Romanos 9:1-33
-
Laj yat yoʼonton Pablo ta stojolal li Israel ti jmoj stsʼunbal xchiʼuke (1-5)
-
Li smelel nitilulal Abraane (6-13)
-
Mu stakʼ jtsaktik ta kʼop li kʼusi tsnop Diose (14-26)
-
Vaso sventa skʼakʼal oʼontonal xchiʼuk vaso sventa kʼuxubinel (22, 23)
-
-
Jutuk noʼox li buchʼutik chkole (27-29)
-
La smak yok li Israele (30-33)
9 Yajtsʼaklomun Kristo.* Melel li kʼusi chkale; muʼyuk bu ta jut kʼop,* yuʼun jamal chalbun jol koʼonton ta sventa li chʼul espiritue,
2 ti chkat tajek koʼonton xchiʼuk ti mu xpaj li xkʼuxul koʼontone.
3 Oy ta koʼonton ti xuʼuk xkichʼ chʼakel lokʼel ta stojolal Kristo xchiʼuk ti voʼonuk chkichʼ kastigo sventa jaʼ staik koltael li kermanotake, li jchiʼiltak ti jmoj jtsʼunbal xchiʼuke,
4 ti jaʼik j-israeletike.* Chkʼotik ta nichʼnabiletik xchiʼuk tstaik li mukʼulale, li tratoetike,* li Mantal akʼbilike, li chʼul abtelale xchiʼuk li kʼusitik albil skʼoplale.
5 Jaʼ te lik talel stsʼunbalik ta stojolal li jmoltotaktik ta voʼnee xchiʼuk jaʼ te lik talel ta stsʼunbalik li Kristoe: li Dios ti oy ta jtojolaltik jkotoltike, akʼo yichʼ ichʼel ta mukʼ sbatel osil. Jechuk.
6 Pe maʼuk skʼan xal ti muʼyuk xkʼot ta pasel li kʼusi yaloj skʼop Diose. Yuʼun maʼuk skʼan xal ti jaʼ xa melel «Israel» skotol li buchʼutik ta Israel likemik tale.
7 Yuʼun akʼo mi jaʼik snitilulaltak* Abraan, maʼuk skʼan xal ti jaʼ xa xnichʼnab Abraan li ta sat Diose, yuʼun: «Li buchʼu tsbiin anitilulal jaʼ te chlik talel ta stojolal li Isaake».
8 Taje maʼuk skʼan xal ti jaʼ xnichʼnab Dios skotol li xnichʼnab Abraane, yuʼun jaʼik noʼox li buchʼutik chvokʼik* ta skoj li kʼusi albile, taje jaʼik li melel xnichʼnab Abraane.
9 Yuʼun xi chal li kʼusi albile: «Jaʼ jech ora chital kʼuchaʼal liʼe, vaʼun vokʼem xaʼox yol li Sarae».
10 Jaʼ noʼox ta stojolal li Sarae, yuʼun jaʼ jech kʼot ta stojolal Rebeka ek kʼalal la xchiʼin vach* ta jun noʼox vinike, ti jaʼ xnichʼnab li jmoltotik Isaak ta voʼnee:
11 yuʼun kʼalal muʼyuk toʼox vokʼemik xchiʼuk kʼalal muʼyuk toʼox spasojik li kʼusi lek xchiʼuk li kʼusi chopole, ti chichʼik tʼujel ta sventa li kʼusi tskʼan tspas Diose, ti maʼuk ta skoj yabtel krixchanoetike, ti jaʼ ta skoj li Buchʼu chtakvan ta ikʼele,
12 xi albat li Rebekae: «Tsmosoin sbankil li itsʼinale».
13 Yuʼun jech kʼuchaʼal xi tsʼibabile: «La jkʼan li Jakobe,* pe jaʼ la jpʼaj li Esaue».
14 ¿Kʼusi xuʼ xkaltik un chaʼa? ¿Mi muʼyuk tukʼilal yuʼun li Diose? ¡Mu jechuk!
15 Xi laj yalbe Moises li Diose: «Ta jkʼuxubin li buchʼu ta jkʼan ta jkʼuxubine, chkakʼbe yil xkʼuxul koʼonton li buchʼu ta jkʼan chkakʼbe yil xkʼuxul koʼontone».
16 Jaʼ yuʼun chaʼa, maʼuk ta skoj noʼox stuk li buchʼu tskʼane o ti chakʼbe yipale, jaʼ noʼox ta stojolal Dios ti oy kʼuxubinel yuʼune.
17 Li Diose xi laj yalbe Faraon* li ta tsʼibe: «Ti jech laj kakʼ to xakuxie, yuʼun jaʼ ta atojolal ta jkʼan chkakʼ ta ilel juʼelal sventa chichʼ pukel ta spʼejel balumil li jbie».
