Baʼyel Kronikas 10:1-14
-
Cham li Saul xchiʼuk xnichʼnabtake (1-14)
10 Kʼalal yakal tspasik kʼop xchiʼuk Israel li jfilisteaetike, li viniketik ta Israele jatavik lokʼel ta stojolal li jfilisteaetike xchiʼuk ep laj yichʼik milel li ta vits Guilboae.+
2 Li jfilisteaetike te nopol snutsojik batel li Saul xchiʼuk xnichʼnabtake, vaʼun la smilik li Jonatan, li Abinadab xchiʼuk li Malki-Sua+ ti jaʼ xnichʼnabtak Saule.
3 Mas to tsots la stsakik ta kʼop li Saule. Li jtʼilesej flechaetike la staik ta be li Saule, vaʼun la syayijesik.+
4 Li Saule xi laj yalbe li jkuch-abtejebal yuʼune: «Lokʼeso a-espada, pajbun ochel yoʼ jech mu xilbajinikun+ mi talik li mu viniketik ti muʼyuk yichʼojik sirkunsisione».* Pe ta skoj ti chiʼ tajek li jkuch-abtejebal yuʼune, muʼyuk la spas. Jaʼ yuʼun, li Saule la stsak li s-espadae, la smil sba stuk.+
5 Kʼalal laj yil li jkuch-abtejebal ti cham xa li Saule, la smil sba stuk ta s-espada ek, jech te cham.
6 Jaʼ jech cham li Saule xchiʼuk li oxvoʼ xnichʼnabtake, jech xtok, koʼol cham xchiʼuk li buchʼutik te xchiʼukan ti te ch-abtejik ta snae.+
7 Li j-israeletik ti te oyik ta stenlejaltike laj yakʼik venta ti jatavik xa batele xchiʼuk ti chamik xa li Saul xchiʼuk xnichʼnabtake, vaʼun jatavik lokʼel li ta steklumalike. Talik li jfilisteaetike xchiʼuk jaʼ xa te kom nakiikuk.
8 Li ta yokʼomale, li jfilisteaetike bat spojbeik li kʼusitik oy yuʼunik li buchʼutik chamik ta paskʼope, vaʼun te chamem la staik ta vits Guilboa+ li Saul xchiʼuk xnichʼnabtake.
9 La spojbeik li kʼusitik oy yuʼun Saule, la xtuchʼbeik sjol xchiʼuk laj yichʼbeik batel li yabtejebtake. Laje, la stakik batel j-almantaletik ta sjunul yosil jfilisteaetik sventa xalbeik li santoetik yuʼunike+ xchiʼuk sventa xalik batel ta steklumalik.
10 Li yabtejebtake te laj yakʼik ta sna* sdiosik xchiʼuk te la sjokʼanbeik ta sna Dagon+ li sbakil sjole.
11 Kʼalal laj yaʼiik skotol li jnaklejetik ta Jabes+ ta Galaad li kʼusi la spasbeik Saul+ li jfilisteaetike,
12 totsik batel skotol li soltaroetik ti lek xuʼ yuʼunike, vaʼun la syalesbeik li sbekʼtal Saul xchiʼuk li sbekʼtal xnichʼnabtake. Laj yichʼik batel ta Jabes, te la smukbeik li sbakilik ta yolon mukʼta teʼ te ta Jabese,+ jech xtok, vukub kʼakʼal la spasik ayuno.*
13 Jaʼ jech cham Saul ta skoj ti muʼyuk tukʼ laj yakʼ sba ta stojolal Jeovae, yuʼun muʼyuk la xchʼunbe smantal li Jeovae+ xchiʼuk jaʼ bat sjakʼbe jun ants ti xchanoj espiritismoe,+
14 jaʼ muʼyuk la sjakʼbe li Jeovae. Jaʼ yuʼun, li Diose laj yakʼ chamuk li Saule xchiʼuk jaʼ xa laj yakʼ ochuk ta ajvalil li David ti jaʼ xnichʼon Jesee.+
