Baʼyel Kronikas 22:1-19
22 Xi laj yal li Davide: «Liʼe jaʼ sna Jeova, li melel Diose, liʼ xtoke jaʼ jun skajleb matanal ti jaʼ te chakʼik chikʼbil matanal li Israele».+
2 Li Davide laj yal mantal ti akʼo stsobik skotol li jyanlumetik+ ti te nakalik ta yosilal Israele, jaʼ la svaʼanan ta jtuchʼtonetik* sventa setik lek li tonetik ti jaʼ tsvaʼanbeik-o li sna melel Diose.+
3 Li David xtoke la xchapan epal tsatsal takʼinetik sventa xtun ta xlauxal li tiʼ naetike xchiʼuk sventa xtun ta stsakleb kʼusitik, jech xtok, ep tajek la stsob kovre ti mu xa noʼox xlaj ta pʼisel ti kʼu yepale,+
4 la stsob epal sedro teʼ+ xtok, yuʼun li jsidonetik+ xchiʼuk li jtiroetike+ ep tajek sedro teʼ laj yichʼbeik talel li Davide.
5 Xi laj yal li Davide: «Toj kerem to li jnichʼon Salomone xchiʼuk muʼyuk to kʼusi ep xchanoj spasel,+ pe li sna Jeova chichʼ vaʼanbele jun yutsil tajek,+ chpuk batel skʼoplal ta skotol lumetik+ ti yan sba yutsile,+ jaʼ yuʼun ta jchapan komel li kʼusitik chtune». Jech oxal, li Davide ep tajek kʼusi la xchapan komel kʼalal kuxul toʼoxe.
6 Jech xtok, la stak ta ikʼel li Salomon ti jaʼ xnichʼone, laj yalbe mantal ti skʼan svaʼanbe sna li Jeovae, li Sdios Israele.
7 Li Davide xi laj yalbe li Salomon ti jaʼ xnichʼone: «Li voʼone oy tajek ta koʼonton ta jvaʼan jpʼejuk na sventa sbi li Jeova Dios kuʼune.+
8 Pe xi laj yalbun li Jeovae: ‹Toj ep amaloj chʼichʼ xchiʼuk toj ep apasoj kʼop. Mu voʼotukot chavaʼan li na sventa jbie,+ yuʼun kiloj ti toj ep amaloj chʼichʼ ta sba balumile.
9 Pe chvokʼ jun anichʼon+ ti jun noʼox yoʼonton chkuxie,* muʼyuk chkakʼ tsakatuk ta kʼop yuʼun yajkontratak ti te oy ta spat xokone,+ Salomon*+ tsbiin. Jech xtok, muʼyuk buchʼu tstsakat ta kʼop kuʼun li Israele xchiʼuk jun noʼox yoʼontonik ti kʼu sjalil kuxule.+
10 Jaʼ tsvaʼanbun jpʼej na sventa li jbie.+ Jaʼ chkʼot ta jnichʼon, voʼon chikʼot ta stot.+ Lek staoj yav chkom kuʼun sbatel osil li ajvalilal* tspas ta Israele›.+
11 »Jaʼ yuʼun, kuni nichʼon, te akʼo xchiʼinot li Jeovae xchiʼuk lekuk xbat avuʼun li kʼusi chapase, vaʼanbo me li sna Jeova Dios avuʼune, yuʼun jech onoʼox yaloj ti voʼot chavaʼane.+
12 Akʼo yakʼbot apʼijil li Jeovae xchiʼuk akʼo skoltaot ta yaʼibel smelolal+ kʼalal mi lik yakʼ aventain li Israele sventa xchʼunbe avuʼun smantal li Jeova Dios avuʼune.+
13 Lek me chabat mi chavakʼ lek ta avoʼonton xchʼunbel li smantaltake+ xchiʼuk li kʼusitik xchapanoj Jeova ti laj yalbe Moises ti akʼo xalbe li Israele.+ Tsotsuk avoʼonton xchiʼuk mu me xachibaj. Mu xaxiʼ xchiʼuk mu xnik avoʼonton.+
14 Kʼelavil, tsots laj kakʼ kip ta stsobel 100 mil talento* oro xchiʼuk jun miyon talento plata sventa xichʼ vaʼanbel li sna Jeovae, ep la jtsob kovre xchiʼuk tsatsal takʼinetik+ ti mu xa noʼox xlaj ta pʼisele, jchapanoj ep teʼetik xchiʼuk tonetik,+ pe chasabe to stsʼak.
15 Ep buchʼutik liʼ oy ti tskoltaot ta abtele: oy jtuchʼtonetik,* alvaniletik,+ buchʼutik chabtelanik teʼ xchiʼuk yantik ti lek xchanojik yan abtelale.+
16 Li oro, plata, kovre xchiʼuk li tsatsal takʼine mu xa noʼox xlaj ta pʼisel,+ jaʼ yuʼun chapano aba xchiʼuk likeso li abtelale. Te akʼo xchiʼinot li Jeovae».+
17 Li Davide laj yalbe mantal skotol bankilaletik ta Israel ti akʼo skoltaik ta abtel li Salomon ti jaʼ xnichʼone, xi laj yalbe yaʼiike:
18 «¿Mi mu liʼuk xchiʼinojoxuk li Jeova Dios avuʼunike xchiʼuk mi mu junuk noʼox avoʼontonik yuʼun? Yuʼun yakʼojbun xa ta jkʼob li jnaklejetik ta lume, li osile och xa ta skʼob Jeova xchiʼuk ta skʼob li steklumale.
19 Jaʼ yuʼun, ta sjunuluk avoʼontonik xchiʼuk ta sjunuluk akuxlejalik* xasaʼik li Jeova Dios avuʼunike+ xchiʼuk lik xa noʼox vaʼanik li xchʼulna Jeovae, li melel Diose,+ sventa xichʼ ichʼel talel li xkaxail strato Jeovae xchiʼuk li kʼusitik chʼul ti akʼbil ta stojolal melel Diose,+ te xavakʼik li ta na ti chichʼ vaʼanel sventa li sbi Jeovae».+
Tsʼibetik ta yok vun
^ O «jbojtonetik».
^ Literal «ti chkux noʼoxe».
^ Te likem tal ta jpʼel kʼop ta ebreo ti jaʼ skʼan xal ‹jun oʼontonal›.
^ Li jun talentoe jaʼ 34.2 kilo yalal. Kʼelo Apendise B14.
^ O «jbojtonetik».
