Romanos 1:1-32
1 Voʼon Pabloun ti jaʼ smosoun Kristo* Jesuse xchiʼuk ti takbilun ta ikʼel sventa jtakbole,* ti tʼujbilun sventa li lekil aʼyejetik* yuʼun Diose,
2 ti jech xa onoʼox yaloj ta stojolal yaj-alkʼoptak li ta chʼul Tsʼibetike,*
3 ta sventa li Xnichʼon ti vokʼ* kʼuchaʼal jun krixchano ti te lik talel ta snitilulal* Davide,
4 pe ta skoj li juʼelale laj yichʼ alel ta stojolal chʼul espiritu* ti jaʼ Xnichʼon Dios kʼalal laj yichʼ chaʼkuxesele* —jech, jaʼ li Kajvaltik Jesukristoe,
5 jaʼ ta stojolal ti ta jtatik-o li slekil yutsil oʼontonal* xchiʼuk li abtelal ta jtakbol sventa xchʼunik mantal ta skoj xchʼunel oʼontonal skotol li jyanlumetik ta sventa li sbie,
6 ta skotol li jyanlumetik taje, takbiloxuk ta ikʼel ek sventa chuʼuninoxuk li Jesukristoe—
7 akotolik li buchʼutik te oyoxuk ta Roma ti kʼanbiloxuk yuʼun Diose, ti takbiloxuk ta ikʼel sventa chʼul* lakʼotik:
Oyuk slekil yutsil oʼontonal xchiʼuk jun oʼontonal ta atojolalik ti jaʼ chakʼ li Jtotik Dios xchiʼuk li Kajvaltik Jesukristoe.
8 Baʼyel ta jtojbe ta vokol Jdios ta stojolal Jesukristo ta sventa akotolik, yuʼun ta spʼejel balumil chalik li xchʼunel avoʼontonike.
9 Li Dios ti buchʼu ta sjunul koʼonton ta jpasbe chʼul abtelal* ta sventa li lekil aʼyejetik ta sventa li Xnichʼone, jaʼ kʼotem ta testigo kuʼun ti ta skotol ora oyoxuk-o ta j-orasione,
10 jech ta jkʼanilanbe vokol Dios, ti mi xuʼe, ti lekuk xikʼot ta atojolalik jech kʼuchaʼal tskʼan yoʼonton li Diose.
11 Oy tajek ta koʼonton ta jkʼeloxuk, sventa chkakʼboxuk sbendision Dios yoʼ stsatsub avoʼontonik;
12 ti xkaltike, jaʼ ti koʼoluk jtsatsubtasbe jba koʼontontik ta sventa li xchʼunel koʼontontik ta jujuntale, li xchʼunel avoʼontonike xchiʼuk li xchʼunel koʼonton eke.
13 Pe mu jkʼan ti chchʼay ta ajolike ermanoetik, ti ep ta velta oy onoʼox ta koʼonton chtal jkʼeloxuk sventa lekuk kʼusi xkʼot ta pasel yuʼun li cholmantal ta jpas ta atojolalik jech kʼuchaʼal li ta stojolal jyanlumetike —pe li avie oy to kʼusi spajesojun—.
14 Oy kil ta stojolal jgresiaetik,* jyanlumetik, pʼijil krixchanoetik xchiʼuk li buchʼutik muʼyuk spʼijilike,
15 jaʼ yuʼun oy tajek ta koʼonton chkalboxuk li lekil aʼyejetik li voʼoxuk te ta Romae.
16 Yuʼun muʼyuk bu chikʼexav yuʼun li lekil aʼyejetike; ta melel, jaʼ sjuʼel Dios sventa sta spojel skotol li buchʼu oy xchʼunel yoʼontone, baʼyel ta stojolal juda krixchano* xchiʼuk xtok ta stojolal jgresia;
17 yuʼun jech te chvinaj stukʼilal Dios li ta lekil aʼyejetike. Ti jech chkʼot ta pasele jaʼ ta skoj ti oy xchʼunel oʼontonale xchiʼuk jaʼ tsatsub-o li xchʼunel oʼontonale, jech kʼuchaʼal xi tsʼibabile: «Li buchʼu tukʼe* ta sventa xchʼunel oʼontonal chkuxi».
18 Yuʼun li skʼakʼal yoʼonton Diose te chvinaj tal ta vinajel ti skontrainoj li kʼusitik muʼyuk lek xchiʼuk li kʼusitik muʼyuk tukʼ tspas li krixchanoetike, yuʼun tsmakik ta be li kʼusi melel ta skoj li kʼusitik muʼyuk tukʼe,
19 yuʼun li kʼusi stakʼ ojtikinel ta stojolal Diose jamal xvinaj ta stojolalik, yuʼun jamal akʼbilik ta ilel yuʼun li Diose.
