Romanos 14:1-23
14 Chʼamik me ta sjunul avoʼontonik li buchʼu kʼun xchʼunel yoʼontone, pe mu me jaʼuk sventa xachapanvanik jech kʼuchaʼal chanop atukike.
2 Li krixchanoe xchʼunoj ti xuʼ tslajes skotole, pe itaj noʼox tsloʼ li buchʼu kʼune.
3 Li buchʼu tslajese mu me slaban li buchʼu muʼyuk tslajese, jech xtok li buchʼu muʼyuk tslajese mu me xchapan li buchʼu tslajese, yuʼun chʼambil yuʼun Dios ta sjunul yoʼonton.
4 ¿Buchʼuot ti chachapan li yan jtunele? Yuʼun jaʼ chal stuk yajval mi xuʼ te vaʼal chkom o mi chyal ta lum. Ta melel, te vaʼal chkom, yuʼun xuʼ yuʼun Jeova ti te vaʼal chkom yuʼune.
5 Oy jlom ti tsots skʼoplal chaʼiik li jun kʼakʼale; li jlom xtoke koʼol noʼox chaʼiik skotol kʼakʼal; jpʼeluk me ta yoʼonton xchʼunojik li kʼusi kʼotem ta nopel yuʼunik ta jujuntale.
6 Li buchʼu tsots skʼoplal chaʼi li kʼakʼale tsotsuk me skʼoplal chil ta sventa Jeova. Jech xtok, li buchʼu chveʼe chveʼ ta sventa Jeova, yuʼun tstojbe ta vokol Dios; li buchʼu muʼyuk chveʼe muʼyuk chveʼ ta sventa Jeova, akʼo mi jech, tstojbe onoʼox ta vokol li Diose.
7 Muʼyuk buchʼu junukal kuʼuntik ti kuxul ta sventa stuke xchiʼuk muʼyuk buchʼu junukal ti chcham ta sventa stuke;
8 yuʼun mi kuxulutike kuxulutik ta sventa Jeova, mi chijchamutike chijchamutik ta sventa Jeova. Jaʼ yuʼun chaʼa, mi kuxulutik o mi chijchamutik, jaʼ yuʼunutik li Jeovae.
9 Yuʼun jaʼ sventa ti cham xchiʼuk ti kuxi yan velta li Kristoe, sventa xkʼot ta Kajvaltik yuʼun li buchʼu chamemik xchiʼuk li buchʼu kuxulike.
10 Pe ¿kʼu yuʼun ti chachapan li avermanoe? O, ¿kʼu yuʼun ti chalaban xtok li avermanoe? Yuʼun te vaʼal chijkʼot jkotoltik ta chapanobbail* yuʼun Dios.
11 Yuʼun xi tsʼibabile: «‹Ta skoj ti kuxulun ta melele —xi chal li Jeovae—, tskejan sba skotolik ta jtojolal xchiʼuk chalik ta jamal skotol jaychop kʼopetik ti voʼon Diosune›».
12 Jaʼ yuʼun ta jujuntal chchapanutik Dios ti kʼu yelan ta jpastike.
13 Jaʼ yuʼun chaʼa, mu xa me jchapan jbatik ta jujuntal, jaʼ lek xiuk xa noʼox kʼotuk ta nopel kuʼuntike: ti mu me kʼusi smak-o okile o yan kʼusi ti xuʼ smak-o yok junuk ermanoe.
14 Li voʼone jnaʼoj xchiʼuk kʼotem lek ta koʼonton ta stojolal Kajvaltik Jesus ti muʼyuk kʼusi ibal sba ta stuk noʼoxe, jaʼ to mi yuʼun ibal sba chil li krixchanoe, vaʼun bi ibal sba chil li stuke.
15 Mi yuʼun ta skoj noʼox aveʼel chavakʼbe yat yoʼonton li avermanoe mu xa jechuk chapas kʼuchaʼal tskʼan li kʼanelale. Mu ta skojuk noʼox aveʼel xasokes li buchʼu cham Kristo ta stojolale.
16 Jaʼ yuʼun chaʼa, mu me xavakʼik ta chopol kʼoptael li kʼusi lek chapasike.
17 Yuʼun maʼuk skʼan xal veʼel xchiʼuk uchʼbolajel li Ajvalilal yuʼun Diose,* yuʼun jaʼ skʼan xal tukʼilal, jun oʼontonal xchiʼuk kuxetel oʼontonal* ta sventa li chʼul espiritue.
18 Yuʼun li buchʼu chtun ta smoso Kristo jech kʼuchaʼal taje, chʼambil chkʼot ta stojolal Dios xchiʼuk lek ch-ilat yuʼun li krixchanoetike.
19 Jaʼ yuʼun, jaʼ me jpastik-o li kʼusi jaʼ chakʼ jun oʼontonale xchiʼuk li kʼusitik tstsatsubtasvan ta jujuntale.
20 Iktao xa aba ta sokesbel yabtel Dios ta skoj noʼox aveʼel. Melel ti sak* skotol li kʼusitike, pe muʼyuk me lek kʼusi chkʼot ta stojolal li krixchano kʼalal oy kʼusi tslajes ti tsmak okile.
21 Jaʼ mas lek mu xichʼ tiʼel bekʼet, yuchʼel vino o ti xichʼ pasel yan kʼusitik ti tsmak-o yok li avermanoe.
22 Oyuk avuʼun atuk ta stojolal Dios li xchʼunel avoʼontone. Xmuyubaj noʼox li krixchano ti muʼyuk chchapan sba stuk ta sventa li kʼusi tspas ti lek chile.
23 Pe mi xchibet yoʼontone, oy xa smul mi la slajese, yuʼun maʼuk ta skoj xchʼunel yoʼonton tslajes. Ta melel, jaʼ mulil mi maʼuk ta sventa xchʼunel oʼontonal chichʼ pasel skotole.
Tsʼibetik ta yok vun
^ Kʼelo glosario.
^ Kʼelo glosario.
^ O: «pʼijil oʼnal»; «nichimal oʼontonal».
^ Kʼelo glosario.
