailetike
7 xchiʼuk lek xa chaʼiik ti chkʼoponatik ta chʼivite xchiʼuk ti kʼalal ‹Rabi›,* x-utatik yuʼun li krixchanoetike.
8 Pe mu me ‹Rabi›, xa-utatik li voʼoxuke, yuʼun jun noʼox li Jchanubtasvanej avuʼunike, yan li voʼoxuke avermano aba akotolik.
9 Jech xtok, mu me buchʼu ‹tot›, xavutik liʼ ta sba balumile, yuʼun jun noʼox li Totil avuʼunike, jaʼ li Buchʼu te oy ta vinajele.
10 Mu me ‹jnitvanej› xa-utatik xtok, yuʼun jun noʼox li Jnitvanej avuʼunike, jaʼ li Kristoe.
11 Pe li buchʼu mas mukʼ skʼoplal avuʼunike skʼan xkʼot ta avajtunelik.
12 Li buchʼu tstoy sbae chichʼ bikʼtajesbel skʼoplal, yan li buchʼu bikʼit chakʼ sbae chichʼ toybel skʼoplal.
13 »¡Toj abol abaik jchanubtasvanejetik ta Mantal xchiʼuk jfariseoetik ti jloʼlavanejoxuke!, yuʼun chamakik ta be li krixchanoetik ta stojolal li Ajvalilal ta vinajele, yuʼun mi jaʼuk cha-ochik li voʼoxuke xchiʼuk mi jaʼuk xavakʼik x-och ek li yantik ti yakal ch-ochike.
14 *——
15 »¡Toj abol abaik, jchanubtasvanejetik ta Mantal xchiʼuk jfariseoetik ti jloʼlavanejoxuke!, yuʼun chatuchʼik nab xchiʼuk toj nom chaxanavik sventa chasaʼ junuk achʼ jchʼunolajel* avuʼunik, vaʼun kʼalal mi la ataik junuke sta-o xbat chib velta ta Jeena* avuʼunik, ti jaʼ mu sta li voʼoxuke.
16 »Toj abol abaik, maʼsat jbeiltasvanejetik ti xi chavalike: ‹Muʼyuk kʼusi sbalil mi oy buchʼu chakʼ ye ta stojolal temploe; pe mi oy buchʼu chakʼ ye ta stojolal li oro ta temploe skʼan me spas li kʼusi laj yale›.
17 ¡Bol* krixchanoetik xchiʼuk maʼsatetik! ¿Kʼusi ti mas tsots skʼoplale chaʼa, mi jaʼ li oroe o mi jaʼ li templo ti xchʼultajesoj li oroe?
18 Xi chavalik xtoke: ‹Muʼyuk kʼusi sbalil mi oy buchʼu chakʼ ye ta stojolal li skajleb matanale, pe mi oy buchʼu chakʼ ye ta stojolal li matanal te kajale skʼan me spas li kʼusi laj yale›.
19 ¡Maʼsatetik! ¿Kʼusi ti mas tsots skʼoplale chaʼa, mi jaʼ li matanale o mi jaʼ li skajleb matanal ti xchʼultajesoj li matanale?
20 Jaʼ yuʼun chaʼa, li buchʼu chakʼ ye ta stojolal skajleb matanale jaʼ chakʼ ye ta stojolal taje xchiʼuk ta stojolal li kʼusitik te kajale,
21 xchiʼuk li buchʼu chakʼ ye ta stojolal temploe jaʼ chakʼ ye ta stojolal taje xchiʼuk ta stojolal li Buchʼu te nakale,
22 xchiʼuk li buchʼu chakʼ ye ta stojolal vinajele chakʼ ye ta stojolal li chotlebal sventa ajvalilal yuʼun Diose xchiʼuk ta stojolal ti Buchʼu te chotole.
23 »¡Toj abol abaik, jchanubtasvanejetik ta Mantal xchiʼuk jfariseoetik ti jloʼlavanejoxuke!, yuʼun chavakʼik li diesmo* ta sventa alavena,* inojo xchiʼuk kominoe, pe jaʼ muʼyuk yakaloxuk spasel li kʼusitik mas tsots skʼoplal ta Mantale, jaʼ xkaltik, li tukʼilale, li xkʼuxul oʼontonale xchiʼuk li xchʼunel oʼontonale. Persa onoʼox skʼan pasel maʼ taje, pe maʼuk skʼan xal ti jaʼ muʼyuk xa bu chapasik li yan kʼusitike.
24 ¡Maʼsat jbeiltasvanejetik, chachijik li bikʼtal use pe jaʼ chabikʼik skotlej li kameyoe!
25 »¡Toj abol abaik, jchanubtasvanejetik ta Mantal xchiʼuk jfariseoetik ti jloʼlavanejoxuke!, yuʼun chapokbeik lek li spat xokon kopa xchiʼuk platoe, pe li yute nojem ta elekʼ xchiʼuk nojem ta kʼusitik ti muʼyuk spajebal ta pasele.
