Mateo 25:1-46
25 »Jech xtok, li Ajvalilal ta vinajele xuʼ xichʼ koʼoltasel kʼuchaʼal lajunvoʼ tojol tsebetik ti la stsak batel skantilik sventa chbat snupik ta be li jnupunele.
2 Oy voʼob ti bolike* xchiʼuk oy voʼob ti pʼijike.
3 Li buchʼutik bolike laj yichʼ batel skantilik, pe muʼyuk bu xichʼ batel yaseiteik,
4 yan li buchʼutik pʼijike la xchʼol batel yaseiteik ta yavil xchiʼuk laj yichʼ batel skantilik.
5 Ta skoj ti jalij li jnupunele, lik nikavikuk skotolik, jech oxal och svayelik.
6 Xi tsots laj yichʼ alel ta mero oʼlol akʼobale: ‹¡Liʼ xa me oy li jnupunel kereme! Bat nupik tal ta be›.
7 Jech oxal, lik skotolik li tojol tsebetike xchiʼuk la xchapan li skantilike.
8 Li buchʼutik bolike xi laj yalbeik li buchʼutik pʼijike: ‹Akʼbunkutik jutebuk li avaseiteike yuʼun chtupʼ xa li jkantilkutike›.
9 Xi takʼavik li buchʼutik pʼijike: ‹Xuʼ van mu xlokʼ-o kuʼunkutik ek. Jaʼ lek batanik yoʼ bu chchonike, bat manik tal kʼuk yepal avuʼun atukik›.
10 Kʼalal jaʼo batemik ta smanele, jaʼo vul li jnupunel kereme, vaʼun koʼol och xchiʼukik li ta skʼinal nupunel li tojol tsebetik ti chapalik xa onoʼoxe; te une laj yichʼ makel li tiʼ nae.
11 Vaʼun talik li yan tojol tsebetike xchiʼuk xi laj yalike: ‹¡Bankilal, Bankilal, jambunkutik li tiʼ nae!›.
12 Xi la stakʼe: ‹Jamal chkalboxuk avaʼiik: mu xakojtikinik›.
13 »Vikʼiluk me asatik chaʼa, yuʼun mu xanabeik li skʼakʼalile xchiʼuk mi jaʼuk li yoraile.
14 »Yuʼun taje jaʼ jech kʼuchaʼal jun vinik ti poʼot xa xbat ta nome, ti la stak ta ikʼel li smosotak sventa chakʼbe sbain li kʼusitik oy yuʼune.
15 Li june laj yakʼbe voʼob talento,* li june chib, li yane laj yakʼbe jun, jaʼ ti kʼu yelan xtojob ta jujuntal laj yile, vaʼun bat ta nom.
16 Vaʼun li buchʼu laj yichʼ voʼob talentoe, ta anil noʼox bat yabtelan, jech oxal voʼob talento jolin yuʼun.
17 Jaʼ jech ek li buchʼu laj yichʼ chibe, chib jolin yuʼun ek.
18 Yan li mosoil ti jun noʼox laj yichʼe lokʼ batel, bat sjokʼbe xchʼenal sventa tsmukbe stakʼin* li yajvale.
19 »Kʼalal voʼne xaʼox sbatele, tal li yajval mosoiletike, vaʼun lik yichʼ ta venta kʼu yepal li stakʼine.
20 Vaʼun te tal li buchʼu laj yichʼ voʼob talentoe xchiʼuk laj yichʼbe tal li voʼob talento sjole, xi laj yale: ‹Kajval, laj avakʼ jbain voʼob talento, pe kʼelo avil, jolin voʼob talento kuʼun›.
21 Xi albat yuʼun li yajvale: ‹¡Lek ti jech la apase lekil tukʼil mosoil! Tukʼ la aventain ti kʼusi juteb laj kakʼbot aventain komele. Jaʼ yuʼun ta jvaʼanot sventa mas ep kʼusitik chabain. Kuxetuk noʼox avoʼonton* xchiʼuk li avajvale›.
22 Te une, te tal li buchʼu laj yichʼ chib talentoe xchiʼuk xi laj yale: ‹Kajval, laj avakʼ jbain chib talento, pe kʼelo avil, jolin chib talento kuʼun›.
23 Xi albat yuʼun li yajvale: ‹¡Lek ti jech la apase lekil tukʼil mosoil! Tukʼ la aventain ti kʼusi juteb laj kakʼbot aventain komele. Jaʼ yuʼun ta jvaʼanot sventa mas ep kʼusitik chabain. Kuxetuk noʼox avoʼonton xchiʼuk li avajvale›.
24 »Laj une te tal li mosoil ti laj yichʼ jun talentoe xchiʼuk xi laj yale: ‹Kajval, jnaʼoj ti tsots xanaʼ xapasvan ta mantale, ti chatsobbe sat li kʼusi mu voʼotuk la atsʼune xchiʼuk ti chatsobbe sat li kʼusi mu voʼotuk laj avabtelane.
25 Jech oxal lixiʼ, vaʼun libat xchiʼuk la jmuk ta lum li atalentoe. Ilo li atakʼine›.
26 Xi takʼbat yuʼun li yajvale: ‹Toj chopolot xchiʼuk chʼajil mosoilot, yuʼun anaʼoj onoʼox ti ta jtsobbe sat li kʼusi mu voʼonuk la jtsʼune xchiʼuk ti ta jtsobbe sat li kʼusi mu voʼonuk laj kabtelane.
