Santiago 1:1-27
1 Voʼon Santiagoun, smosoun Dios xchiʼuk Kajvaltik Jesukristo, ta sventa li lajchaʼvokʼ nitilulal* ti ta buyuk noʼox oyike:
¡Chabanukoxuk!
2 Kuxetuk noʼox me avoʼontonik* ta skotol kuni ermanotak kʼalal chanuptanik ta be ep ta tos prevaetike,
3 yuʼun anaʼojik mi laj yichʼ akʼel ta preva li xchʼunel avoʼontonike jaʼ chakʼ akʼo kuchuk avuʼunik.
4 Pe akʼo tsʼakiuk yabtelal ti chkuch avuʼunike sventa lek tsʼakaloxuk xchiʼuk lekoxuk ta skotol kʼusitik, chʼabaluk jsetʼuk kʼusi skʼan to avuʼunik.
5 Pe mi oy junuk avuʼunik ti skʼan to spʼijile, akʼo skʼanilanbe Dios, yuʼun tskʼupin yakʼel xchiʼuk muʼyuk bu ch-ilin, vaʼun ch-akʼbat li buchʼu tskʼane.
6 Pe oyuk me xchʼunel yoʼonton kʼalal tskʼanilane, mu me xchibetuk yoʼonton, yuʼun li buchʼu xchibet yoʼontone xkoʼolaj kʼuchaʼal yok nab ti xyukʼlajet ta ikʼe xchiʼuk ti chjipat batel ta jujujote.
7 Ta melel muʼyuk kʼusi tsmala ch-akʼbat jsetʼuk yuʼun Jeova* li vinik taje;
8 jaʼ jun vinik ti mu xnop lek yuʼun li kʼusi tspase xchiʼuk ti mu junuk noʼox be stamoje.
9 Pe li ermano ti bikʼit chakʼ sbae akʼo kuxetuk yoʼonton ta skoj ti chtoybat skʼoplale
10 xchiʼuk kuxetuk yoʼonton li jkʼulej ta skoj ti chichʼ bikʼtajesbel skʼoplale, yuʼun jech chkʼot ta stojolal jech kʼuchaʼal li xnichimal tsʼiʼleletike.
11 Chtakij yuʼun tsʼiʼleletik kʼalal solel chchikʼvan chlokʼ tal li Kʼakʼale, vaʼun li xnichimale chpʼaj xchiʼuk chlaj ti kʼupil toʼox sba spat xokone, jaʼ jech chlaj ek li jkʼulej kʼalal oy kʼusi tskʼan tstae.
12 Xmuyubaj li krixchano ti jech-o chkuch yuʼun li prevae, yuʼun mi lek ch-ilate ch-akʼbat li korona sventa kuxlejal ti jech onoʼox yaloj Jeova ta sventa li buchʼutik jech-o chkʼanate.
13 Mu me buchʼu xi chal kʼalal chil prevae: «Chakʼun ta preva li Diose». Yuʼun muʼyuk buchʼu xuʼ xakʼ ta preva ta kʼusitik chopol li Diose xchiʼuk muʼyuk buchʼu chakʼ ta preva li stuk eke.
14 Moʼoj, ta jujuntal chichʼik akʼel ta preva kʼalal tijbil yoʼontonik xchiʼuk loʼlabilik ta skoj li kʼusi tskʼan yoʼonton stukike.
15 Jech oxal kʼalal mi laj xa yakʼ yibel li kʼusi tskʼan yoʼontonike, chkʼot ta pasel li mulile, vaʼun mi laj xaʼox yichʼ pasel li mulile, chakʼ lajelal.
16 Mu xaloʼla aba atukik kuni kʼanbil ermanotak.
17 Te likem tal ta akʼol skotol li lekil matanal xchiʼuk li tukʼil matanale, te likem tal ta stojolal li Totil yuʼun lus ta vinajel* ti jech-oe o ti mu snaʼ xjel jech kʼuchaʼal chjelilan li nakʼobalile.
18 Jaʼ jech la skʼan yoʼonton ti lijvul ta lokʼel ta sventa li kʼop ti jaʼ sventa li kʼusi melele. Taje jaʼ sventa xijkʼot ta jtos sba sat tsʼunobil* ta sventa li spasbentake.
19 Naʼik me liʼe kuni kʼanbil ermanotak: skʼan me akotolikuk oyuk ta avoʼontonik xchikintael, nopik me lek kʼalal chakʼopojike, mu me xa-ilinik ta anil,
20 yuʼun maʼuk yakal tspas tukʼilal* yuʼun Dios kʼalal ch-ilin li jun krixchanoe.
21 Jaʼ yuʼun, jipik lokʼel skotol li kʼusitik ikʼike xchiʼuk skotol li choplejale, ta manxoal xachʼamik li skʼop Dios ti la stsʼun ta atojolalik ti xuʼ spojoxuke.
22 Akʼo mi jech, pasik me li kʼusi chal skʼop Diose, maʼuk ti jecheʼ noʼox chachikintaike, ti chaloʼla aba atukik ta jecheʼ nopbenale.
23 Yuʼun mi oy buchʼu jaʼ noʼox chchikinta li skʼop Diose, pe ti muʼyuk bu tspase, xkoʼolaj jech kʼuchaʼal li vinik ti tskʼel sat ta nene.*
24 Tskʼel sba, pe mi bate ta ora noʼox chchʼay xaʼi kʼusi krixchanoal.
25 Pe li buchʼu tskʼel sba lek li ta tukʼil mantal* ti chakʼ kolelal xchiʼuk ti chakʼbe-o yipal spasele, maʼuk jecheʼ noʼox chchikinta un bi, tspas li abtelale; vaʼun xmuyubaj noʼox ta spasel.
26 Mi oy junuk vinik tsnop ti chichʼ ta mukʼ Dios,* pe mi mu snaʼ spajesel li yokʼe, yakal tsloʼla yoʼonton stuk xchiʼuk chʼabal sbalil ti jech chichʼ ta mukʼ Diose.
27 Li ichʼel ta mukʼ ti sak* xchiʼuk ti muʼyuk ikʼ ta sat Jdiostik xchiʼuk Jtotike jaʼ liʼe: jchabitik li meʼon ololetike xchiʼuk li meʼon antsetik kʼalal oy tsots svokolike xchiʼuk ti chʼabaluk jpaltailtik ta balumile.
Tsʼibetik ta yok vun
^ O: «momnichʼonil»; «tsʼunbalil»; «tsʼakalulil».
^ O: «Pʼijuk noʼox me avoʼnik»; «Nichimuk noʼox me avoʼontonik».
^ Kʼelo glosario.
^ Liʼe jaʼ chalbe skʼoplal li Kʼakʼale, li Ue xchiʼuk li kʼanaletike.
^ Kʼelo glosario.
^ Kʼelo glosario.
^ O: «espejoe».
^ Kʼelo glosario.
^ O: «ti tsnop ti oy srelijione».
^ Kʼelo glosario.
