Mateo 8:1-34
8 Kʼalal yal tal ta vitse tsʼakliat batel yuʼun epal krixchanoetik.
2 ¡Kʼelo avil un!, tal jun vinik ti ip ta kʼaʼemal chamele* xchiʼuk laj yichʼ ta mukʼ* li Jesuse, xi laj yalbee: «Kajval, ti xakʼanuke, xuʼ xapoxtaun».
3 Jech oxal la syeʼ batel skʼob, la spik xchiʼuk xi laj yalbee: «¡Ta jkʼan!, kolan». Vaʼun ta ora noʼox poxtaj li skʼaʼemal chamele.
4 Vaʼun li Jesuse xi laj yalbee: «Aʼio avaʼi, mu me buchʼu xavalbe; batan, bat akʼo aba ta ilel ta stojolal li palee* xchiʼuk akʼo li matanal jech kʼuchaʼal yaloj Moisese, sventa xakʼik venta li kʼusi kʼot ta pasele».
5 Kʼalal och batel ta Kapernaume, te nopaj tal ta stojolal jun bankilal soltaro,* kʼanbat vokol
6 xchiʼuk xi albate: «Bankilal, li jmosoe te puchʼul* ta jna ta skoj ti alubem sbekʼtale xchiʼuk tsots tajek chil svokol».
7 Xi la stakʼbee: «Ta jpoxta kʼalal mi likʼot tee».
8 Xi la stakʼ li bankilal soltaroe: «Bankilal, mu jta-o ti cha-och ta yut jnae, jaʼ noʼox alo ti chkole, vaʼun chkol li jmosoe.
9 Yuʼun pasbilun noʼox ta mantal ek xchiʼuk ta jpas ta mantal soltaroetik xtok, kʼalal ‹¡Batan!›, mi xkut li june, chbat. ‹¡Laʼ!›, mi xkut li jun xtoke, chtal. ‹¡Paso liʼe!›, mi xkut li jmosoe, tspas».
10 Toj labal sba laj yaʼi Jesus kʼalal laj yaʼi taje xchiʼuk xi laj yalbe li buchʼutik tstsʼakliate: «Chkalboxuk avaʼiik ta melel: muʼyuk buchʼu jech toj mukʼ xchʼunel yoʼonton jtaoj li ta Israele.
11 Pe chkalboxuk avaʼiik ti ep buchʼutik chlikik tal ta slokʼeb Kʼakʼal xchiʼuk ta smaleb Kʼakʼal sventa chchiʼinik ta veʼel Abraan, Isaak xchiʼuk Jakob li ta Ajvalilal ta vinajele;
12 yan li xnichʼnab Ajvalilale chichʼik lokʼesel ta ikʼal osil ta pana. Jaʼ te ti bu ch-okʼik xchiʼuk ti chkʼux stanal* yeike».
13 Vaʼun xi laj yalbe bankilal soltaro li Jesuse: «Batan. Jaʼ jech akʼo kʼotuk ta pasel ta atojolal jech kʼuchaʼal laj avakʼ ta ilel xchʼunel avoʼontone». Vaʼun li vaʼ ora taje jaʼo poxtaj li mosoile.
14 Kʼalal och ta sna Pedro li Jesuse, te puchʼul la stabe li smeʼniʼe, yuʼun ip ta kʼokʼ.
15 Jech oxal la spikbe skʼob, jech tupʼ li skʼakʼale, vaʼi xchiʼuk lik smeltsanbe sveʼel.
16 Pe kʼalal och akʼobale, li krixchanoetike laj yikʼbeik tal li buchʼutik uʼuninbilik yuʼun pukujetike, vaʼun ta jpʼel noʼox kʼop la slokʼes li pukujetike xchiʼuk la xpoxta skotol li buchʼutik chil svokolike,
17 sventa xkʼot ta pasel li kʼusi xi albil ta stojolal j-alkʼop Isaiase: «Jaʼ laj yichʼ batel li jchameltike xchiʼuk jaʼ la xkuch batel li kʼusitik kʼux chkaʼitike».