26 Maʼsat jfariseo, jaʼ lek sukʼbo baʼyel li yut kopa xchiʼuk plato sventa sakub* ek li spat xokone.
27 »¡Toj abol abaik, jchanubtasvanejetik ta Mantal xchiʼuk jfariseoetik ti jloʼlavanejoxuke!, yuʼun xakoʼolajik kʼuchaʼal mukinal ti bonbil ta sake, ti toj kʼupil xa sba yilel li ta spat xokone, pe li ta yute nojem ta sbakil animaetik xchiʼuk ta kʼusitik ibal sba.
28 Jaʼ jechoxuk ek li voʼoxuke, li ta apat axokonike tukʼoxuk xa yilel ta stojolal li krixchanoetike, pe li avoʼontonike noj ta loʼlavanej xchiʼuk ta spasel choplejal.
29 »¡Toj abol abaik, jchanubtasvanejetik ta Mantal xchiʼuk jfariseoetik ti jloʼlavanejoxuke!, yuʼun chavaʼanbeik smukinal li j-alkʼopetike xchiʼuk chakʼupiltasbeik li smukinal buchʼutik chamemik ti tukʼ echʼike,
30 xchiʼuk xi chavalike: ‹Ti oyukutik xaʼox li ta skʼakʼalil jmoltotaktik ta voʼnee muʼyuk bu la jtikʼ jbatik ta smilel jechuk li j-alkʼopetike›.
31 Ti jech chavalike chavinajes aba atukik ti jaʼ xnichʼnaboxuk li buchʼutik la smilik li j-alkʼopetike.
32 Jaʼ yuʼun chaʼa, tsʼakubtasbeik me li yabteltak amoltotakik ta voʼnee.
33 »Chonetik,* stsʼunbaltak chon ti oy svenenoale, ¿kʼuxi xa noʼox chajatavik li ta Jeena kʼalal mi laj avichʼik chapanele?
34 Jaʼ yuʼun chaʼa, ta jtak tal j-alkʼopetik ta atojolalik, pʼijil viniketik xchiʼuk jchanubtasvanejetik. Jlome chamilik, jlome chajokʼanik ta jtel teʼ, jlome chatsitsik ta snailtak atsobobbailik xchiʼuk li jlome chakontrainik ta jujun jteklum,
35 sventa xkom ta abaik skotol li buchʼutik malem xchʼichʼelik ta sba balumil ti tukʼ echʼike, ti te chlik tal ta xchʼichʼel li tukʼil Abel kʼalal to ta xchʼichʼel Sakarias ti jaʼ xnichʼon Barakiase, ti voʼoxuk te la amilik ta yeloval templo, ta stsʼel skajleb matanale.
36 Ta melel chkalboxuk avaʼiik, skotol li kʼusitik taje jaʼ chkʼot ta stojolal li jkʼol kuxlejal liʼe.
37 »Jerusalen, Jerusalen, ti jaʼ li jmilvanej yuʼun j-alkʼopetike xchiʼuk ti chakʼbe ton li buchʼutik chichʼ takbel batel ta stojolale..., ¡ep ta velta la jkʼan la jtsob avalab jech kʼuchaʼal tstsob ta yolon xikʼ yalab li meʼ alakʼe!* Pe muʼyuk bu xakʼanik li voʼoxuke.
38 ¡Kʼelo avilik! Iktabil chkom li anaike.
39 Yuʼun chkalboxuk avaʼiik ti mi jaʼuk onoʼox bu chavilikun-o jaʼ to mi xi laj avalike: ‹¡Akʼo sta bendision ta sbi Jeova li buchʼu chtale!›».
Tsʼibetik ta yok vun
^ Jaʼ jun bikʼit kaxa ti te tikʼbil chantuchʼ kʼusi albil ta Mantale, ti te chakʼ ta stibaik li juda viniketik xchiʼuk ta stsʼetkʼobik sventa xchabiatike.
^ Jaʼ jun biil ti ichʼbil ta mukʼ ti jaʼ jech ch-albat li jun jchanubtasvanej juda vinike.
^ Muʼyuk te chvinaj ta jlom voʼneal vunetik li versikulo liʼe, yuʼun muʼyuk te li ta Tsʼibetik laj yakʼ ta naʼel Diose.
^ Jaʼ li buchʼutik ochemik xa ta srelijion judaetike.
^ Jaʼ ti bu chchikʼik kʼaʼep ta spat Jerusalene. Kʼelo glosario.
^ O: «Sonso».
^ Kʼelo glosario.
^ O: «tulnichim»; «tuilnichim»; «tunichim»; «yaraveno».
^ Kʼelo glosario.
^ O: «kiletel chonetik».
^ O: «meʼ kaxlane»; «meʼ mute».
