Mateo 3:1-17
3 Li vaʼ kʼakʼale, yakal chchol mantal ta takixokol balumil ta Judea li Juan J-akʼ-ichʼvoʼe,
2 xi chalilane: «Suteso avoʼontonik,* yuʼun nopajem xa tal li Ajvalilal ta vinajele».
3 Taje xi onoʼox albil skʼoplal ta stojolal li j-alkʼop Isaiase: «Oy buchʼu xi tsots ch-avan ta takixokol balumile: ‹¡Chapanbeik li sbe Jeovae!, tukʼibtasbeik li sbee›».
4 Slapoj tsotsil kameyo li Juane xchiʼuk nukul li xchuk xchʼute; kʼulub* tstiʼ xchiʼuk teʼtikal pom tsloʼ.
5 Vaʼun, bat skʼelik Juan li buchʼutik te ta Jerusalen, ta Judea xchiʼuk li ta yantik jteklum ta spat xokon Jordane,
6 akʼbat yichʼik voʼ* ta Ukʼum Jordan xchiʼuk jamal laj yal li smulike.
7 Kʼalal la sta ta ilel ti ep jfariseoetik* xchiʼuk jsaduseoetik* chnopajik tal ti bu chichʼ ichʼel voʼe, xi laj yalanbee: «Stsʼunbaltak veneno chon,* ¿buchʼu la spʼijubtasoxuk sventa xajatavik li ta skʼakʼal oʼontonal chtale?
8 Jaʼ yuʼun chaʼa, akʼo vinajuk ta avabtelik ti asutesoj avoʼontonik ta melele.
9 Mu me xiuk xanop ta avoʼontonike: ‹Jaʼ jtotkutik li Abraane›. Yuʼun chkalboxuk avaʼiik, mi jech oy ta yoʼonton Diose xuʼ me skʼatajesbe ta xnichʼnab Abraan li tonetik liʼe.
10 Ta melel, te xa metsel ta yibel teʼetik li ekʼele; jaʼ yuʼun chichʼ tsʼetel skotol li teʼ ti mu xakʼ lek sate xchiʼuk chichʼ jipel ochel ta kʼokʼ.
11 Li voʼone chkakʼ avichʼik voʼ ta skoj ti asutesoj avoʼontonike; yan li buchʼu tsʼakal chtal kuʼune jaʼ mas tsots yabtel, mu jta-o ta jlokʼbe xonob. Li stuke chakʼ avichʼik chʼul espiritu xchiʼuk chakʼ avichʼik kʼokʼ.
12 Te xa stsakoj ta skʼob li yikʼaobil* trigoe xchiʼuk tsmesbe lek li yavil bu chichʼ ikʼaele,* ta skʼej ta snail li strigo laj yikʼae, yan li spate* ta xchikʼbe ta kʼokʼ ti bu mu xtupʼe».
13 Vaʼun lik tal ta Galilea li Jesuse, bat ta Jordan sventa ch-akʼbat yichʼ voʼ yuʼun li Juane.
14 Pe li Juane tskʼan ox tspajes, xi laj yalbee: «Voʼon chavakʼbun kichʼ voʼ ti jechuke, ¿mi jech smelolal ti voʼot chatal ta jtojolale?».
15 Vaʼun xi takʼbat yuʼun li Jesuse: «Mu xapajesun, yuʼun jaʼ jech skʼan jpastik lek skotol li kʼusitik tukʼe». Vaʼun muʼyuk xa bu la spajes.
16 Kʼalal laj xaʼox yichʼ voʼ li Jesuse ta ora noʼox lokʼ li ta voʼe, ¡kʼelo avil!, jam li vinajele, te laj yil yal tal xchʼul espiritu Dios ti xkoʼolaj kʼuchaʼal palomae.
17 ¡Kʼelo avil! Laj yichʼ aʼiel yechʼomal eil ta vinajel xtok ti xi chale: «Liʼe jaʼ Jnichʼon, jaʼ li buchʼu jkʼanoje, jaʼ li buchʼu ximuyubaj* yuʼune».
Tsʼibetik ta yok vun
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ O: «kiletel chon».
^ O: «sjikʼaobil».
^ Kʼelo glosario.
^ Kʼelo glosario.
^ O: «pʼij koʼn»; «nichim koʼonton».
