Romanos 15:1-33
15 Li voʼotik ti tsotsutike, skʼan me jtsʼikbetik li buchʼutik kʼunik ti muʼyuk bu tsotsike, mu me jaʼuk jpastik li kʼusi lek chkaʼi jtuktike.
2 Ta jujuntal jaʼ jpastik li kʼusi lek chaʼi yantike, sventa slekilalik xchiʼuk sventa jtsatsubtasbetik yoʼontonik.
3 Yuʼun maʼuk la spas Kristo ek li kʼusi lek chaʼi stuke; yuʼun jech kʼot ta stojolal kʼuchaʼal xi tsʼibabile: «Kʼotem ta jtojolal li chopol kʼoptael chakʼboxuk jchopolkʼoptavanejetike».
4 Yuʼun skotol li kʼusitik laj yichʼ tsʼibael ta voʼnee, laj yichʼ tsʼibael sventa jchanubtaseltik, sventa oyuk spatobil koʼontontik ta skoj ti chkuch kuʼuntik xchiʼuk ti tspat koʼontontik li Tsʼibetike.
5 Avi une, ta skoj ti chakʼ akʼo kuchuk kuʼuntik xchiʼuk ti chakʼ spatobil koʼontontik li Diose, akʼo yakʼboxuk li nopbenal jech kʼuchaʼal snopben echʼ li Kristo Jesuse,
6 sventa jmojuk xchiʼuk junuk yechʼomal aveik xatoybeik skʼoplal li Dios ti jaʼ Stot li Kajvaltik Jesukristoe.
7 Jech oxal chaʼa, ta sjunuluk avoʼontonik chʼamo abaik ta jujuntal, jech kʼuchaʼal ta sjunul yoʼonton la xchʼamutik li Kristoe, yuʼun chichʼ albel smukʼulal Dios kʼalal jech chichʼ pasele.
8 Yuʼun chkalboxuk ti kʼot ta jtunel li kristo ta stojolal li buchʼutik yichʼoj sirkunsision ta sventa ti melel xkʼopoj li Diose, sventa jamal chakʼ ta aʼiel li kʼusi albilik yuʼun smoltotakik ta voʼnee
9 xchiʼuk sventa tstoybeik skʼoplal Dios li jyanlumetik ta skoj ti kʼuxubinbilike. Jech kʼuchaʼal xi onoʼox tsʼibabile: «Jaʼ yuʼun ta jtoy akʼoplal ta stojolal li jyanlumetike xchiʼuk ta jkʼejinta kʼejojetik ta sventa li abie».
10 Xi chal yan veltae: «Jyanlumetik, muyubajanik* xchiʼuk li steklumale».
11 Xi to chal xtoke: «Kʼupil kʼoptaik Jeova akotolik li jyanlumoxuke, kʼupil kʼoptaik akotolik li jteklumoxuke».
12 Xi to chal yan velta xtok li Isaiase: «Oy buchʼu te chlik tal li ta yutsʼ yalal Jese ti tsventain epal lumetike, vaʼun xmuyubaj tsmalaik sventa tspasik li kʼusi leke».
13 Akʼo yakʼboxuk xkuxetel oʼontonal xchiʼuk jun oʼontonal li Dios ti jaʼ chakʼ spatobil oʼontonal ta skoj ti apatoj avoʼontonik ta stojolale, sventa x-epaj li spatobil avoʼontonik ta sjuʼel li chʼul espiritue.
14 Jnaʼoj lek kuni ermanotak, ti nojem ta avoʼontonik li yutsil oʼontonal ta skoj ti oy lek yojtikinobil avuʼunike xchiʼuk ti xanaʼ kʼuxi chapʼijubtas abaik ta jujuntale.
15 Pe oy kʼusi junantik ti mas jamal ta jtsʼibaboxuk tale, sventa ta jvules ta ajolik yan velta, ta sventa ti laj yakʼbun li slekil yutsil yoʼonton Dios
16 ti chikʼot ta yajtunel Kristo Jesus ta stojolal krixchanoetik ta sventa li jyanlumetike. Jaʼ batem ta koʼonton li chʼul abtelal ta sventa li lekil aʼyejetik yuʼun Diose, sventa xuʼ xichʼ chʼamel ta matanal li jyanlumetik ti chʼultajesbil ta chʼul espiritue.