27 Mi jeche chaʼa, la atikʼ ta vanko jechuk li jtakʼine, vaʼun kʼalal mi litale chkichʼ sutel xchiʼuk sjol jechuk li jtakʼine.
28 »›Jaʼ yuʼun pojbeik li talentoe, jaʼ akʼbeik li buchʼu yichʼoj lajuneb talentoe.
29 Yuʼun skotol li buchʼu oy yuʼune ta to x-akʼbat mas, vaʼun mas to ch-epaj yuʼun; yan li buchʼu chʼabal yuʼune ta xpojbat sutel ti kʼu yepal oy yuʼune.
30 Jaʼ yuʼun bat jipik lokʼel ta ikʼal osil ta pana li mosoil ti mu kʼusi xtun-oe. Jaʼ te ti bu ch-okʼ xchiʼuk ti chkʼux stanal* yee›.
31 »Kʼalal mi la stsak tsots yabtel li Xnichʼon krixchanoe xchiʼuk ti te xchiʼuk skotol li yaj-anjeltake, ta xchoti li ta chotlebal sventa ajvalilal ti jun yutsile.
32 Te une chichʼ tsobel tal skotol jteklumetik ta stojolal, vaʼun chchʼak li krixchanoetik jech kʼuchaʼal chchʼak lokʼel xchij ta stojolal tentsunetik li jchabichije.
33 Vaʼun ta sbatsʼikʼob chakʼ li chijetike, yan li tentsunetike ta stsʼetkʼob.
34 »Vaʼun xi ch-albatik yuʼun Ajvalil li buchʼutik te oyik ta sbatsʼikʼobe: ‹Laʼik li voʼoxuk ti akʼbiloxuk bendision yuʼun Jtote, laʼ uʼuninik li Ajvalilal ti chapanbil xa onoʼox ta aventaik kʼalal lik tal stsʼunbal krixchanoetike.
35 Yuʼun kʼalal liviʼnaje laj avakʼbeikun jveʼel; kʼalal laj kaʼi takitiʼile laj avakʼbeikun voʼ kuchʼ. Kʼalal j-echʼelbeune laj avikʼikun ochel ta anaik;
36 kʼalal tʼanalune* laj avakʼbeikun jkʼuʼ jpokʼ. Kʼalal li-ipaje la achabiikun. Kʼalal li-och ta chukele ay avulaʼanikun›.
37 Vaʼun xi tstakʼik li buchʼutik tukʼike: ‹Kajval, ¿bakʼin laj kilotkutik laviʼnaj ti laj kakʼbotkutik aveʼele, xchiʼuk bakʼin laj avaʼi takitiʼil ti laj kakʼbotkutik voʼ avuchʼe?
38 ¿Bakʼin ti j-echʼelbeot laj kilotkutik ti laj kikʼotkutik ochel ta jnakutike o bakʼin ti tʼanalot laj kilotkutik ti laj kakʼbotkutik akʼuʼ apokʼe?
39 ¿Bakʼin ti ipot laj kilotkutik o ti tikʼilot ta chukel xchiʼuk ti ay jvulaʼanotkutike?›.
40 Vaʼun xi chtakʼbatik yuʼun li Ajvalile: ‹Ta melel chkalboxuk avaʼiik: ti kʼusi la apasbeik junuk li buchʼu mas bikʼit skʼoplal li kermanotak liʼe, voʼon la apasbeikun›.
41 »Vaʼun xi ch-albatik li buchʼutik te oyik ta stsʼetkʼobe: ‹Lokʼanik batel ta jtojolal, voʼoxuk ti toj chopoloxuke, batanik ta kʼokʼ sbatel osil ti chapanbil sventa li Diablo xchiʼuk yaj-anjeltake.
42 Yuʼun kʼalal liviʼnaje muʼyuk bu laj avakʼbeikun jveʼel xchiʼuk kʼalal laj kaʼi takitiʼile muʼyuk bu laj avakʼbeikun voʼ kuchʼ.
43 Kʼalal j-echʼelbeune muʼyuk bu laj avikʼikun ochel ta anaik; kʼalal tʼanalune muʼyuk bu laj avakʼbeikun jkʼuʼ jpokʼ; kʼalal li-ipaj xchiʼuk kʼalal li-och ta chukele muʼyuk bu ay akʼelikun›.
44 Vaʼun xi tstakʼik eke: ‹Kajval, ¿bakʼin laj kilotkutik laviʼnaj, laj avaʼi takitiʼil, ti j-echʼelbeot, ti tʼanalot, ti ipot o ti tikʼilot ta chukel ti muʼyuk bu la jkoltaotkutike?›.
45 Vaʼun xi chtakʼbatike: ‹Ta melel chkalboxuk avaʼiik, ti kʼusi muʼyuk bu la apasbeik junuk li buchʼu mas bikʼit skʼoplalik liʼe, voʼon muʼyuk bu la apasbeikun›.
46 Taje chtuchʼbat skʼoplalik sbatel osil, yan li buchʼutik tukʼike tsta xkuxlejalik sbatel osil».
Tsʼibetik ta yok vun
^ O: «sonsoike».
^ Li jun talento tstunes jgresiaetike jaʼ 20.4 kilo yalal. Kʼelo glosario.
^ S.gr.: «splata».
^ O: «Pʼijuk noʼox avoʼn»; «Nichimuk noʼox avoʼonton».
^ O: «sbakil».
^ O: «jutuk noʼox jlapoj jkʼuʼ jpokʼe».
