Baʼyel Kronikas 21:1-30
21 Li Satanase* lik skontrain li Israele, jaʼ yuʼun la stijbe yoʼonton David sventa xchap li j-israeletike.+
2 Vaʼun, li Davide xi laj yalbe li Joabe+ xchiʼuk li bankilaletik ta jteklume: «Batanik, bat chapik jayvoʼ j-israeletik oy ti chlik ta Beer-Seba kʼalal to ta Dane;+ xtal avalbeikun ta tsʼakal sventa jnaʼ jayvoʼ oy».
3 Pe li Joabe xi la stakʼe: «¡Ti kʼu yepal oy li steklumale akʼo yepajes sien ta velta li Jeovae! Kajval, voʼot li ajvalilote, ¿mi mu jaʼuk xa yajtuneltak skotol li kajvale chaʼa? ¿Kʼu yuʼun tskʼan chchap li ajvalil kuʼune? ¿Kʼu yuʼun ti tskʼan tsta smul yuʼun li Israele?».
4 Pe jaʼ jelav skʼop li ajvalile, jaʼ muʼyuk xchʼunbat li Joabe. Jaʼ yuʼun, lokʼ batel li Joabe, bat xan sjunul li Israele, laje sut talel ta Jerusalen.+
5 Vaʼun, li Joabe laj yakʼbe David li slistail jayvoʼ lokʼ ta tsakbel sbiike. Ta skotol Israele oy 1,100,000 ta voʼ soltaroetik ti xchukinoj s-espadaike, li ta Judae jaʼ oy 470 mil soltaroetik ti xchukinoj s-espadaike.+
6 Pe li snitilulal Levi xchiʼuk snitilulal Benjamine muʼyuk laj yichʼ tsakbel sbiik,+ yuʼun li Joabe chopol tajek laj yaʼi+ li kʼusi laj yal ajvalile.
7 Taje toj chopol tajek laj yil li melel Diose, jaʼ yuʼun la syayijes li Israele.
8 Li Davide xi laj yalbe li melel Diose: «Tsots la jta jmul+ ti jech la jpase. Avokoluk, chʼaybo smul li avajtunele,+ yuʼun toj bol xa noʼox tajek li kʼusi la jpase».+
9 Vaʼun, kʼoponat yuʼun Jeova li Gad+ ti oy onoʼox kʼusi ch-akʼbat yil ti nopem xaʼi chalbe li Davide. Xi albate:
10 «Xi xbat avalbe li Davide: ‹Xi chal li Jeovae: «Oy oxtos kastigo jnopoj chkakʼ taluk, tʼujo bu junukal chakʼan»›».
11 Jech oxal, li Gade och batel ti bu oy li Davide, xi laj yalbee: «Xi chal li Jeovae:
12 ‹Tʼujo mi jaʼ chakʼan ti chtal oxib jabil viʼnal ta alumale+ o mi jaʼ chakʼan ti oxib u tstsalot li avajkontratake xchiʼuk ti tsmilikot ta s-espadaike+ o mi jaʼ chakʼan ti oxib kʼakʼal chtal li s-espada Jeovae, jaʼ xkaltik, ti chtal tsatsal chamel ta alumale,+ ti chtal lajesvanuk ta sjunul yosilal Israel li yaj-anjel Jeovae›.+ Nopo lek bu jtosukal chakʼan sventa xkalbe li buchʼu la stakun tale».
13 Li Davide xi la stakʼbe li Gade: «Toj tsots chkaʼi maʼ taje. Avokoluk, jaʼ lek ti xi-och ta skʼob li Jeovae, yuʼun toj ep kʼuxubinel yuʼun.+ Pe mu jkʼan ti xi-och ta skʼob viniketike».+
14 Vaʼun, li Jeovae laj yakʼ taluk jtos chamel li ta Israele,+ chamik 70 mil krixchanoetik ta Israel.+
15 Jech xtok, li melel Diose la stak batel jun anjel sventa slajes li Jerusalene, pe kʼalal laj yil Jeova ti jech xa ox tspase, chopol laj yaʼi sba* ta skoj li vokolile,+ jech oxal xi laj yalbe li anjel ti tal slajes li jteklume: «¡Moʼoj xa!+ Yaleso xa li akʼobe». Li yaj-anjel Jeovae te oy ta stsʼel yikʼaobil strigo Ornan,+ li jebus vinike.+
16 Kʼalal la stoy muyel sat li Davide, laj yil ti te oy ta oʼlol vinajel xchiʼuk balumil li yaj-anjel Jeovae, syeʼoj batel ta Jerusalen li s-espadae.+ Li David xchiʼuk li moletik ti slapojik chʼixal kʼuʼile*+ ta ora noʼox la snijan spatan sbaik ta lumtik.+
17 Li Davide xi laj yalbe li melel Diose: «¿Mi mu voʼonuk ti laj kal ti akʼo yichʼik chapel li jteklume? Voʼon ti oy jmule, voʼon ti chopol kʼusi la jpase.+ Pe li chijetik liʼe..., ¿kʼusi smul la spasik? Jeova Dios kuʼun, voʼon akʼbun kastigo xchiʼuk li buchʼutik te oy ta sna jtote, pe mu xavakʼbe svokol li ateklumale».+
18 Li yaj-anjel Jeovae laj yalbe Gad+ ti xalbe David ti muyuk batel ti bu oy li yikʼaobil strigo Ornane, li jebus vinike,+ sventa te spasbe skajleb smoton li Jeovae.
