Baʼyel Kronikas 29:1-30
29 Li ajvalil Davide xi laj yalbe sjunul li tsobobbaile: «Li jnichʼon Salomon ti jaʼ stʼujoj Diose+ toj kerem to xchiʼuk muʼyuk to kʼusi ep xchanoj spasel,+ pe toj mukʼ li abtelal chichʼ pasele, yuʼun maʼuk yuʼun jun krixchano li temploe,* jaʼ yuʼun li Jeova Diose.+
2 Tsots tajek li-abtej ti bu kʼalal xuʼ kuʼun sventa jchapan li kʼusitik chtun li ta sna Jdiose: laj kakʼ komel oro, plata, kovre, tsatsal takʼin,+ teʼetik,+ onise tonetik, yan tonetik ti chichʼ pakʼel ta mesklae, kʼupil sba tonetik sventa mosaiko, yan jeltos kʼupil sba tonetik xchiʼuk epal alabastro tonetik.
3 Ta skoj ti oy tajek ta koʼonton li sna Jdiose,+ maʼuk noʼox la jchapan li kʼusitik chtun sventa li chʼulnae,+ yuʼun laj kakʼ xtok li oro xchiʼuk li plata ti jaʼ kuʼun jtuke sventa xichʼ tunesel li ta sna Jdiose.
4 Laj kakʼ xtok oxmil talento* oro ti talem ta Ofire+ xchiʼuk vukmil talento lekil plata sventa xichʼ-o pixel li spakʼbaltak nae,*
5 laj kakʼ komel oro, plata xchiʼuk yan kʼusitik ti chtun yuʼunik mi likik ta abtel li buchʼutik oy kʼusitik lek xtojobik spasele. Pe ¿mi oy to buchʼu chlokʼ ta yoʼonton avuʼunik ti chakʼbe matanal Jeova li avie?».+
6 Jaʼ yuʼun, li bankilaletik ta jujuchop utsʼ alaliletike, li bankilaletik ta jujuchop snitilulal Israele, li bankilaletik ti sbainojik jmil ta voʼe, li bankilaletik ti sbainojik sien ta voʼe+ xchiʼuk li bankilaletik ti sbainojbeik li kʼusitik oy yuʼun li ajvalile+ lokʼ ta yoʼontonik yakʼel li matanale.
7 Ta sventa li kʼusitik chtun ta sna melel Diose laj yakʼik voʼmil talento oro, lajunmil dariko,* lajunmil talento plata, 18 mil talento kovre xchiʼuk 100 mil talento tsatsal takʼin.
8 Li buchʼutik oy yuʼunik kʼupil sba tonetike te laj yakʼik ta yavil skʼulejal Jeova, jaʼ la sventain li Jeiel+ ti jaʼ jguerson vinike.+
9 Li krixchanoetike xmuyubajik ta skoj ti lokʼ ta yoʼontonik yakʼel li matanale, yuʼun ta sjunul yoʼontonik laj yakʼbeik Jeova li matanale,+ li ajvalil David eke xkuxet tajek yoʼonton.
10 Vaʼun, li Davide lik skʼupil kʼopta Jeova ta sat sjunul li tsobobbaile, xi laj yale: «Kajval Jeova ti voʼot Sdiosot li jmoltotkutik Israele, kʼupil kʼoptabilukot ta sbatel osil.
11 Kajval Jeova, oy amukʼulal,+ oy ajuʼel,+ jun avutsil, xaxojobinaj noʼox+ xchiʼuk voʼot aventainoj skotol,* yuʼun jaʼ avuʼun skotol li kʼusitik oy ta vinajel xchiʼuk ta balumile.+ Voʼot ajvalilot, Kajval Jeova.+ Voʼot noʼox atuk ti toj mukʼ akʼoplale.
12 Li kʼulejal xchiʼuk li mukʼulale jaʼ avuʼun+ xchiʼuk voʼot chapas ta mantal skotol,+ toj echʼem ajuʼel+ xchiʼuk voʼot oy ta akʼob chatoybe skʼoplal+ xchiʼuk chavakʼbe sjuʼel li krixchanoetike.+
13 Li avie, Kajval Dios kuʼunkutik, ta jtojbotkutik ta vokol xchiʼuk ta jkʼupil kʼoptakutik abi ti jun yutsile.
14 »Muʼyuk tsots jkʼoplal xchiʼuk muʼyuk tsots skʼoplal jteklumal ti jech chkakʼkutik li matanal ti chlokʼ ta koʼontonkutike, yuʼun jaʼ avuʼun skotol xchiʼuk jaʼ noʼox laj kakʼbotkutik li kʼusi avakʼojbunkutike.
15 Jyanlumunkutik noʼox ta asat xchiʼuk jchʼom-osilunkutik noʼox jech kʼuchaʼal echʼ li jmoltotakutike.+ Li jkuxlejalkutik liʼ ta sba balumile jaʼ noʼox jech kʼuchaʼal nakʼobal+ ti muʼyuk chijalijkutike.
16 Jeova Dios kuʼunkutik, te likem talel ta atojolal skotol li kʼulejal ti jchapanojkutik xa sventa jvaʼankutik jpʼej ana sventa li achʼul bie, jaʼ avuʼun skotol.
