Mateo 6:1-34
6 »Kʼelo me abaik sventa mu jaʼuk-o xapasik kʼusi tukʼ ta sat li krixchanoetik sventa xiloxuke; yuʼun mi jech chapasike, muʼyuk me chataik li matanal chakʼ Atotik ta vinajele.
2 Jaʼ yuʼun chaʼa, kʼalal ta xkʼuxul avoʼonton chavakʼik matanale* mu me baʼyeluk xajupan avokʼesik* kʼuchaʼal tspas li buchʼutik te ta nail tsobobbailetik xchiʼuk ta kayeetik ti chloʼlavanike, sventa jech x-albat yutsilalik yuʼun li krixchanoetike. Ta melel chkalboxuk avaʼiik ti lek xa tsʼakal staoj smotonike.
3 Pe kʼalal ta xkʼuxul avoʼonton chavakʼ matanaletik li voʼote, skʼan me mu snaʼ atsʼetkʼob li kʼusi tspas abatsʼikʼobe,
4 sventa mukul skʼoplal xkom li matanaletik chavakʼ ta xkʼuxul avoʼontone. Vaʼun jaʼ tstojbot li Atot ti yiloj skotole.
5 »Kʼalal chapasik orasion xtoke, mu me jechuk xapasik kʼuchaʼal tspas li jloʼlavanejetike; yuʼun jaʼ xa lek chaʼiik ti vaʼal tspasik orasion ta nail tsobobbailetik xchiʼuk ta xchikin mukʼtik kaye yoʼ x-ilatik yuʼun li krixchanoetike. Ta melel chkalboxuk avaʼiik ti lek xa tsʼakal staoj smotonike.
6 Pe kʼalal chapas orasion voʼote, ochan ta akuarto ti bu atuk oyote, mi laj xaʼox amakbe li stiʼe, kʼopono li Atot ti mu xvinaj bu oye. Vaʼun jaʼ tstojbot li Atot ti yiloj skotole.
7 Kʼalal chapas orasione mu me xachaʼalilan li kʼusi avaloj xa kʼuchaʼal tspas li jyanlumetike, yuʼun tsnopik ti jaʼ to jech ch-aʼibat skʼopik kʼalal ep ta velta chalike.
8 Jech un chaʼa, mu me jechuk xapasik jech kʼuchaʼal li stukike, yuʼun li Atotike snaʼoj xa onoʼox li kʼusi chtun avuʼunik kʼalal muʼyuk to akʼanojbeike.
9 »Jech oxal chaʼa, xi me yelan skʼan xapasik orasione:
»‹Jtotik ta vinajel, akʼo yichʼ chʼultajesel* li abie.
10 Akʼo taluk li Ajvalilal avuʼune. Akʼo kʼotuk ta pasel avuʼun li kʼusi tskʼan avoʼonton ta sba balumil jech kʼuchaʼal ta vinajele.
11 Akʼbun jpankutik* ta sventa li avi kʼakʼale
12 xchiʼuk pasbunkutik perton kilkutik jech kʼuchaʼal ta jpasbekutik perton ek li buchʼutik oy yil kuʼunkutike.
13 Jech xtok, mu me xavakʼunkutik ta preva, moʼoj, koltaunkutik sventa mu xi-ochkutik ta skʼob li buchʼu toj chopole›.*
14 »Yuʼun mi chapasbeik perton smul li krixchanoetike jaʼ jech ta spasboxuk perton amulik ek li Atotik ta vinajele;
15 pe mi muʼyuk chapasbeik perton smul li krixchanoetike jaʼ jech muʼyuk tspasboxuk perton amulik ek li Atotik ta vinajele.
16 »Kʼalal chapasik ayunoe* mu me jechuk xapas asatik ti chavat avoʼontonik kʼuchaʼal tspas li jloʼlavanejetike, yuʼun tsyanijes* satik sventa chakʼbeik yil krixchanoetik ti tspasik ayunoe. Ta melel chkalboxuk avaʼiik ti lek xa tsʼakal staoj smotonike.
17 Jaʼ yuʼun chaʼa, kʼalal chapas ayuno voʼote, malbo aseite li ajole xchiʼuk poko li asate,
18 sventa mu xakʼik venta li krixchanoetik ti yakal chapas ayunoe, jaʼ noʼox akʼo yil li Atot ti mu xvinaj bu oye. Vaʼun jaʼ tstojbot li Atot ti yiloj skotole.
19 »Mu xa xatsob akʼulejalik liʼ ta sba balumil ti bu chjochʼine xchiʼuk ti chkuxine, xchiʼuk ti bu ch-ochik ta persa li j-elekʼetik sventa chelkʼanik batele.
20 Mas lek tsobo akʼulejalik ta vinajel ti bu mu x-och xchanul xchiʼuk ti mu xkuxine, xchiʼuk ti bu mu x-ochik ta persa li j-elekʼetik sventa chelkʼanik batele.