19 Li Davide muy batel jech kʼuchaʼal albat yuʼun li Gade, yuʼun jech laj yal ta sbi Jeova.
20 Kʼalal joypʼij li Ornane, laj yil ti te oy li anjele, vaʼun li chanvoʼ xnichʼnabtak ti te xchiʼuke bat snakʼ* sbaik. Li Ornane jaʼo yakal tsmaj strigo.
21 Kʼalal kʼot li Davide, taat ta ilel yuʼun li Ornane, jaʼ yuʼun li Ornane ta anil lokʼ talel ti bu yakal chikʼa strigoe xchiʼuk la skejan spatan sba ta lumtik ta stojolal li Davide.
22 Li Davide xi laj yalbe li Ornane: «Chonbun* li yikʼaobil atrigoe sventa te jpasbe skajleb smoton li Jeovae. Lek tsʼakal ta jtojbot yoʼ xpaj li vokolil oy ta jteklume».+
23 Pe li Ornane xi la stakʼbe li Davide: «Ichʼo, kajval, akʼo spas li kʼusi lek chil* li ajvalile. Chkakʼbot li vakaxetik sventa xavakʼ ta chikʼbil matanale, tuneso ta siʼ li smajobil* trigoe,+ jech xtok, chkakʼbot li trigo sventa xavakʼ ta matanal sat tsʼunobiletike. Chkakʼbot skotol».
24 Pe li ajvalil Davide xi la stakʼbe li Ornane: «Mu stakʼ jech, persa tsʼakal lek ta jtojbot. Mu stakʼ xkakʼbe Jeova xchiʼuk mu stakʼ xkakʼbe ta chikʼbil matanal li kʼusi muʼyuk jmanoje, yuʼun jaʼ to avuʼun».+
25 Jaʼ yuʼun, li Davide laj yakʼbe Ornan vakib sien siklo* oro ti lek pʼisbile sventa stojbe li yosile.
26 Vaʼun, li Davide la spasbe li skajleb smoton+ Jeovae, te laj yakʼ chikʼbil matanaletik xchiʼuk milbil matanaletik sventa jun oʼontonal, te lik skʼanbe vokol li Jeovae. Li senyail ti takʼbate jaʼ ti yal tal kʼokʼ+ ta vinajel ti te kʼot ta sba li skajleb chikʼbil matanale.
27 Jaʼ yuʼun, li Jeovae laj yalbe mantal li anjel+ ti akʼo stikʼ sutel ta sna li s-espadae.
28 Li vaʼ kʼakʼale, kʼalal laj yil David ti aʼibat skʼop yuʼun Jeova li ta yikʼaobil strigo Ornan, li jebus vinike, te-o laj yakʼ milbil matanal.
29 Pe li vaʼ kʼakʼale, li axibalna yuʼun Jeova ti te la spas ta takixokol balumil li Moisese xchiʼuk li skajleb chikʼbil matanale te oy ta tayal kʼopojebal* ta Gabaon.+
30 Pe li Davide muʼyuk-o ayem ta Gabaon sventa sjakʼbe li Diose, yuʼun xiʼem tajek kom ta skoj li s-espada yaj-anjel Jeovae.
Tsʼibetik ta yok vun
^ O jaʼ van skʼoplal «Jun jkontrainvanej».
^ O «laj yat yoʼonton».
^ O «smuk».
^ Literal «Akʼbun».
^ Literal «lek chil ta sat».
^ Li jun sikloe jaʼ 11.4 gramo yalal. Kʼelo Apendise B14.