18 Jaʼ yuʼun chaʼa, mi oy buchʼu tskʼan chkʼuxubine, chkʼuxubin, pe mi tskʼan ti oy buchʼu akʼo tsatsubuk yoʼontone, tstsatsubtasbe yoʼonton.
19 Jaʼ yuʼun xi chavalbune: «¿Kʼu yuʼun chal ti oy to paltaile? ¿Buchʼu tskontrain li kʼusi tskʼan yoʼontone?».
20 Vinik, ¿buchʼuot avaloj ti chatsak ta kʼop li Diose? Li buchʼu patbile,* ¿mi lek van ti xi chalbe li buchʼu patvane: «¿Kʼu yuʼun ti jech la apatune?»?
21 ¿Mi mu oyuk ta yok ta skʼob kʼusi tspasbe achʼel li jpatpʼine,* ti ta jtos noʼox achʼel xuʼ spas junuk vaso* ti oy lek stue xchiʼuk junuk vaso ti muʼyuk stue?
22 Akʼo mi oy ta yoʼonton tskʼan chakʼ ta ilel skʼakʼal yoʼonton Dios ta stojolal li chopol krixchanoetike xchiʼuk ti chakʼ ta ilel li sjuʼele, jal la stsʼikbe li krixchanoetik taje ti jechik kʼuchaʼal vaso ti jaʼ te tskʼan chakʼ ta ilel li skʼakʼal yoʼontone xchiʼuk ti jech meltsanbilik sventa chichʼik lajesele.
23 Vaʼun li kʼusitik taje, ti jaʼ sventa chakʼ ta ilel skʼulejal smukʼulal ta stojolal li vasoetik ti kʼuxubinbilike, ti laj xa onoʼox xchapan ta sventa li mukʼulale,
24 jaʼ xkaltik, li voʼotike, ti maʼuk noʼox la stakutik ta ikʼel ta stojolal li judaetike, yuʼun la stak ta ikʼel xtok ta stojolal li jyanlumetike, ¿kʼusi xuʼ xkaltik ta sventa taje?
25 Jech kʼuchaʼal xi yaloj xtok li ta svun Osease: «Li buchʼutik maʼuk jteklumale, chkal ti jaʼ ‹jteklumale› xchiʼuk li buchʼu muʼyuk kʼanbile, ‹kʼanbil chkʼot›;
26 xchiʼuk ti bu xi laj avichʼik albele: ‹Li voʼoxuke maʼuk jteklumaloxuk›, xie, jaʼ te chavichʼik albel ‹xnichʼnab kuxul Dios›».
27 Jech xtok, xi ch-avan ta stojolal Israel li Isaiase: «Akʼo mi jaʼ jech yepal kʼuchaʼal jiʼ* ta nab li xnichʼnab Israele, jutuk noʼox li buchʼutik chkole.
28 Yuʼun chchapan krixchanoetik liʼ ta balumil li Jeovae, lek chapal tspas xchiʼuk anil tspas».
29 Jech xtok, jech kʼuchaʼal xi xa onoʼox yaloj li Isaiase: «Ti manchukuk laj yakʼ oy buchʼu kuxul chkom li Jeovae, ti jaʼ jpasmantal yuʼun anjeletike, lijkʼotutik kʼuchaʼal Sodoma ti jechuke xchiʼuk jech lijkomutik jechuk kʼuchaʼal li Gomorrae».
30 ¿Kʼusi xuʼ xkaltik un chaʼa? Akʼo mi muʼyuk la saʼik tukʼilal li jyanlumetike, la staik li tukʼilale, ti jaʼ tukʼilal ta sventa li xchʼunel oʼontonale;
31 pe akʼo mi la saʼik tukʼil mantal li Israele, muʼyuk bu la staik li mantal taje.
32 ¿Kʼu yuʼun ti jech kʼot ta pasele? Yuʼun kʼalal la saʼik li mantale, yalojik ti ta skoj noʼox yabtel tstaike, maʼuk la saʼik ta sventa li xchʼunel yoʼontonike. La smak yokik ta skoj li «ton ti tsmak okile»;
33 jech kʼuchaʼal xi onoʼox tsʼibabile: «¡Kʼelo avilik! Te chkakʼ ta Sion* li ton ti tsmak okile xchiʼuk li ton ti chjipvan ta lume, pe muʼyuk tsta loʼlael li buchʼu chakʼ xchʼunel yoʼonton ta stojolale».
Tsʼibetik ta yok vun
^ Kʼelo glosario.
^ O: «jnop kʼop»; «chi-epal kʼopoj».
^ Kʼelo glosario.
^ Kʼelo glosario.
^ O: «smomnichʼnabtak»; «stsʼunbaltak»; «stsʼakalultak».
^ O: «ch-ayanik».
^ O: «loin»; «vats».
^ Kʼelo glosario.
^ Kʼelo glosario.
^ O: «pasbile».
^ Kʼelo glosario.
^ Kʼelo glosario.
^ O: «yiʼ».
^ Kʼelo glosario.