17 Jnaʼoj lek, Dios kuʼun, ti chachaj ta kʼelel li koʼontonkutike+ xchiʼuk ti jaʼ xkuxet-o avoʼonton ti tukʼ koʼontonkutike.+ Ta sjunul koʼonton laj kakʼbot li matanale, jech xtok, ximuyubaj ti ta sjunul yoʼonton tal yakʼik matanal li ateklumal ti liʼ tsobolike.
18 Kajval Jeova ti voʼot Sdiosot Abraan, Isaak xchiʼuk Israel ti jaʼ jmoltotakutike, kolta-o li jteklum liʼe sventa lekuk li kʼusi oy ta yoʼontonike xchiʼuk ti ta sjunuluk yoʼontonik xtunik ta atojolal sbatel osile.+
19 Koltao li jnichʼon Salomon sventa ta sjunuluk yoʼonton+ xchʼun li amantaltake+ xchiʼuk li tojobtaseletik avuʼune sventa spas yuʼun skotol xchiʼuk sventa svaʼan li templo* ti jchapanojbe xa li kʼusitik chtune».+
20 Jaʼ yuʼun, li Davide xi laj yalbe sjunul li tsobobbaile: «Kʼupil kʼoptaik li Jeova Dios avuʼunike». Vaʼun, sjunul li tsobobbaile la skʼupil kʼoptaik li Jeova ti jaʼ Sdios smoltotakike, la snijan sbaik xchiʼuk la skejan spatan sbaik ta stojolal Jeova xchiʼuk ta stojolal li ajvalile.
21 Li vaʼ kʼakʼale, jech-o laj yakʼbeik milbil matanal li Jeovae xchiʼuk laj yakʼbeik chikʼbil matanal+ Jeova li ta yokʼomale. Laj yakʼik jmil ta kot chʼiom tot vakax, jmil ta kot tot chij xchiʼuk jmil ta kot chʼiom tot chij ti jmoj laj yakʼik xchiʼuk li matanal vinoe;+ laj yakʼik epal matanal ta sbi Israel.+
22 Xkuxet-o yoʼontonik veʼik+ xchiʼuk uchʼbolajik ta stojolal Jeova li vaʼ kʼakʼale. La stikʼik ta ajvalil yan velta li Salomon xnichʼon Davide xchiʼuk la svaʼanik ta jnitvanej ta stojolal Jeova,+ jaʼ la svaʼanik ta paleal ek li Sadoke.+
23 Li Salomone choti ta xchotleb Jeova+ sventa x-och ta ajvalil ta xkʼexol li David ti jaʼ stote. Lek bat yuʼun skotol xchiʼuk chʼunbil smantal yuʼun skotol li j-israeletike.
24 Skotol li bankilaletike,+ li buchʼutik lek xuʼ yuʼunik paskʼope+ xchiʼuk skotol li xnichʼnabtak ajvalil Davide+ laj yakʼ sbaik ta ventainel ta stojolal li ajvalil Salomone.
25 Li Jeovae la stoybe tajek skʼoplal Salomon ta sat skotol li Israele xchiʼuk stuk noʼox laj yakʼbe sventain skotol ti muʼyuk bu jech kʼotem ta stojolal junuk ajvalil ta Israele.+
26 Jaʼ jech lik sventain sjunul Israel li David xnichʼon Jesee.
27 Ti kʼu sjalil* la sventain li Israele jaʼ 40 jabil. Li ta Ebrone vukub jabil ajvalilaj,+ jaʼ 33 jabil ajvalilaj li ta Jerusalene.+
28 Li Davide mol xa cham+ xchiʼuk jal kuxi, ep skʼulejal xchiʼuk ichʼbil ta mukʼ echʼ; laje jaʼ och ta xkʼexol ta ajvalil li Salomon ti jaʼ xnichʼone.+
29 Li kʼusitik la spas ta slikebal kʼalal to ta slajeb li ajvalil Davide te tsʼibabil kom ti bu laj yichʼ tsʼibael li kʼusi laj yal Samuel ti oy kʼusitik ch-akʼbat yile, li j-alkʼop Natane+ xchiʼuk li Gad+ ti oy kʼusi ch-akʼbat yile.
30 Te tsʼibabil kom xtok ti kʼu yelan ajvalilaje, li kʼusitik mukʼtik la spase xchiʼuk li kʼusitik kʼotanuk ta pasel ti te kapal skʼoplal li Davide, li Israele xchiʼuk li yan ajvaliletik ti oy ta spat xokone.
Tsʼibetik ta yok vun
^ O «jteklume; pasob mantale».
^ Li jun talentoe jaʼ 34.2 kilo yalal. Kʼelo Apendise B14.
^ O «spakʼtak nae; skʼaltak nae; xchʼutak nae».
^ Li jun darikoe jaʼ jsep takʼin pasbil ta oro ta Persia. Kʼelo Apendise B14.
^ O «voʼot chavichʼ ichʼel ta mukʼ».
^ O «jteklum; pasob mantal».
^ Literal «Li kʼakʼaletik».
