Romanos 13:1-14
13 Skotol krixchanoetik akʼo xchʼunbeik smantal li buchʼutik oy yabtelik ti mas mukʼ skʼoplalike, yuʼun jech tskʼan Dios li buchʼutik oy yabtele; li buchʼutik oy yabtelike jaʼ te akʼbilik yuʼun Dios ti bu oyike.
2 Jaʼ yuʼun, li buchʼu muʼyuk chchʼunbe smantal li buchʼu oy yabtele jaʼ kontra chil li kʼusi xchapanoj Diose; li buchʼutik skontrainojik taje tsaʼ xchapanel stukik.
3 Li buchʼutik chventainvanike muʼyuk xiʼelal kʼalal lek li kʼusi chichʼ pasele, jaʼ chakʼ xiʼel kʼalal oy kʼusi chopol chichʼ pasele. ¿Mi chakʼan muʼyuk chaxiʼta li buchʼu oy yabtele? Jaʼ pasilano li kʼusitik leke, vaʼun tskʼupil kʼoptaot;
4 yuʼun jaʼ yajtunel Dios ta atojolal sventa alekilal. Pe xiʼan me mi jaʼ yakal chapas li kʼusi chopole: yuʼun mu jecheʼuk noʼox ti oy yabtel sventa chakʼ stojol mulile.* Jaʼ yajtunel Dios, jaʼ jpakkʼoplalil sventa chakʼ kʼakʼal oʼontonal* ta stojolal li buchʼutik tspas kʼusi chopole.
5 Jaʼ yuʼun, oy lek srasonal ti akʼo xachʼunbeik li smantale, maʼuk noʼox ta sventa li kʼakʼal oʼontonal taje, jaʼ ta skoj li ajol avoʼontonik xtoke.
6 Jaʼ ta skoj ti chatojik ek li patane; yuʼun jaʼik yajtuneltak Dios ta stojolal krixchanoetik ti jech chtunik-o batel ta sventa li abtelal taje.
7 Akʼbeik li kʼusi staik-o ta jujuntale: li buchʼu tskʼan patane, akʼbeik patan; li buchʼu tskʼan oy kʼusi tojbele,* akʼo yichʼ tojbel; li buchʼu tskʼan xiʼtaele, akʼo yichʼ xiʼtael; li buchʼu tskʼan ichʼel ta mukʼe, akʼo yichʼ ichʼel ta mukʼ.
8 Mu me xasaʼ jsetʼuk avilik ta stojolal buchʼuuk noʼox, kʼano abaik ta jujuntal; yuʼun laj xa spas skotol kʼusi chal mantal li buchʼu tskʼan xchiʼile.
9 Yuʼun li mantaletik: «Skʼan mu xaloʼla anup achiʼil,* skʼan mu xamilvan, skʼan mu xa-elkʼaj, skʼan mu xapichʼ oʼontavan» xchiʼuk skotol li yan mantaletik oye, xi noʼox smelolal ta jaypʼel kʼope: «Skʼan me jech xakʼan achiʼil jech kʼuchaʼal akʼanoj aba atuke».
10 Muʼyuk kʼusi chopol tspasbe xchiʼil li buchʼu kʼanvaneme; yuʼun li skʼoteb ta pasel mantale jaʼ li kʼanelale.
11 Jaʼ jech xapasik li kʼusi taje, yuʼun xavojtikinbeik yorail li voʼoxuke, yuʼun jaʼ xa yorail ti xajulavike,* yuʼun mas xa nopol oy jkolebaltik li avie, jaʼ mas nom toʼox oy kʼalal lijpas ta jchʼunolajele.
12 Solel yochel xa akʼobal; poʼot xa sakub osil; jaʼ yuʼun mu xa jpastik li kʼusi chichʼ pasel ta akʼobale, jaʼ xa jtunestik li yabtejebtak luse.
13 Jaʼuk me jpastik li kʼusi lek ti jaʼ noʼox chichʼ pasel ta kʼakʼaltike, mu jpastik kʼinetik ti solel muʼyuk xa smelolale xchiʼuk mu xijyakub, mu jpastik chopol chiʼinejbail ta vayel xchiʼuk talelal ti toj kʼexlal sbae,* mu jtsak jbatik ta kʼop xchiʼuk mu xij-itʼixaj.
14 Ti kʼusie, jaʼ chanbeik stalelal li Kajvaltik Jesukristoe, mu jaʼuk ti baʼyel xa chanopbeik lek skʼoplal li kʼusi tskʼan bekʼete.
Tsʼibetik ta yok vun
^ S.gr.: «espada».
^ O: «chakʼ kastigo».
^ Kʼelo glosario.
^ Kʼelo glosario.
^ O: «xavikʼ asatike».
^ «Aseljeia» ta griego. Kʼelo glosario.
