Baʼyel Kronikas 5:1-26
5 Liʼe jaʼ skʼoplal li xnichʼnabtak Rubene,+ li sba xnichʼon Israele. Manchuk mi jaʼ sba nichʼonil, li sderecho ti jaʼ sba nichʼonile jaʼ xa kom ta sderecho li xnichʼnab Josee,+ li skerem Israele, yuʼun laj yikʼubtasbe* li stem* stote.+ Jaʼ yuʼun, ti kʼu yelan laj yichʼ tsakbel sbi li yutsʼ yalale muʼyuk chakʼ ta ilel ti jaʼ sba nichʼonile.
2 Jech xtok, manchuk mi jaʼ mas mukʼ skʼoplal li Juda+ kʼuchaʼal li xchiʼiltak ta vokʼele xchiʼuk ti jaʼ te lik tal stsʼunbal li buchʼu chkʼot ta jnitvaneje,+ jaʼ oy sderecho Jose kʼuchaʼal sba nichʼonil.
3 Li Ruben ti jaʼ sba xnichʼon Israele vokʼ xnichʼnabtak, jaʼik Anok, Palu, Esron xchiʼuk Karmi.+
4 Li xnichʼon Joele jaʼ Semaya, li xnichʼon Semayae jaʼ Gog, li xnichʼon Gogue jaʼ Simei,
5 li xnichʼon Simeie jaʼ Mikeas, li xnichʼon Mikease jaʼ Reaya, li xnichʼon Reayae jaʼ Baal,
6 li xnichʼon Baale jaʼ Beera ti chukat batel yuʼun li ajvalil Tilgat-Pilneser+ ta Asiriae, jech xtok, jaʼ toʼox bankilal yuʼunik li jrubenetike.
7 Li yutsʼ yalal xchiʼiltak ta vokʼel ti xcholet laj yichʼ tsakbel sbiik ta jujuchop snitilulalike jaʼik Jeiel ti jaʼ kʼot ta jolile, Sakarias
8 xchiʼuk Bela. Li stot Belae jaʼ Asas, li stot Asase jaʼ Sema, li stot Semae jaʼ Joel. Skotol li yutsʼ yalal Belae te nakalik ta sjunul yosilal Aroer+ ti chkʼot kʼalal to Nebo xchiʼuk ta Baal-Meone.+
9 Ti bu la spas snaik ta stukʼil slokʼeb kʼakʼale te chlik ta takixokol balumil ta stsʼel ukʼum Eufrates,+ yuʼun epaj tajek xchonbolomik kʼalal te toʼox nakalik ta yosilal Galaade.+
10 Kʼalal kuxul toʼox li Saule, la stsakik ta kʼop li j-agaretike xchiʼuk la stsalik. Jaʼ yuʼun, jaʼ xa te kom nakiikuk ta skarpanaik ta sjunul li yosilal Galaad ta stukʼil slokʼeb kʼakʼale.
11 Li snitilulal Gade te nakiik ta yosilal Basan kʼalal to Saleka,+ jaʼ stsʼakinoj sba xchiʼukik li snitilulal Rubene.
12 Jaʼ jolil yuʼunik li Joele, jaʼ xchaʼvoʼal jolil kʼot li Safame. Li ta Basane jaʼ kʼot ta jnitvanejetik li Janai xchiʼuk Safate.
13 Li xchiʼiltak ta vokʼel ti jaʼ joliletik ta jujuchop yutsʼ yalalike jaʼik Miguel, Mesulam, Seba, Jorai, Jakan, Sia xchiʼuk Eber, vukvoʼik.
14 Taje jaʼ xnichʼnabtak Abiail. Li stot Abiaile jaʼ Uri, li stot Urie jaʼ Jaroa, li stot Jaroae jaʼ Galaad, li stot Galaade jaʼ Miguel, li stot Miguele jaʼ Jesisai, li stot Jesisaie jaʼ Jado, li stot Jadoe jaʼ Bus.
15 Li Ai ti jaʼ xnichʼon Abdiele xchiʼuk ti jaʼ smom Gunie jaʼ jolil li ta yutsʼ yalale.
16 Te nakalik ta Galaad,+ ta Basan+ xchiʼuk li ta bikʼtal lumetik ti te noʼox nopajtike* xchiʼuk ti bu to kʼalal smakoj li yaxaltik ta Sarone.
17 Skotolik taje lek xcholet laj yichʼ tsakbel sbiik kʼalal jaʼo ochem ta ajvalil ta Juda li Jotane+ xchiʼuk kʼalal jaʼo ochem ta ajvalil ta Israel li Jeroboane.*+
18 Li jrubenetik, li jgadetik xchiʼuk li j-oʼlol snitilulal Manasese oy 44,760 ta voʼ yajsoltarotakik ti lek xuʼ yuʼunik paskʼope. Yichʼoj batel s-eskudoik,* s-espadaik xchiʼuk stsakoj batel s-arkoik, xchanojik lek paskʼop.
19 Jaʼ bat stsakik ta kʼop li Jeture, li Nafise,+ li Nodabe xchiʼuk li j-agaretike.+
20 Laj yichʼik koltael kʼalal bat stsakik ta kʼope, jech oxal och ta skʼobik li j-agaretike xchiʼuk skotol li buchʼutik te xchiʼukike. Ti jech kuch yuʼunike jaʼ koliyal ti koltaatik yuʼun li Diose, yuʼun la spat yoʼontonik kʼalal la skʼanbeik vokole.+
21 La spojbeik batel li xchonbolomike —50 mil ta kot kameyo, 250 mil ta kot chij xchiʼuk chaʼmil ta kot vuro— xchiʼuk la xchukik batel 100 mil krixchanoetik.
22 Solel ep chamik, yuʼun jaʼ la spas kʼop li melel Diose.+ Vaʼun, jaʼ xa te kom nakiikuk jaʼ to ti kʼuxi laj yichʼik chukel batele.+
23 Ti butik nakiik li j-oʼlol snitilulal Manasese+ te chlik ta Basan kʼalal to ta Baal-Ermon xchiʼuk ta Senir kʼalal to ta vits Ermon.+ Toj ep li snitilulale.
24 Liʼe jaʼ li joliletik ta jujuchop yutsʼ yalalike: Efer, Isi, Eliel, Asriel, Jeremias, Odavias xchiʼuk Jadiel; lek xuʼ yuʼunik paskʼop, lek ojtikinbilik xchiʼuk jaʼik joliletik ta jujuchop yutsʼ yalalik.
25 Pe muʼyuk tukʼ xakʼ sbaik ta stojolal li Sdios smoltotakike xchiʼuk mulivaj xchiʼukik li sdiostak jnaklejetik ta balumil+ ti ta sat stukik milbatik yuʼun li Diose.
26 Jaʼ yuʼun, li Sdios Israele la stijbe yoʼonton li ajvalil Pul ta Asiriae+ (jaʼ xkaltik, li ajvalil Tilgat-Pilneser+ ta Asiriae), jaʼ yuʼun la xchuk batel li jrubenetike, li jgadetike xchiʼuk li j-oʼlol snitilulal Manasese, te laj yikʼan batel ta Ala, ta Abor, ta Ara xchiʼuk ta ukʼum Gosan+ xchiʼuk te oyik-o kʼalal to avie.
Tsʼibetik ta yok vun
^ O «svayeb».
^ O «la sokesbe skʼoplal».
^ O «ta sjoylejale».
^ Jaʼ xkaltik, Jeroboan II.
^ O «smakobbailik».
