Santiago 3:1-18
3 Kuni ermanotak, maʼuk jchanubtasvanejoxuk akotolik jechuk ti kʼu avepalik chachanubtasvanike, yuʼun jnaʼojtik ti mas tsots chkichʼtik chapanele.
2 Yuʼun ep ta velta ta jmak kok* jkotoltik. Mi oy buchʼu mu smak yok ta skʼopojele jaʼ jun tukʼil vinik ti xuʼ yuʼun ta spajesel sjunul li sbekʼtal eke.
3 Mi ta jtikʼbetik sfrenoal ye li kaʼetik sventa xchʼun jmantaltike, spas kuʼuntik ta mantal skotlej.
4 Kʼelo avilik xtok li varkoetike, manchuk mi toj mukʼtik xchiʼuk chjochatik batel ta tsatsal ikʼ, ta uni bikʼit noʼox stsʼotobil ti chichʼ ikʼel batel ti bu tskʼan chbat li jtsʼotvarkoe.
5 Jaʼ jech li kokʼtik oy ta jbekʼtaltik eke, manchuk mi bikʼit noʼox, chlokʼ ta alel yuʼun kʼusiuk ti xtoyet xa ta jpas-o jbatike. ¡Kʼelo avilik ti ep chchikʼ batel teʼtikaltik li uni juteb noʼox kʼokʼe!
6 Li kokʼtike jaʼ jun kʼokʼ ek. Li kokʼtike jaʼ jtos jbekʼtaltik ti tspas choplejale xchiʼuk ti chikʼubtas sjunul li jbekʼtaltike. Xuʼ sokes jkuxlejaltik xchiʼuk xkoʼolaj kʼuchaʼal Jeena* ta skoj ti tslajesutike.
7 Yuʼun skotol li jeltos stsʼunbal jtiʼaval chonbolometike, jech kʼuchaʼal li mutetike, li chonetik ti xjochetik ta lume xchiʼuk li chanul nabe chichʼik pasel ta mantal xchiʼuk pasbilik xa ta mantal yuʼun li krixchanoetike.
8 Pe mu junuk krixchano spas yuʼun ta mantal li yokʼe. Mu stakʼ pasel ta mantal, chakʼ choplejal xchiʼuk noj ta veneno ti chmilvane.
9 Xchiʼuk ta kokʼtik ta jkʼupil kʼoptatik li Jeovae, li Totile, pe jech xtok ta kokʼtik chkalbetik kʼaʼ krixchanoetik li buchʼutik laj yichʼik pasel kʼuchaʼal «slokʼol Diose».
10 Xchiʼuk ta jun noʼox ketik chlokʼ talel bendision xchiʼuk chopol kʼoptael.
Kuni ermanotak, muʼyuk bu lek ti jech chkʼotanuk ta pasele.
11 Li ta jun noʼox nioʼe mu stakʼ te xburbun chlokʼ talel voʼ ti stakʼ uchʼel xchiʼuk li chʼail voʼe, ¿mi mu jechuk?
12 Kuni ermanotak, mu xakʼ oliva li steʼel igoe, jech xtok mu xakʼ igo li steʼel tsʼusube, ¿mi mu jechuk? Jech xtok, li chiʼpikʼan voʼe mu spas yuʼun ta voʼ ti stakʼ uchʼele.
13 ¿Buchʼu pʼij xchiʼuk lek xaʼibe smelolal avuʼunik? Akʼo yakʼ ta ilel ta slekil talelal li yabteltak ti ta manxoal tspas skotol li kʼusitik ti te chlik tal ta pʼijilale.
14 Pe mi toj echʼ xa noʼox skʼakʼal avoʼontonik xchiʼuk mi chakontrainvanike, mu me xatoyetikuk xa chapas abaik ta skoj li apʼijilike. Yuʼun chakʼotik ta jutkʼop* mi jech chapasike.
15 Maʼuk te likem talel ta akʼol li pʼijilal taje; liʼ likem ta balumil, ta chonbolom xchiʼuk ta stojolal pukujetik.
16 Yuʼun buyuk noʼox ti oy itʼixal xchiʼuk kontrainvaneje te oy xtok li kʼusi muʼyuk stukʼile xchiʼuk skotol li kʼusitik chopole.
17 Yan li pʼijilal ta toyole toj lek sak, jech xtok lek yoʼonton, oy srason, chapal sventa chchʼun mantal, lek chkʼuxubinvan xchiʼuk lek chakʼ sat, mu snaʼ xtʼujvan xchiʼuk mu snaʼ xloʼlavan.
18 Jech xtok li sat chakʼ li tukʼilale ta slekil oʼontonal tstsʼunik ta sventa li buchʼutik yakal tsaʼik li jun oʼontonale.*
Tsʼibetik ta yok vun
^ O: «ta jsaʼ jpaltailtik».
^ Jaʼ ti bu chchikʼik kʼaʼep ta spat Jerusalene. Kʼelo glosario.
^ O: «jnopkʼop»; «j-epalkʼop».
^ O: xuʼ van, «tstsʼunik li buchʼutik yakal tsaʼik li jun oʼontonale».
