Baʼyel Kronikas 12:1-40
-
Li buchʼutik la skoltaik li ajvalil Davide (1-40)
12 Liʼe jaʼik li viniketik ti bat staik David te ta Siklag+ kʼalal jaʼo muʼyuk bu xuʼ xbat ta skoj li Saul+ xnichʼon Kise, jaʼik li viniketik ti lek xuʼ yuʼunik paskʼop ti la skoltaik David ta paskʼope.+
2 Lek chapal xchiʼuk s-arkoik xchiʼuk lek xtojobik ta sbatsʼikʼobik xchiʼuk ta stsʼetkʼobik*+ kʼalal tsjipik ton ta jimichʼ+ o kʼalal tstʼilesik flecha ta arkoe. Jaʼik yutsʼ yalal Saul ti likem tal ta snitilulal Benjamine.+
3 Li jolile jaʼ Aieser, li yan xtoke jaʼ Joas ti jaʼ xnichʼnab li Semaa ti jaʼ jguibea vinike;+ Jesiel xchiʼuk Pelet ti jaʼ xnichʼnab Asmavete,+ Beraka, Jeu ti jaʼ j-anatot vinike,
4 Ismaya ti jaʼ jgabaon vinike,+ lek xuʼ yuʼun paskʼop, oyik 30 ta voʼ ti lek xuʼ yuʼunik paskʼope, pe jaʼ bankilal yuʼunik li Ismayae;+ li yantike jaʼ Jeremias, Jaasiel, Joanan, Josabad ti jaʼ jguederatita vinike,
5 Elusai, Jerimot, Bealias, Semarias, Sefatias ti jaʼ j-arifita vinike,
6 Elkana, Isias, Asarel, Joeser, Jasobeam ti jaʼ jkoreetike;+
7 Joela xchiʼuk Sebadias ti jaʼ xnichʼnab Jeroam ta Guedore.
8 Jlom jgadetike bat staik li David ti te oy ta jun chʼen ta takixokol balumile;+ li buchʼutik batike lek xuʼ yuʼunik paskʼop, yuʼun lek chanubtasbilik, stsakoj lek smukʼta eskudoik* xchiʼuk slansaik, xkoʼolaj kʼuchaʼal sat leon li satike xchiʼuk lek xtojobik ta anil kʼuchaʼal gaselaetik kʼalal chanavik ta vitstikaltike.
9 Li jolile jaʼ Eser, li xchaʼvoʼale jaʼ Abdias, li yoxvoʼale jaʼ Eliab,
10 li xchanvoʼale jaʼ Mismana, li svoʼobale jaʼ Jeremias,
11 li svakvoʼale jaʼ Atai, li svukvoʼale jaʼ Eliel,
12 li xvaxakvoʼale jaʼ Joanan, li sbalunvoʼale jaʼ Elsabad,
13 li slajunvoʼale jaʼ Jeremias, li xbuluchvoʼale jaʼ Makbanai.
14 Taje jaʼik jgadetik,+ jaʼik bankilaletik yuʼun soltaroetik. Li buchʼu jutuk xuʼ yuʼune koʼol xuʼ yuʼun kʼuchaʼal sien ta voʼ, li buchʼu lek xuʼ yuʼune koʼol xuʼ yuʼun kʼuchaʼal jmil ta voʼ.+
15 Taje jaʼik li viniketik ti la xtuchʼik jelavel Jordan kʼalal nojem tajek yok li ukʼum ti chmal to lokʼel ta jujujot stiʼile, jaʼo kʼot ta pasel li ta sba ue, jech xtok, la snutsik lokʼel skotol li buchʼutik te nakajtik ta stenlejaltike, jaʼ to ti kʼuxi la spuk sba batel yuʼunik ta slokʼeb kʼakʼal xchiʼuk ta smaleb kʼakʼale.
16 Oy jayvoʼ viniketik ta Benjamin xchiʼuk ta Juda ti bat staik ek li David ti bu snakʼoj* sbae.+
17 Li Davide lokʼ snupan ta be xchiʼuk xi laj yale: «Mi jun avoʼonton tal akoltaikune, ta jpas ta jmoj koʼontontik un bi, pe mi jaʼ sventa chtal aloʼlaikun yoʼ xavakʼikun ta skʼob kajkontratak akʼo mi muʼyuk kʼusi chopol jpasoje, jaʼ xil stuk li Sdios jmoltotaktike xchiʼuk jaʼ chchapan».+
18 Vaʼun, li Amasai ti jaʼ jolil yuʼunik li 30 ta voʼe lik ventainatuk* yuʼun li espiritue,+ xi laj yale:
«Voʼot aventainojunkutik, David, liʼ oyunkutik ta atojolale, xnichʼon Jese.+
Junuk avoʼonton, junuk avoʼonton li voʼote, David, xchiʼuk junuk yoʼonton li buchʼu tskoltaote,yuʼun yakal tskoltaot li Adiose».+
Jaʼ yuʼun, chʼamatik yuʼun li Davide xchiʼuk albatik ti akʼo batikuk ta stojolal li bankilaletik yuʼun soltaroetike.