18 Kʼalal laj yil Jesus ti joybil ta epal krixchanoetike laj yalbe yajchankʼoptak ti akʼo x-ochik batel ta varko* sventa xjelavik ta jote.
19 Vaʼun te nopaj tal jun jchanubtasvanej ta Mantal xchiʼuk xi laj yalbee: «Jchanubtasvanej, ta jtsʼakliot batel ti buyuk noʼox chabate».
20 Pe xi la stakʼ li Jesuse: «Oy xchʼen li vetetike xchiʼuk oy stas li mutetik chvil ta vinajele, yan li Xnichʼon krixchanoe* muʼyuk bu xuʼ smetsan sjol».
21 Te tal jun jchankʼop ti xi laj yalbe eke: «Kajval, baʼyel akʼo bat jmuk li jtote».
22 Xi la stakʼ li Jesuse: «Tsʼakliun-o batel, akʼo smuk yanima stukik li animaetike».
23 Kʼalal muy xaʼox ta varko li Jesuse, te tikʼilik batel ek li yajchankʼoptake.
24 Pe ¡kʼelo avil!, lik tsatsal ikʼaloʼ li ta nabe, jech oxal lik nojuk ta voʼ li varkoe; yan li stuke te vayal.
25 Vaʼun tal stijik, xi laj yalbeike: «¡Kajval, koltaunkutik, yuʼun chichamkutik xa!».
26 Pe xi la stakʼe: «¿Kʼu yuʼun chaxiʼik, viniketik ti jutuk xchʼunel avoʼontonike?». Te une vaʼi, tsots laj yalbe mantal li ikʼe xchiʼuk li nabe, vaʼun chʼan xi likel.
27 Jech oxal chaʼa, toj labal sba laj yil li viniketike, xi laj yalike: «¿Buchʼu xa noʼox vinikal leʼe? Yuʼun kʼalal ta ikʼ xchiʼuk ta nab chchʼunbat smantal».
28 Kʼalal kʼot ta jot tiʼ nabe, li ta yosilal jgadaraetike, te nupat ta be yuʼun chaʼvoʼ viniketik ti uʼuninbilik yuʼun pukujetike, te lokʼik tal ta mukinal,* xibal sbaik tajek, jaʼ yuʼun muʼyuk buchʼu skʼan x-echʼ li ta be taje.
29 Vaʼun ¡kʼelo avil!, xi avanike: «¿Kʼusi chasaʼ liʼ eke Xnichʼon Dios? ¿Mi yuʼun tal avakʼbun jvokolkutik kʼalal muʼyuk to bu kʼotem yoraile?».
30 Ta nom to tajeke, te xlamet chveʼ epal chitom.
31 Jech oxal chaʼa, li pukujetike xi lik skʼanbeik vokole: «Mi chalokʼesunkutike, takunkutik batel leʼ ta jtsop chitometike».
32 Vaʼun xi laj yalanbee: «¡Batanik!». Jech lokʼik batel, te bat stikʼ sbaik li ta chitometike. ¡Kʼelo avil un!, anil bat skotolik ta tayal chʼentik li chitometike, la sjip sbaik yalel ta nab, vaʼun te jikʼavik.
33 Pe jatavik batel li jchabichitometike, batik ta jteklum sventa chalbeik skʼoplal skotol li kʼusitike, laj yalbeik skʼoplal ek li viniketik ti uʼuninbilik yuʼun pukujetike.
34 Vaʼun ¡kʼelo avil!, lokʼ sjunul jteklum sventa chbat snup ta be li Jesuse, kʼalal laj yilike tsots laj yalbeik ti akʼo lokʼuk batel li ta yosilalike.
Tsʼibetik ta yok vun
^ Kʼelo glosario.
^ O: «la snijan sba ta stojolal».
^ Kʼelo glosario.
^ Jaʼ li buchʼu sbainoj o ti tspas ta mantal sien soltaroe.
^ O: «metsel»; «mochol»; «taʼal».
^ O: «sbakil».
^ O: «kanova».
^ Kʼelo glosario.
^ Kʼelo glosario.
