Tito 2:1-15
2 Li voʼote jech-o me xaval batel jech kʼuchaʼal chal li lekil chanubtasele.
2 Oyuk noʼox me spʼisol li kʼusi nopem xaʼiik spasel li moletike, yijuk snopbenik, oyuk lek xchʼulelik, lekuk xchʼunel yoʼontonik, lekuk xkʼanvanik xchiʼuk lekuk xkuch yuʼunik.
3 Jech xtok, chʼuluk* me stalelal li antsetik ti oy xa sjabilalike, skʼan mu saʼik mulil, mu me mosoinbilikuk yuʼun epal vino, jchanubtasvanejetikuk ta sventa li kʼusi leke;
4 sventa xuʼ stojobtasik li tsebal antsetik sventa akʼo skʼan li smalalike, li yalabike,
5 oyuk lek xchʼulelik, muʼyukuk yikʼobalik, j-abtel antsetikuk ta snaik,* lekikuk, akʼo yakʼ sbaik ta ventainel yuʼun smalalik sventa mu xichʼ chopol kʼoptael li skʼop Diose.
6 Jech xtok, jech-o me xavalbe mantal li kerem viniketik ti akʼo oyuk lek xchʼulelike.
7 Lekuk me ta chanel atalelal, jechuk me xapas ta kʼusiuk noʼox abtelal ti toj leke. Yijuk me anopben xavakʼ ta chanel li kʼusi sake,
8 lekuk me akʼopojel sventa mu xichʼ chopol kʼoptael, sventa staik kʼexlal li buchʼutik chkontrainvanik kʼalal muʼyuk kʼusi chopol tstaik ta jtojolaltike.
9 Skʼan me xakʼ sbaik ta ventainel ta skotol kʼusitik ta stojolal yajvalik li mosoiletike, akʼo yakʼik persa spasel kʼusi lek chil li yajvalike, mu me takʼbiluk noʼox xutik li kʼusi ch-albatike,
10 mu me kʼusi xelkʼanbeik li yajvalike, akʼo yakʼik ta ilel ti stakʼ spat yoʼonton yuʼunike, sventa xakʼbeik xnichimal ta kʼusiuk noʼox li chanubtasel yuʼun li Jkoltavanej kuʼuntike, li Diose.
11 Yuʼun laj xa yichʼ akʼel ta ilel li slekil yutsil yoʼonton Dios kʼalal laj yakʼbe skolebal skotol li krixchanoetike.
12 Chchanubtasutik ta spʼajel li kʼusi chopole xchiʼuk li kʼusitik tskʼan koʼontontik ta balumile, ti oyuk lek jchʼuleltik xijkuxie, ti tukʼutikuke* xchiʼuk ti lekuk xkichʼtik ta mukʼ Dios* ta skotol li kʼusitik oy ta balumil* avie,
13 yoʼ to ta jmalatik li jun yutsil spatobil koʼontontike xchiʼuk ti jun yutsil chvinaj li mukʼul Diose xchiʼuk li Jkoltavanej kuʼuntike, li Jesukristoe,
14 ti laj yakʼ sba stuk ta jtojolaltik sventa skoltautik lokʼel ta skotol li pas choplejale xchiʼuk la sakubtas stuk jun jteklum sventa xkʼot ta yuʼun ti stuk noʼox jeche, ti oy tajek ta yoʼonton li kʼusi toj leke.
15 Jech-o me xaval batel li kʼusitik taje, alo mantal, tukʼibtasvanan ta skoj ti la-akʼbat avabtel sventa chapas mantale. Mu me xavakʼ ti oy buchʼu spʼajote.
Tsʼibetik ta yok vun
^ Kʼelo glosario.
^ O: «tojobikuk ta sventainel snaik».
^ Kʼelo glosario.
^ Kʼelo glosario.
^ Kʼelo glosario.