19 Kʼalal bat xchiʼin jfilisteaetik li David sventa stsakik ta kʼop li Saule, bat koltaatuk yuʼun jayvoʼ viniketik ta Manases; pe li Davide muʼyuk la skolta li jfilisteaetike, yuʼun li bankilaletik yuʼun jfilisteaetike+ laj yalik ti mu xuʼ xbate, xi laj yalike: «Naka me te spas ta jmoj sjol xchiʼuk li Saul ti jaʼ yajvale, vaʼun xuʼ te xkichʼtik milel jkotoltik».+
20 Liʼe jaʼ li viniketik ta Manases ti bat xchiʼinik David kʼalal bat ta Siklague:+ Adna, Josabad, Jediael, Miguel, Josabad, Eliu xchiʼuk Siletai ti jaʼ bankilaletik ti sbainojik jmil ta voʼ viniketik ta Manasese.+
21 La skoltaik David ta stsakel ta kʼop li jtsop j-elekʼetike, yuʼun lek xuʼ yuʼunik skotolik xchiʼuk lek tsots yoʼontonik,+ jaʼ yuʼun kʼotik ta bankilaletik yuʼun soltaroetik.
22 Jujun kʼakʼal ep buchʼutik chkʼot ti bu oy li David+ sventa skoltaike, jaʼ to ti kʼuxi epaj yajsoltarotak jech kʼuchaʼal yepal yajsoltarotak li Diose.+
23 Liʼe jaʼ skʼoplal li soltaroetik ti lek chapal xchiʼuk yabtejebik sventa paskʼop ti bat skʼelik David te ta Ebrone+ yoʼ stikʼik ta ajvalil ta xkʼexol Saul jech kʼuchaʼal yaloj mantal Jeovae.+
24 Li viniketik ta Juda ti stsakoj smukʼta eskudoik* xchiʼuk slansaike jaʼik 6,800 ta voʼ ti chapalik sventa paskʼope.
25 Li ta snitilulal jsimeonetike jaʼik 7,100 ta voʼ soltaroetik ti lek xuʼ yuʼunike xchiʼuk ti lek tsots yoʼontonike.
26 Li ta snitilulal jlevietike jaʼik 4,600 ta voʼ.
27 Li Jeoiadae+ jaʼ jnitvanej yuʼunik li xnichʼnabtak Aarone,+ te xchiʼuk 3,700 ta voʼ viniketik,
28 te tal ek li Sadoke,+ jun kerem ti lek xuʼ yuʼun xchiʼuk ti lek tsots yoʼontone, te xchiʼuk 22 ta voʼ bankilaletik li ta jujuchop yutsʼ yalale.
29 Li ta snitilulal jbenjaminetik ti jaʼ xchiʼiltak li Saule+ jaʼik oxmil, pe jaʼ ep li buchʼutik tukʼ toʼox yakʼoj sbaik ta stojolal li yutsʼ yalal Saule.
30 Li ta snitilulal j-efrainetike jaʼik 20,800 ta voʼ viniketik ti lek xuʼ yuʼunike, lek tsots yoʼontonik xchiʼuk lek ojtikinbilik li ta jujuchop yutsʼ yalalike.
31 Li ta j-oʼlol snitilulal Manasese jaʼik 18 mil ti jaʼ takatik batel sventa stikʼik ta ajvalil li Davide.
32 Li ta snitilulal Isakare jaʼik chib sien viniketik ti xaʼibeik smelolal li kʼusi chkʼot ta pasele xchiʼuk snaʼojik kʼusi xuʼ spas li Israele, jaʼik joliletik ti jaʼ tspasik ta mantal skotol li yutsʼ yalalike.
33 Li ta snitilulal Sabulone jaʼik 50 mil ti chtunik ta soltaroale, lek chapal xchiʼuk yabtejebik sventa paskʼop xchiʼuk jaʼ noʼox ta stojolal David ti tukʼ yakʼoj sbaike.*
34 Li ta snitilulal Neftalie jaʼik jmil ta voʼ bankilaletik ti te xchiʼukik 37 mil viniketik ti stsakoj smukʼta eskudoik* xchiʼuk slansaike.
35 Li ta snitilulal jdanetike jaʼik 28,600 ta voʼ ti lek chapalik sventa paskʼope.
36 Li ta snitilulal Asere jaʼik 40 mil ti chtunik ta soltaroal ti lek chapalik sventa paskʼope.
37 Li ta snitilulal jrubenetik, jgadetik xchiʼuk li ta j-oʼlol snitilulal Manases ti te nakalik ta jot Jordane+ jaʼik 120 mil soltaroetik ti oy ep ta tos yabtejebik sventa paskʼope.
38 Skotolik taje jaʼik soltaroetik ti lek chapalik sventa paskʼope; ta sjunul yoʼontonik batik ta Ebron sventa stikʼik ta ajvalil ta sjunul Israel li Davide. Li yan j-israeletik eke jech tskʼanik* ti akʼo ochuk ta ajvalil li Davide.+
39 Oxib kʼakʼal te kom xchiʼinik li Davide, te veʼik xchiʼuk uchʼbolajik, yuʼun jech xchapanoj li yermanotakike.
40 Skotol li buchʼutik te nopol nakale xchiʼuk li buchʼutik te to nakalik ta Isakar, ta Sabulon xchiʼuk ta Neftalie la xkuchik tal veʼliletik ta vuroetik, ta kameyoetik, ta mulaetik xchiʼuk ta vakaxetik, laj yichʼik tal arina, pan ti pasbil ta takin sat igo xchiʼuk ta sat uvae, laj yichʼik tal vino, aseite, vakaxetik xchiʼuk epal chijetik, yuʼun xkuxet yoʼontonik li ta Israele.
Tsʼibetik ta yok vun
^ O «surtokʼobik».
^ O «makobbailik».
^ O «smukoj».
^ Literal «pixatuk».
^ O «makobbailik».
^ O «mu chibuk yoʼontonik li buchʼutik chakʼ sbaik ta stojolal Davide».
^ O «makobbailik».
^ Literal «jun yoʼontonik».
