Romanos 10:1-21
10 Kermanotak, ta slekil koʼonton ta jkʼanbe vokol Dios ta stojolalik, ti jech ta jpase jaʼ sventa skolebalik.
2 Yuʼun chkalboxuk skʼoplal ti ta sjunul yoʼonton yichʼojik ta mukʼ li Diose; pe jaʼ noʼox mu snaʼik ti kʼuxi lek ta pasele;
3 jaʼ yuʼun, ta skoj ti mu xojtikinik li tukʼilal yuʼun Diose xchiʼuk ti kʼajomal noʼox tsaʼ stukʼilal stukike, muʼyuk la stsakik ta mukʼ li tukʼilal yuʼun Diose.
4 Yuʼun jaʼ slajeb Mantal li Kristoe, sventa staik tukʼilal skotol li buchʼutik chakʼ xchʼunel yoʼontonike.
5 Yuʼun xi la stsʼiba Moises ta sventa li tukʼilal chichʼ tael ta Mantale: «Li buchʼu tspas li kʼusitik te chale jaʼ chkuxi-o».
6 Pe xi chichʼ albel skʼoplal li tukʼilal ta sventa li xchʼunel oʼontonale: «Mu xiuk xaval ta avoʼontone: ‹¿Buchʼu xuʼ chmuy batel ta vinajel?›, taje jaʼ sventa tsyales talel li Kristoe;
7 o: ‹¿Buchʼu xuʼ xyal ta xab?›,* taje jaʼ sventa chichʼ chaʼkuxesel li Kristoe».
8 Yuʼun, ¿kʼusi chal li skʼop Diose chaʼa? «Te nopol oy ta atojolal, ta ave, ta avoʼonton li kʼope», jaʼ xkaltik, li «kʼop» ta sventa xchʼunel oʼontonal ti yakal ta jcholtike.
9 Yuʼun mi jamal chachol batel ta ave ti jaʼ Kajvaltik li Jesuse xchiʼuk mi chachʼun ta avoʼonton ti jaʼ chaʼkuxesat yuʼun li Diose, chata akolel un bi.
10 Yuʼun ta koʼontontik chkakʼ xchʼunel koʼontontik ta sventa li tukʼilale, pe ta ketik jamal chkaltik ta stojolal krixchanoetik ta sventa li kolebale.
11 Yuʼun xi chal li tsʼibe: «Muʼyuk chlaj ta loʼlael li buchʼu chakʼ xchʼunel yoʼonton ta stojolale».
12 Yuʼun muʼyuk jelel li judaetik xchiʼuk li jgresiaetike, jun noʼox Kajvaltik kuʼun jkotoltik, chakʼbe bendision skotol li buchʼutik chkʼanbat vokole.
13 Yuʼun «skotol li buchʼu tskʼan vokol ta sbi Jeovae jaʼ chkol».
14 Akʼo mi jech, ¿kʼuxi onoʼox tskʼanbeik vokol mi muʼyuk bu yakʼoj xchʼunel yoʼontonik ta stojolale? Jech xtok, ¿kʼuxi onoʼox chakʼ xchʼunel yoʼontonik ta stojolal mi muʼyuk bu yaʼiojbeik skʼoplale? Jech xtok, ¿kʼuxi onoʼox chaʼiik mi muʼyuk buchʼu chchol mantale?
15 Jech xtok, ¿kʼuxi onoʼox chcholik mantal mi muʼyuk buchʼu chtakatik batele? Jech kʼuchaʼal xi onoʼox tsʼibabile: «¡Toj kʼupil sba yok li buchʼutik chalik batel lekil aʼyejetik ti toj lekike!».
16 Akʼo mi jech, mu skotolikuk la xchʼunik li lekil aʼyejetike. Yuʼun xi chal li Isaiase: «Jeova, ¿buchʼutik laj yakʼ xchʼunel yoʼontonik ta sventa li kʼusitik laj yaʼiik laj kalkutike?».
17 Jaʼ yuʼun, jaʼ to chakʼ xchʼunel yoʼonton jun krixchano mi laj xaʼox yaʼi li kʼope. Jech xtok, jaʼ to chkaʼitik kʼop kʼalal oy buchʼu chcholbe skʼoplal ta sventa li Kristoe.
18 Pe xi ta jakʼe: Maʼuk ti yuʼun muʼyuk yaʼiojike, ¿mi mu jechuk? Yuʼun «laj yichʼ aʼiel ta spʼejel balumil xchiʼuk kʼot kʼalal to ta stiʼiltak spʼejel balumil ti bu oy jnaklejetik li yaʼyeje».
19 Pe xi ta jakʼ xtoke: Maʼuk ti yuʼun muʼyuk laj yaʼi li Israele, ¿mi mu jechuk? Xi baʼyel laj yal li Moisese: «Chkakʼ itʼixajanik ta stojolal li jyanlumetike; tsots chkakʼ likuk skʼakʼal avoʼontonik ta stojolal jyanlumetik ti bolike».*
20 Pe tsatsub lek yoʼonton li Isaiase xchiʼuk xi chale: «La staikun li buchʼutik muʼyuk bu tsaʼikune; laj yojtikinikun li buchʼutik muʼyuk bu tsjakʼik jkʼoplale».
21 Pe xi chal ta sventa li Israele: «Sjunul kʼakʼal xyeʼet jkʼob ta stojolal jun jteklum ti tstoy sbaik xchiʼuk ti tsots yoʼontonike».