17 Jech oxal, oy srasonal kuʼun sventa xkuxet noʼox koʼonton ta stojolal Kristo Jesus ta sventa li kʼusitik yuʼun Diose.
18 Mi jsetʼuk xitoyet xa yuʼun ta sventa li kʼusi chkale, jaʼ noʼox ta sventa li kʼusi la spas Kristo ta jtojolal sventa xchʼunik mantal li jyanlumetik ta skoj li kʼusi chkale, ta sventa li kʼusi ta jpase,
19 ta sventa li senyailtake,* ta sventa li kʼusitik labal sbae xchiʼuk ta sjuʼel li xchʼul espiritu Diose; jaʼ yuʼun lek tsʼakal la jchol li lekil aʼyejetik ta sventa Kristo ti te lik ta Jerusalen kʼalal to ta Ilirikoe.*
20 Jaʼ yuʼun jaʼ jech laj kakʼ ta koʼonton ti muʼyuk xa bu chkal batel lekil aʼyejetik ti bu yaʼiojbeik xa skʼoplal li Kristoe, sventa mu jlikes yan abtelal ti bu slikesoj xa jun vinike;
21 jaʼ jech la jpas kʼuchaʼal xi tsʼibabile: «Ta xilik li buchʼutik mu jsetʼuk bu laj yaʼibeik skʼoplale, ta xaʼibeik smelolal li buchʼutik muʼyuk bu yaʼiojike».
22 Jech oxal xtok ep ta velta limakat ta be, jaʼ yuʼun muʼyuk ay jkʼeloxuk.
23 Pe li avi une chʼabal xa junuk lum ti muʼyuk bu jcholoj mantal liʼe xchiʼuk oy xa ta sjayibal jabil ta jkʼan tajek chbat jkʼeloxuk.
24 Jech oxal chaʼa, jnopoj ch-echʼ jkʼeloxuk kʼalal mi libat ta Españae xchiʼuk ti chachiʼinikun batel jtuchʼuk* be kʼalal mi jun xaʼox koʼonton ta skoj ti laj xaʼox jkʼopon jbatik kʼuk sjalile.
25 Pe liʼ ta orae chibat xa ta Jerusalen sventa chbat tunkun yuʼun li buchʼutik chʼule.
26 Yuʼun lek laj yaʼi laj yakʼik kʼusitik oy yuʼunik li buchʼutik te oy ta Masedonia* xchiʼuk ta Akayae,* la yakʼbeik matanal li buchʼutik abol sbaik ti jaʼik junantik li buchʼutik chʼulik ti te oyik ta Jerusalene.
27 Melel onoʼox ti lek laj yaʼi ti jech la spasike, ta melel, yuʼun oy onoʼox yilik ta stojolalik; yuʼun mi oy ta stojolal jyanlumetik li kʼusitik sventa mantal yuʼunike, jaʼ jech oy ta sbaik ek ti akʼo skolta sbaik sventa xakʼbeik li kʼusitik oy yuʼunike.
28 Jech oxal chaʼa, kʼalal mi tsuts* xaʼox kuʼun xchiʼuk kʼalal mi lek xaʼox chabibil bat kuʼun li matanal liʼe, chibat ta España xchiʼuk te chi-echʼ ti bu oyoxuke.
29 Jech xtok, jnaʼoj ti lek tsʼakal spʼisol chkichʼ batel sbendision Kristo kʼalal chbat jkʼeloxuke.
30 Pe chkalboxuk avaʼiik ermanoetik ta stojolal Kajvaltik Jesukristo xchiʼuk ta stojolal li kʼanelal yuʼun chʼul espiritue, ti akʼo xavakʼbeik yipal ti jmoj jkʼopontik Dios ta jtojolale,
31 sventa xikol ta stojolal li buchʼutik maʼuk jchʼunolajeletik ta Judeae xchiʼuk sventa xchʼamik kabtel ta Jerusalen li buchʼutik chʼule,
32 sventa xkuxetuk noʼox koʼonton chtal jkʼeloxuk jech kʼuchaʼal tskʼan yoʼonton Diose xchiʼuk ti jmojuk siketuk koʼontontike.
33 Teuk oy ta atojolalik li Dios ti chakʼ jun oʼontonale. Jechuk.
Tsʼibetik ta yok vun
^ O: «pʼijuk avoʼnik»; «nichimuk avoʼontonik».
^ Kʼelo glosario.
^ Kʼelo glosario.
^ O: «jvokʼuk».
^ Kʼelo glosario.
^ Kʼelo glosario.
^ O: «laj».