20 Yuʼun li stalelaltak mu xvinaje, jamal xvinaj kʼalal laj yichʼ pasel tal li balumile, yuʼun te xvinaj ta skoj li kʼusitik pasbile, jaʼ xkaltik, li sjuʼel ti te oy-o sbatel osile xchiʼuk ti jaʼ Dios ta melele, jaʼ yuʼun mu stakʼ xalik ti chʼabale;
21 yuʼun akʼo mi laj yojtikinik li Diose, muʼyuk bu laj yichʼik ta mukʼ kʼuchaʼal Dios xchiʼuk mi jaʼuk bu la stojbeik ta vokol, kʼajomal noʼox chʼabal sbalil li kʼusi tsnopike xchiʼuk mu xaʼibeik smelolal.
22 Akʼo mi chalik ti pʼijike, pasik ta bol* krixchanoetik,
23 xchiʼuk akʼo mi te oy-o sbatel osil xchiʼuk ti toyol oy skʼoplal li Diose, kʼalal tsmuyubtaik li santoetike,* tskoʼoltasik kʼuchaʼal santoik li Diose. Jlom li santoetik taje xkoʼolaj kʼuchaʼal krixchanoetik ti snaʼ xchamike, ta mutetik, ta chonbolometik ti oy chanib yoke xchiʼuk chonetik ti xjochetik ta lume.
24 Jaʼ yuʼun li Diose laj yakʼ akʼo spasik jech kʼuchaʼal tskʼan yoʼontonike, laj yakʼ akʼo spasik li kʼusitik ibal sba* sventa muʼyuk xa ichʼbil ta mukʼ li sbekʼtalike.
25 Li stukike la sjelik ta jutbil kʼop* li kʼusi melel ta sventa Diose, vaʼun laj yichʼik ta mukʼ xchiʼuk la spasik chʼul abtelal ta stojolal li kʼusi pasbile, maʼuk laj yichʼik ta mukʼ li Jpasvaneje, ti jaʼ kʼupil kʼoptabil sbatel osile. Jechuk.*
26 Ta skoj taje, li Diose laj yakʼ ti akʼo oyuk tajek ta yoʼontonik li chiʼinejbail ta vayel* ti solel muʼyuk spajebe, li antsetike la sjelik ti kʼu yelan stalel onoʼox ta sventa li chiʼinejbail ta vayele, jaʼ xa la spasik li kʼusi mu staleluk jech ta pasele;
27 jech la spasik ek li viniketike, yuʼun laj yiktaik ti kʼu yelan stalel onoʼox chchiʼinik ta vayel li antsetike, xchiʼuk xtiltun tajek ta yoʼontonik chchiʼin sbaik ta vayel stukik, xchiʼil noʼox sbaik ta vinikal chchiʼin sbaik, jaʼ la spasilanik li kʼusi toj chopole, jaʼ yuʼun tsʼakal lek chichʼbeik stojobil ta skoj li kʼusi toj chopol la spasike.
28 Jaʼ yuʼun ta skoj ti muʼyuk oy ta yoʼontonik yojtikinel lek li Diose, li Diose laj yakʼ akʼo snopik li kʼusitik muʼyuk lek chile, yoʼ akʼo spasik li kʼusitik muʼyuk leke.
29 Vaʼun noj ta yoʼontonik skotol li kʼusitik muʼyuk tukʼe, ta chopol nopbenal, ta pichʼ oʼontonal, ta choplejal, noj ta yoʼontonik itʼixal, ta milvanej, tsakbail ta kʼop, ta loʼlavanej xchiʼuk ta sokesej oʼontonal, jaʼik jloʼiltavanejetik,
30 chchopol kʼopojik ta mukul, tspʼajik Dios, muʼyuk kʼexlal chaʼiik, toyol skʼoplal chaʼi sbaik, xtoyet xa chaʼi sbaik, xtal noʼox ta nopel yuʼunik li kʼusitik chopole, mu xchʼunbe smantal stot smeʼik,
31 mu xaʼibeik smelolal, mu xkʼot xkʼopojik, muʼyuk skʼanoj sbaik ti stalel onoʼox jeche xchiʼuk muʼyuk xkʼuxul yoʼontonik.
32 Akʼo mi xojtikinik li tukʼil mantaletik yuʼun Diose, sta-o xchamik li buchʼutik tspasik li kʼusitik taje, yuʼun maʼuk noʼox ti yakal-o tspasike, yuʼun lek chilik xtok li buchʼutik jech tspasike.
Tsʼibetik ta yok vun
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ O: «ayan».
^ O: «smomnichʼon»; «stsʼunbal»; «stsʼakalul».
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ O: «sonso».
^ Kʼelo glosario.
^ Kʼelo glosario.
^ O: «nopbil kʼop»; «epal kʼop».
^ Kʼelo glosario.
^ O: «xjechʼjun tajek chaʼiik chiʼinejbail ta vayel».
