Baʼyel Kronikas 23:1-32
23 Kʼalal mol xa ox li Davide xchiʼuk kʼalal jutuk xa ox skʼan xchame, la stikʼ ta ajvalil ta Israel li xnichʼon ti jaʼ li Salomone.+
2 La stsob skotol li bankilaletik ta Israele, li paleetike+ xchiʼuk li jlevietike.+
3 Laj yichʼik chapel li jlevietik ti 30 o ti mas ta 30 jabil yichʼojike;+ ti kʼu yepal laj yichʼik chapele jaʼ 38 mil.
4 Ti vaʼ yepalike, 24 mil chtunik ta jkʼel-abtelal li ta sna Jeovae xchiʼuk vakmil chtunik ta j-abteletik xchiʼuk ta jchapanvanejetik.+
5 Chanmil chtunik ta jchabitiʼnaetik+ xchiʼuk chanmil ti jaʼ tskʼupil kʼoptaik+ li Jeova ti jaʼ tstijik li stijobiltak son ti xi laj yalbe skʼoplal li Davide: «La jpas sventa jaʼ xichʼ-o kʼupil kʼoptael li Diose».
6 Vaʼun, li Davide ta jujuvokʼ la xchʼak+ li xnichʼnabtak Levie: li Guerson, Koat xchiʼuk Merarie.+
7 Li snitilulal jguersonetike jaʼik Ladan xchiʼuk Simei.
8 Li xnichʼnabtak Ladane jaʼik Jeiel, Setam xchiʼuk Joel,+ oxvoʼik. Li Jeiele jaʼ jolil.
9 Li xnichʼnabtak Simeie jaʼik Selomot, Asiel xchiʼuk Aran, oxvoʼik. Taje jaʼik li joliletik ta jujuchop yutsʼ yalalik ta snitilulal Ladane.
10 Li xnichʼnabtak Simeie jaʼik Jaat, Sina, Jeus xchiʼuk Berias. Li chanvoʼ taje jaʼik xnichʼnabtak li Simeie.
11 Li Jaate jaʼ jolil, li xchaʼvoʼale jaʼ Sisa. Ta skoj ti muʼyuk ep skeremik li Jeus xchiʼuk Beriase, ta jchop noʼox utsʼ alalil laj yichʼik tsakel ta venta, jtos noʼox li kʼusi akʼbat sbainike.
12 Li xnichʼnabtak Koate jaʼik Amram, Isar,+ Ebron xchiʼuk Usiel,+ chanvoʼik.
13 Li xnichʼnab Amrame jaʼik Aaron+ xchiʼuk Moises.+ Pe li Aaron xchiʼuk xnichʼnabtake jaʼ laj yichʼik tʼujel+ sventa xchʼultajesik li Batsʼi Lekil Chʼul Kuartoe, sventa xakʼbeik milbil matanal li Jeovae, sventa xtunik ta stojolal xchiʼuk sventa jech-o xakʼik bendision ta sbi.+
14 Li xnichʼnab Moises ti jaʼ yajtunel melel Diose te laj yichʼ tsakbel sbiik li ta snitilulal Levie.
15 Li xnichʼnab Moisese jaʼik Guersom+ xchiʼuk Elieser.+
16 Li ta xnichʼnabtak Guersome jaʼ jolil li Sebuele.+
17 Li ta snitilulal* Eliesere jaʼ jolil li Reabiase;+ li Eliesere muʼyuk xa yan skerem, pe li Reabiase oy ep skerem.
18 Li ta xnichʼnabtak Isare+ jaʼ jolil li Selomite.+
19 Li ta xnichʼnabtak Ebrone jaʼ jolil li Jeriase, li xchaʼvoʼale jaʼ Amarias, li yoxvoʼale jaʼ Jaasiel, li xchanvoʼale jaʼ Jekameam.+
20 Li ta xnichʼnabtak Usiele+ jaʼ jolil li Mikease, li xchaʼvoʼale jaʼ Isias.
21 Li xnichʼnab Merarie jaʼik Mali xchiʼuk Musi.+ Li xnichʼnab Malie jaʼik Eleasar xchiʼuk Kis.
22 Muʼyuk skerem cham li Eleasare, jaʼ noʼox oy stsebetak. Pe li xnichʼnabtak Kis ti jaʼ yutsʼ yalalike* jaʼ laj yikʼik li tsebetike.
23 Li xnichʼnabtak Musie jaʼik Mali, Eder xchiʼuk Jeremot, oxvoʼik.
24 Taje jaʼik xnichʼnabtak Levi ti jaʼik joliletik ta jujuchop yutsʼ yalalike. Laj yichʼik chapel jayvoʼik xchiʼuk laj yichʼ tsakbel sbiik li buchʼutik 20 o ti mas ta 20 jabil yichʼojik ti jaʼ tspasik li abtelal ta sna Jeovae.
25 Yuʼun xi onoʼox yaloj li Davide: «Li Jeova ti jaʼ Dios yuʼun Israele laj xa yakʼbe xkux yoʼonton li steklumale,+ li stuke te chnaki sbatel osil ta Jerusalen.+
26 Jech xtok, li jlevietike mu xa persauk tsjelulanbeik yavil li axibalnae mi jaʼuk li kʼusitik te chtune».+
27 Jech kʼuchaʼal slajeb xa laj yal Davide, laj yichʼik chapel li jlevietik ti 20 o ti mas ta 20 jabil yichʼojike.
28 Jaʼ yabtel tskoltaik li xnichʼnabtak Aaron+ ti te chtunik ta sna Jeovae, jaʼ sbainojik li jujun amakʼe,*+ li veʼebaletike xchiʼuk jaʼ tslekubtasik li kʼusitik chʼule, jech xtok, jaʼ sbainojik li yan abtelal skʼan pasel ta sna li melel Diose.
29 Jaʼ sbainojik li latsbil pane,*+ li arina ti lek nin sventa matanal sat tsʼunobile, li jayal gayetaetik ti pasbil ta arina ti muʼyuk slevaduraile,*+ li pan ti chichʼ taʼajesel ta lechlech takʼine xchiʼuk li votsʼbil arina ti kapbil ta aseitee,+ jech xtok, jaʼ sbainojik skotol li kʼusitik chichʼ pʼisele xchiʼuk ti kʼu smukʼul skʼan xbate.
30 Jujun sob skʼan xtal stojbeik ta vokol+ xchiʼuk skʼupil kʼoptaik li Jeovae, jech skʼan spasik ta jujun mal kʼakʼal xtok.+
31 Jaʼ chkoltavanik kʼalal chichʼ akʼbel Jeova li chikʼbil matanal ta jujun savado,+ ta jujun achʼ luna*+ xchiʼuk li ta jujun kʼin+ jech kʼuchaʼal tsʼibabil ta mantale. Jaʼ jech tspasik jujukoj kʼalal chakʼbeik smoton Jeovae.
32 Jech xtok, tspasik li kʼusitik sbainojik ta karpana sventa tsobobbaile xchiʼuk ti bu chʼule. Tskoltaik xtok li yermanotakik ti jaʼ li xnichʼnabtak Aaron ti te chtunik ta sna Jeovae.
Tsʼibetik ta yok vun
^ Literal «xnichʼnab».
^ O «xchiʼilik ta vokʼele».
^ Jaʼ xkaltik, pan ti akʼbil ta stojolal Diose.
^ O «achʼ u».
