Mateo 4:1-25
4 Vaʼun, li Jesuse ikʼat batel yuʼun chʼul espiritu ta takixokol balumil sventa ch-akʼat ta preva yuʼun li Diabloe.*
2 Kʼalal 40 kʼakʼal xchiʼuk 40 akʼobal xaʼox spasoj ayunoe,* viʼnaj.
3 Vaʼun nopaj talel li J-akʼvanej ta prevae xchiʼuk xi laj yalbee: «Mi jaʼ xnichʼonot Diose, albo ti akʼo xkʼataj ta pan* li tonetik liʼe».
4 Pe xi la stakʼe: «Xi tsʼibabile: ‹Maʼuk noʼox ta pan kuxul li krixchanoe, yuʼun jaʼ kuxul-o skotol li kʼusitik chlokʼ ta ye Jeovae›».
5 Vaʼun li Diabloe laj yikʼ batel ta chʼul jteklum xchiʼuk te la svaʼan ta jol templo* ti bu toyole,
6 xi laj yalbee: «Mi jaʼ xnichʼonot Diose, jipo aba yalel, yuʼun xi tsʼibabile: ‹Ta stak talel yaj-anjeltak ta atojolal› xchiʼuk ‹Chaxchʼamik batel ta skʼobik sventa mu xamaj avok ta ton›».
7 Xi laj yal li Jesuse: «Xi tsʼibabil xtoke: ‹Mu stakʼ xapas ta preva li Jeova Dios avuʼune›».
8 Li Diabloe laj yikʼ batel xtok ta jpʼej mukʼta toyol vits, vaʼun laj yakʼbe yil skotol li mukʼtik lumetik ta balumile xchiʼuk li yutsilalike,
9 xchiʼuk xi laj yalbee: «Skotol li kʼusitik liʼe chkakʼbot mi chakejan aba sventa chavichʼun ta mukʼ junuk veltae».
10 Vaʼun xi laj yal li Jesuse: «¡Batan Satanas!* Yuʼun xi tsʼibabile: ‹Jaʼ noʼox skʼan xavichʼ ta mukʼ li Jeova Dios avuʼune xchiʼuk jaʼ noʼox stuk skʼan xapasbe xchʼul abtel›».*
11 Laj une iktaat komel yuʼun li Diabloe, ¡kʼelo avil!, tal anjeletik sventa tskoltaik li Jesuse.
12 Te une, kʼalal laj yaʼi ti laj yichʼ chukel li Juane bat ta Galilea.
13 Jech xtok, kʼalal lokʼ xaʼox ta Nasarete, te tal ta naklej ta Kapernaum ta tiʼ nab ta yosilal Sabulon xchiʼuk Neftali
14 sventa xkʼot ta pasel li kʼusi xi albat j-alkʼop Isaiase:
15 «¡Yosilal Sabulon xchiʼuk yosilal Neftali te ta sbelel nab ta jot Ukʼum Jordan, Galilea yuʼun jyanlumetik!
16 Laj yilik mukʼta sakil osil li jteklum ti oyik ta ikʼal osile, jech xtok laj yilik sakil osil li buchʼutik te oyik ta ikʼal osil ti xkoʼolaj kʼuchaʼal snakʼobal lajelale».
17 Li vaʼ kʼakʼale jaʼo lik xchol mantal li Jesuse, xi laj yale: «Suteso avoʼontonik, yuʼun li Ajvalilal ta vinajele nopajem xa tal».
18 Kʼalal yakal chanav batel ta tiʼ Nab Galileae te laj yil chaʼvoʼ vinik ti sbankil yitsʼin sbaike, jaʼ li Simon ti Pedro sbi xtoke xchiʼuk li Andrese, yakal ta stikʼ yalel snutiʼik sventa tsakob choy ta yut nab, yuʼun jtsakchoyetik.
19 Vaʼun xi laj yale: «Laʼ tsʼakliikun, vaʼun krixchanoetik xa chatsakik kuʼun jech kʼuchaʼal chatsakik choye».
20 Laj yiktaik ta anil li snutiʼik sventa tsakob choye, vaʼun la stsʼakliik batel.
21 Kʼalal echʼ batele te laj yil chaʼvoʼ vinik xtok ti sbankil yitsʼin sbaike, jaʼ li Santiago xchiʼuk Juan ti jaʼ xnichʼnab Sebedeoe, te tikʼilik ta varko* xchiʼuk stotik yuʼun yakal ta stsʼis snutiʼik venta tsakob choy, vaʼun ikʼatik ek.
22 Laj yiktaik ta anil li svarkoik xchiʼuk li stotike, vaʼun la stsʼakliik batel.
23 Xanav ta sjunul Galilea, chanubtasvan li ta snailtak stsobobbailike,* la xchol li lekil aʼyejetik* sventa Ajvalilale, la xpoxta li buchʼutik oy kʼusi kʼux chaʼiike xchiʼuk li buchʼutik muʼyuk lekik ta jteklume.
24 Vaʼun puk batel skʼoplal ta sjunul slumal Siria,* jaʼ yuʼun laj yikʼbeik batel skotol li buchʼutik chil svokolik ta skoj xchamelik xchiʼuk ti oy kʼusi toj kʼux chaʼiike, li buchʼutik uʼuninbilik yuʼun pukujetike,* li buchʼutik ipik ta tupʼ-ikʼe xchiʼuk li buchʼutik alubem yok skʼobike; vaʼun la xpoxtaan.
25 Jech oxal, ep krixchanoetik la stsʼakliik batel ti likemik ta Galilea, ta Dekapolis,* ta Jerusalen, ta Judea xchiʼuk kʼalal to ta jot Ukʼum Jordan.
Tsʼibetik ta yok vun
^ Kʼelo glosario.
^ O: «yiktaoj sveʼele»; «yiktaoj yixime»; «yiktaoj yote»; «xtuchʼoj xchʼute». Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ O: «kanova».
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
