Baʼyel Kronikas 14:1-17
14 Li ajvalil Iram+ ta Tiroe la stak batel j-almantaletik ta stojolal li Davide, jech xtok, la stakbe batel sedro teʼ, alvaniletik ti tsvaʼanik muroetike xchiʼuk viniketik ti chabtelanik teʼ sventa xichʼ vaʼanbel sna* li Davide.+
2 Li Davide laj yakʼ venta ti vaʼanat xa lek yuʼun Jeova ta ajvalil li ta Israele,+ jech xtok, li Diose mas to la stsak yip yuʼun li ajvalilal* tspas Davide sventa slekilal li steklumal Israele.+
3 Li Davide laj to saʼ yan yajniltak+ li ta Jerusalene, jaʼ yuʼun vokʼ to yan skeremtak xchiʼuk stsebetak.+
4 Li xnichʼnabtak ti te vokʼik ta Jerusalene+ jaʼ sbi Samua, Sobab, Natan,+ Salomon,+
5 Ibar, Elisua, Elpelet,
6 Noga, Nefeg, Jafia,
7 Elisama, Beeliada xchiʼuk Elifelet.
8 Kʼalal laj yaʼi jfilisteaetik ti och xa ta ajvalil ta sjunul Israel li Davide,+ skotolik bat stsakik ta kʼop.+ Kʼalal laj yaʼi li Davide, lokʼ stsak ta kʼop.
9 Li jfilisteaetike ochik batel xchiʼuk te lik tsakvanikuk ta kʼop ta stenlejaltik Refaim.+
10 Li Davide xi la sjakʼbe li Diose: «¿Mi chmuy jtsak ta kʼop li jfilisteaetike? ¿Mi chavakʼbun ta jkʼob?». Xi takʼbat yuʼun li Jeovae: «Batan, yuʼun persa chkakʼbot ta akʼob».+
11 Jaʼ yuʼun, li Davide muy batel ta Baal-Perasim,+ te la smil li jfilisteaetike. Xi laj yale: «Li melel Diose la sjambun ochel jbe ti bu oy li kajkontratak jech kʼuchaʼal lek jamal chkom yuʼun be li voʼ ti xbalakʼin noʼoxe». Jech oxal, Baal-Perasim* laj yakʼbe sbi li osil taje.
12 Li jfilisteaetike te xa busul laj yiktaik li diosetik yuʼunike, laje laj yichʼ chikʼel li diosetike,+ yuʼun jech laj yal mantal li Davide.
13 Ta tsʼakale, bat tsakvanikuk ta kʼop xtok li jfilisteaetik li ta stenlejaltike.+
14 Li Davide la sjakʼbe yan velta li Diose, pe xi xa takʼbat yuʼun li melel Diose: «Mu tukʼuk xbat atsak ta kʼop, jaʼ lek bat joyo tal ta spatik, vaʼun te xatsak ta kʼop ta yeloval li bikʼtal teʼetik bakae.*+
15 Mi laj avaʼi ti xkoʼolaj xa oy buchʼutik te xchajlajet tal li ta bikʼtal teʼetik bakae,* bat me tsako ta kʼop, yuʼun jaʼ xa jbabe batel avuʼun li melel Dios sventa smil li yajsoltarotak jfilisteaetike».+
16 Li Davide jech tajek la spas jech kʼuchaʼal albat yuʼun li melel Diose,+ lik smilik li soltaroetik yuʼun jfilisteaetik te ta Gabaon kʼalal to ta Guesere.+
17 Li Davide puk batel skʼoplal ta skotol li jteklumetike, jech xtok, li Jeovae laj yakʼ ti xiʼtaik David skotol li mukʼtik lumetike.+
Tsʼibetik ta yok vun
^ O «spasob mantal».
^ Jaʼ skʼan xal ‹yajval li buchʼu tsjam batel bee›.
^ Li jpʼel kʼop «bakae» te likem tal ta ebreo kʼop ti «okʼel» skʼan xale, mu stakʼ naʼel lek kʼu yelan li bikʼtal teʼetik taje.
^ Li jpʼel kʼop «bakae» te likem tal ta ebreo kʼop ti «okʼel» skʼan xale, mu stakʼ naʼel lek kʼu yelan li bikʼtal teʼetik taje.
