Mateo 28:1-20
28 Kʼalal echʼ xaʼox li Savadoe, kʼalal tsakub xaʼox osil li ta sba kʼakʼal ta xemanae, tal skʼelik mukinal li Maria Magdalena xchiʼuk li yan Mariae.
2 ¡Kʼelo avil un!, echʼ jun tsatsal nikel, yuʼun yal tal ta vinajel li yaj-anjel Jeovae xchiʼuk nopaj batel, la stselelin* lokʼel li tone xchiʼuk te choti ta sba.
3 Li spat xokone xleblajet xojobal jech kʼuchaʼal saksevul, li skʼuʼ spokʼe sak tajek jech kʼuchaʼal taiv.
4 Jech, ta skoj ti xiʼik tajek ta stojolale xtʼelajet komik xchiʼuk chamem komik yilel li jchabivanejetike.
5 Pe xi albatik yuʼun anjel li antsetike: «Mu xaxiʼik, yuʼun jnaʼoj ti jaʼ chasaʼik li Jesus ti laj yichʼ milel ta jtel teʼe.
6 Muʼyuk xa liʼ oye, yuʼun chaʼkuxiem xa jech onoʼox kʼuchaʼal laj yale. Laʼik, kʼelo avilik ti bu toʼox telele.
7 Vaʼun batanik ta anil xchiʼuk albeik yajchankʼoptak ti laj xa yichʼ chaʼkuxesele, yuʼun ¡kʼelo avilik!, jelavem batel avuʼunik ta Galilea; te chavilik. ¡Kʼelo avilik! Taje jaʼ li kʼusi tal kalboxuke».
8 Jaʼ yuʼun lokʼik batel ta anil li ta mukinale, akʼo mi chiʼik tajek, xkuxet tajek yoʼontonik,* bat yalbeik ta anil li yajchankʼoptake.
9 Xchiʼuk ¡kʼelo avil!, te laj yakʼ sba ta ilel Jesus ta stojolalik xchiʼuk xi albatike: «¿Bu chabatik?». Nopajik batel ta stojolal, la stsakbeik yok xchiʼuk laj yichʼik ta mukʼ.*
10 Vaʼun xi albatik yuʼun li Jesuse: «¡Mu xaxiʼik! Batanik, bat albeik kermanotak ti akʼo xbatik ta Galileae, vaʼun te chilikun».
11 Kʼalal jaʼo stamoj batel sbeike, bat ta jteklum jlom jchabivanejetik, vaʼun laj yalbeik bankilal paleetik skotol li kʼusitik kʼot ta pasele.
12 Kʼalal laj xaʼox stsob sbaik xchiʼuk moletik li bankilal paleetik xchiʼuk ti la skomon nop skʼopike, laj yakʼbeik batel ep ta sep plata li soltaroetike
13 xchiʼuk xi laj yalbeike: «Xi xavalike: ‹Ay ta akʼobaltik li yajchankʼoptake, vaʼun laj yelkʼanik batel kʼalal jaʼo chivaykutike›.
14 Mi kʼot ta xchikin ajvalile voʼonkutik ta jchapbekutik smelolal* taje, vaʼun muʼyuk kʼusi chavat-o avoʼontonik».
15 Jaʼ yuʼun la stsakik li jaysep platae xchiʼuk jaʼ jech la spasik ti kʼu yelan albatike; li loʼil taje pukem batel skʼoplal ta stojolal judaetik kʼalal to li avie.
16 Pe li buluchib jchankʼopetike batik ta Galilea, jaʼ li vits ti bu onoʼox albilik yuʼun Jesus ti te tsta sbaike.
17 Laj yichʼik ta mukʼ kʼalal laj yilike, pe li jlome muʼyuk bu la xchʼunik lek mi jaʼ.
18 Nopaj batel ta stojolalik li Jesuse xchiʼuk xi albatike: «Akʼbil jventain skotol li kʼusitik ta vinajel xchiʼuk ta sba balumile.
19 Jaʼ yuʼun chaʼa, batanik, bat pasik ta jchankʼop li krixchanoetik ta skotol jteklumetike, akʼbeik yichʼ voʼ ta sbi Totil, Nichʼonil xchiʼuk chʼul espiritu,
20 chanubtasik ta xchʼunel skotol li kʼusitik laj kalboxuke. Xchiʼuk ¡kʼelo avilik!, te ta jchiʼinoxuk-o skotol kʼakʼal jaʼ to kʼalal poʼot xa xlaj skotol li kʼusitik oy ta balumile».*
Tsʼibetik ta yok vun
^ O: «setetin»; «xbalchʼun».
^ O: «echʼem pʼij yoʼnik»; «nichim noʼox yoʼontonik».
^ O: «la skejan sbaik». Li ta voʼnee jaʼ senyail ti ch-ichʼvan ta venta li jun krixchanoe.
^ O: «chkakʼbekutik xchʼun».
^ Kʼelo glosario.
