Santiago 5:1-20
5 Li avie chikintao avaʼiik jkʼulejetik, okʼanik, ato avoʼontonik ta skoj ti chtal avokolike.
2 Kʼaʼem xa li akʼulejalike xchiʼuk jochʼinem xa li akʼuʼ apokʼike.
3 Oy xa xkux li a-oroik xchiʼuk li aplataike, li xkuxe jaʼ chal akʼoplalik ti oy apaltailike xchiʼuk tslajes abekʼtalik. Chkʼot kʼuchaʼal kʼokʼ ta slajebal xa kʼakʼal* li kʼusitik atsobojike.
4 ¡Kʼelo avilik! Li stojol j-abteletik ti muʼyuk bu laj avakʼbeik kʼalal la stsobik li kʼusitik lokʼ ta avosilike te yakal-o ch-avan, jech xtok kʼotem xa ta xchikin Jeova, ti jaʼ jpasmantal yuʼun anjeletik* ti x-avlajetik tskʼanik koltael li buchʼutik tstsobik li kʼusitik tsʼunbile.
5 Toj echʼem kʼusitik oy avuʼunik xchiʼuk jaʼ jech kuxuloxuk jech kʼuchaʼal chakʼanik liʼ ta sba balumile. Xkoʼolaj kʼuchaʼal jupʼem chonbolometik li avoʼontonike, ti jech-o jupʼemik jaʼ to mi sta skʼakʼalil chichʼik milele.
6 La asabeik smul; la amilik xtok li buchʼu tukʼe. ¿Mi mu tauk van skontrainoxuk?
7 Tsʼikuk me avuʼunik ermanoetik jaʼ to mi liʼ xa oy* li Kajvaltike. ¡Kʼelo avilik! Tsmala chlokʼ talel ti kʼupil sba sat li kʼusi tsʼunbil ta balumil li j-abtel ta osile, jun yoʼonton tsmala tajek jaʼ to mi vul li yorail voʼtike xchiʼuk li voʼ ti ta tsʼakal to chtale.
8 Tsʼikuk me lek avuʼunik ek xchiʼuk staojuk me yav li avoʼontonike, yuʼun chnopaj xa talel ti liʼ xa oy li Kajvaltike.
9 Ermanoetik, mu me xasabe aba amulik ta jujuntal sventa mu xavichʼik chapanel. ¡Kʼelo avilik! Te xa me vaʼal ta tiʼ na li Jchapanvaneje.
10 Ermanoetik, chanbeik me ti kʼalal laj yil svokolik ta choplejal xchiʼuk kʼalal tsʼik yuʼunik li j-alkʼopetik ti kʼopojik ta sbi Jeovae.
11 ¡Kʼelo avilik! Chkalbetik skʼoplal ti xmuyubajik noʼox* li buchʼutik kuchem yuʼunike. Li voʼoxuke avaʼiojbeik skʼoplal ti kʼu yelan kuch yuʼun li Jobe xchiʼuk laj avilik ti kʼu yelan akʼbat bendision yuʼun Jeovae, ti toj echʼ xa noʼox kʼuxutik ta yoʼonton li Jeovae xchiʼuk ti chkʼuxubinutike.
12 Li kʼusi mas tsots skʼoplale ermanoetik jaʼ ti mu xa me xavakʼ aveik* ta sventa vinajel o ta sventa balumil o ta kʼusiuk noʼox ti chavakʼ-o aveike. Yuʼun «Jech» mi xachiike, yuʼun jech, «Moʼoj» mi xachiike, yuʼun moʼoj, sventa mu xavichʼik chapanel.
13 ¿Mi oy buchʼu yakal chil svokol avuʼunik? Akʼo yakʼ ta yoʼonton spasel orasion. ¿Mi oy buchʼu xkuxet yoʼonton? Akʼo skʼejinta salmoetik.*
14 ¿Mi oy buchʼu ip avuʼunik? Akʼo stak ta ikʼel moletik* ta tsobobbail,* vaʼun akʼo spasik orasion ta stojolal, akʼo xjaxbeik aseite ta sbi Jeovae.
15 Vaʼun li orasion ti chichʼ pasel ta xchʼunel oʼontonale chpoxtaj yuʼun li buchʼu ipe* xchiʼuk chtoyat likel yuʼun Jeova. Jech xtok chichʼ pasbel perton mi spasoj smultake.
16 Jaʼ yuʼun jamal me xavalbe abaik ta jujuntal li amulike xchiʼuk pasbo me abaik orasion sventa xapoxtajik. Oy kʼusi lek tajek chkʼot ta pasel yuʼun kʼalal xvokolet li tukʼil krixchanoe.
17 Li Eliase jaʼ jech laj yaʼi sba jech kʼuchaʼal li voʼotike, yuʼun kʼalal ta sjunul yoʼonton la spas orasion ti akʼo mu xakʼ voʼe, muʼyuk onoʼox laj yakʼ voʼ oxib jabil xchiʼuk vakib u liʼ ta balumile.
18 Laje la spas orasion yan velta, vaʼun laj yakʼ talel voʼ li vinajele xchiʼuk lik chʼiuk talel ti kʼusitik ta xakʼ li balumile.
19 Kuni ermanotak, mi oy buchʼu avuʼunik ti kʼejpʼujem lokʼel ta sventa li kʼusi melele, pe mi oy buchʼu chikʼ sutel tale,
20 naʼik me ti kʼalal oy buchʼu ch-ikʼat sutel tale jaʼ sventa chichʼ pojbel xkuxlejal* li ta lajelale xchiʼuk jaʼ sventa chichʼ chʼaybel smultak.
Tsʼibetik ta yok vun
^ Kʼelo glosario.
^ Kʼelo glosario.
^ Kʼelo glosario.
^ O: «pʼij noʼox yoʼnik»; «nichim noʼox yoʼontonik».
^ Kʼelo glosario.
^ Kʼelo glosario.
^ Kʼelo glosario.
^ Kʼelo glosario.
^ O: yikʼaluk van: «li buchʼu lubtsajeme».
^ Jaʼ xkaltik, xkuxlejal li buchʼu spasoj smule.
