Baʼyel Kronikas 18:1-17
18 Te van kʼuk sjalil ta tsʼakale, li Davide la stsal xchiʼuk och ta skʼob li jfilisteaetike,+ jech xtok, la spojbe jfilisteaetik li Gat+ xchiʼuk li bikʼtal lumetik ti te noʼox nopajtike.*
2 Ta tsʼakale, la stsal li Moabe,+ vaʼun li jmoabetike kʼotik ta yajtunel David xchiʼuk tstojbeik patan.+
3 Li ajvalil Adadeser+ ta Sobae+ bat ta stsʼel ukʼum Eufrates+ yoʼ xlik sventain. Kʼalal ta be xa ox xlokʼ batele, te tsalat yuʼun David ta stsʼel Amat.+
4 Jech xtok, li Davide la spojbe batel jmil ta kot kareta, la xchuk batel vukmil viniketik ti kajajtik ta kaʼe xchiʼuk 20 mil soltaroetik ti ta yakan chbatike.+ Vaʼun, li Davide la syayijesbe spat yoʼ li kaʼetik ti xjochojik batel karetaetike. Sien xa noʼox ta kot ti muʼyuk jech la spasbee.+
5 Li jsiriaetik likemik ta Damaskoe bat skoltaik li ajvalil Adadeser ta Sobae, pe li Davide la smil 22 mil jsiriaetik.+
6 Li Davide la svaʼan soltaroetik li ta Siria ta Damaskoe. Jech xtok, li jsiriaetike kʼotik ta yajtuneltak David xchiʼuk tstojbeik patan. Li Jeovae la skolta David sventa xkuch yuʼun paskʼop ti buyuk noʼox chbate.+
7 Li David xtoke la spojbe li s-eskudoik* yajtuneltak Adadesere, set-set li eskudoetike xchiʼuk ta oro pasbil, laj yichʼ batel ta Jerusalen.
8 Li ajvalil Davide ep tajek laj yichʼ lokʼel kovre li ta Tibat xchiʼuk ta Kun ti jaʼ sventainoj li Adadesere. Li kovree jaʼ la stunes Salomon sventa spas-o li Nab ta kovree,+ li oyetike xchiʼuk li yan kʼusitik chtun ti ta kovre pasbile.+
9 Li ajvalil Tou ta Amate laj yaʼi ti laj xa stsalbe skotol yajsoltarotak ajvalil Adadeser+ ta Soba+ li Davide.
10 Jaʼ yuʼun, ta ora noʼox la stak batel ta stojolal ajvalil David li xnichʼon ti Adoram sbie sventa xbat sjakʼbe kʼu yelan oy xchiʼuk sventa skʼupil kʼopta li Davide, yuʼun la stsal li Adadesere (yuʼun li Toue tsaʼat onoʼox ta kʼop yuʼun li Adadesere), jech xtok, la stakbe batel li kʼusitik pasbil ta oro, ta plata xchiʼuk ta kovree.
11 Li ajvalil Davide la xchʼultajes sventa Jeova li kʼusitik taje+ jech kʼuchaʼal la xchʼultajes li plata xchiʼuk oro ti la spojbe talel li jyanlumetike: jaʼ li j-edometik, jmoabetik, j-ammonetik,+ jfilisteaetik+ xchiʼuk li j-amaleketike.+
12 Li Abisai+ ti jaʼ yol Seruyae+ la smil 18 mil j-edometik li ta stenlejaltik Atsʼame.+
13 La svaʼan jtsop soltaroetik ta Edom, vaʼun kʼot ta yajtuneltak David skotol li j-edometike.+ Li Jeovae la skolta David sventa xkuch yuʼun paskʼop ti buyuk noʼox chbate.+
14 Li Davide jech-o la spas mantal ta sjunul li Israele+ xchiʼuk tukʼ chchapan skotol li krixchanoetike.+
15 Li Joab ti jaʼ yol Seruyae jaʼ sbainoj li soltaroetike,+ li Jeosafat+ ti jaʼ xnichʼon Ailude jaʼ yabtel tstsʼiba skotol li kʼusitik chkʼot ta pasele.
16 Li Sadok xnichʼon Aitub xchiʼuk li Aimelek xnichʼon Abiatare jaʼ paleetik. Li Savsae jaʼ sekretario.
17 Li Benaya ti jaʼ xnichʼon Jeoiadae jaʼ sbainoj li jkeretitaetik+ xchiʼuk li jpeletitaetike.+ Li xnichʼnabtak David eke kʼotik ta bankilal j-abteletik.