21 Yuʼun ti bu oy akʼulejale jaʼ te oy ek li avoʼontone.
22 »Li slusal jbekʼtaltike jaʼ li sbekʼ jsatike. Jaʼ yuʼun, mi tukʼ skʼeloj batel* li sbekʼ asate xojobaj noʼox sjunul li abekʼtale.
23 Pe mi ch-itʼixaj* li sbekʼ asate, ta ikʼal osil me oy sjunul li abekʼtale. Mi ikʼal osil ta melel li alusale, ¡ikʼpulan ta jyalel un bi!
24 »Mu me xuʼ xtun ta chaʼvoʼ yajval li jun mosoe, yuʼun tskontrain li june, jaʼ tskʼan li yane; o mas nopol chakʼ sba ta stojolal li june, pe tspʼaj li yane. Jaʼ me jech ek, mu me xuʼ xatunik ta smoso Dios xchiʼuk ta smoso kʼulejal.
25 »Jaʼ yuʼun xi chkalboxuke: mu xa xavul avoʼontonik kʼuxi chakuxiik ta sventa ti kʼusi chalajesik o ti kʼusi chavuchʼike; o ta sventa li abekʼtalik ti kʼusi chalapike. ¿Mi mu jaʼuk mas tsots skʼoplal li akuxlejalike, ti jaʼ mu sta li aveʼelike? Xchiʼuk ¿mi mu jaʼuk mas tsots skʼoplal li abekʼtalike, ti jaʼ mu sta li akʼuʼ apokʼike?
26 Kʼelo lek avilik li mutetik ta vinajele; leʼe mu snaʼ x-ovolajik, mu snaʼ stsob sveʼelik mi jaʼuk bu tskʼej ta snail li sveʼelike. Manchuk mi jech, chmakʼlinat yuʼun li Stotik ta vinajele. ¿Mi mu jaʼuk mas tsots akʼoplalik li voʼoxuke, ti jaʼ mu sta li stukike?
27 ¿Buchʼu junukal avuʼunik ti xuʼ snatubtas jlikeluk xkuxlejal ta skoj ti chavul avoʼontonike?
28 Jech xtok, ¿kʼu yuʼun chavul avoʼontonik ta sventa li akʼuʼ apokʼike? Oyuk me kʼusi xachanik ta sventa li nichimetik* ta osiltik ta sventa ti kʼuxi chchʼiike; yuʼun muʼyuk bu tsots ch-abtejik xchiʼuk muʼyuk bu chnaujik;
29 pe chkalboxuk avaʼiik ti mi jaʼuk sta jech yutsil skʼuʼ spokʼ la slap Salomon ta sjunul smukʼulal kʼuchaʼal li nichimetik taje.
30 Jaʼ yuʼun chaʼa, mi jaʼ jech chakʼbe skʼuʼ spokʼ tsʼiʼleletik ta osiltik li Diose, ti liʼ to oyik avie, pe ti chichʼ tikʼel ta orno okʼome, ¿mi mu masuk oy srasonal ti chakʼ akʼuʼ apokʼik li voʼoxuke, krixchanoetik ti jutuk xchʼunel avoʼontonike?
31 Jech oxal chaʼa, mu me xavul avoʼontonik xchiʼuk mu me xiuk xavalike: ‹¿Kʼusi ta jlajestik?›, ‹¿kʼusi ta xkuchʼtik?› xchiʼuk ‹¿bu ta jta jkʼuʼ jpokʼtik?›.
32 Yuʼun taje jaʼ li kʼusitik batem tajek ta yoʼonton saʼel li jyanlumetike. Pe li Atotik ta vinajele snaʼoj me ti chtun avuʼunik skotol li kʼusitik taje.
33 »Saʼilanik me baʼyel chaʼa li Ajvalilal yuʼun Dios* xchiʼuk li stukʼilale, vaʼun ta me xakʼboxuk skotol li yan kʼusitik taje.
34 Jech oxal chaʼa, mu me xavul avoʼontonik ta sventa li yokʼomale, yuʼun oy kʼusi chakʼ vul-oʼonton xtok li ta yokʼomale. Yuʼun xuʼ noʼox ti kʼu yepal vokolil yichʼoj tal jujun kʼakʼale.
Tsʼibetik ta yok vun
^ Kʼelo glosario.
^ Kʼelo glosario.
^ O: «chʼul ilbil; chʼul chichʼ tsakel ta mukʼ».
^ Kʼelo glosario.
^ O: «Satanas».
^ O: «chavikta aveʼelike»; «chavikta aviximike»; «chavikta avotike»; «chatuchʼ achʼutike». Kʼelo glosario.
^ O: «tsjel».
^ O: «melel; lek noʼox».
^ S.gr.: «chopol; toj chopol».
^ S.gr.: «lirio nichim».
^ Kʼelo glosario.
