Baʼyel yuʼun Samuel 2:1-36
2 Li Anae xi la spas orasione:
«Ximuyubaj ta stojolal Jeova;+jaʼ chakʼbun kipal li Jeovae.
Tsots koʼonton ta jtakʼbe li kajkontratake,yuʼun ximuyubaj ti kʼu yelan chapojvane.
2 Muʼyuk buchʼu yan chʼul jech kʼuchaʼal li Jeovae,muʼyuk buchʼu yan, voʼot noʼox,+muʼyuk yan mukʼta ton jech kʼuchaʼal li Jdiostike.+
3 Iktaik ti xatoyet chakʼopojike;mu me xlokʼ ta aveik li kʼusi sventa toyobbaile,yuʼun li Jeovae jaʼ li Dios ti xojtikin skotole,+jaʼ tskʼelbe lek yabtel li viniketike.
4 Lilijem kom s-arkoik li tsatsal viniketike,pe jaʼ tstsak yipik li buchʼutik kʼunike.+
5 Li buchʼutik lek toʼox noj xchʼutike skʼan xbat abtejikuk ta yan sventa sta spanik,pe li buchʼutik chviʼnajike muʼyuk xa chviʼnajik.+
Li ants ti mu snaʼ x-alaje vokʼ xa vukvoʼ yol,+pe jaʼ stuk xa kom* li buchʼu oy ep yalabe.
6 Chmilvan li Jeovae xchiʼuk kuxul ch-iktavan.*Chakʼ batuk ta Mukinal* li jun krixchanoe xchiʼuk tstots likel.+
7 Chijpas yuʼun ta povre li Jeovae xchiʼuk chijpas yuʼun ta jkʼulej;+tsbikʼtajes jkʼoplaltik xchiʼuk tstoy jkʼoplaltik.+
8 Ta stots likel ta pukuk* li buchʼu bikʼit chakʼ sbae,ta stoy muyel li povre ti bu busul tantike*+sventa jmoj chakʼ chotluk xchiʼuk li buchʼutik tsots skʼoplalike,jaʼ te chakʼ chotluk ti bu lek ichʼbil ta mukʼe.
Te likem tal ta stojolal Jeova li snakleb balumile+xchiʼuk jaʼ te yakʼoj ta sba snakleb balumil li osil ti lek kʼusi chakʼ chʼiuke.
9 Jaʼ chchabi ti butik chbat li buchʼutik tukʼ chakʼ sbaike,+yan li buchʼutik chopolike te chlaj skʼoplalik ta ikʼal osil,+yuʼun li vinike mu xuʼ yuʼun ta yipal stuk.+
10 Li Jeovae bikʼitik chkom yuʼun li buchʼutik tstsakat ta kʼope;*+chakʼ tʼomuk chauk ta vinajel sventa xakʼ ta ilel li skʼakʼal yoʼonton ta stojolalike.+
Li Jeovae chchapan kʼalal to ta jujujot xchikin li balumile,+chakʼbe sjuʼel li ajvalil yuʼune+xchiʼuk chakʼbe stsatsal li buchʼu stʼujoje».+
11 Ta tsʼakal li Elkanae sut batel ta sna te ta Rama, pe li kʼox kereme kʼot ta yajtunel Jeova+ xchiʼuk jaʼ ventainbil yuʼun li pale Elie.
12 Toj chopol li xnichʼnabtak Elie;+ muʼyuk chichʼik ta mukʼ li Jeovae.
13 Xi tspasik kʼalal chtal akʼbatikuk yuʼun jteklum li kʼusi jaʼ oy sderechoik yichʼel li paleetike:+ kʼalal oy buchʼu chtal yakʼ milbil matanale, li yajkoltaobba palee chbat ti bu yakal chvokan bekʼete, chichʼ batel natil chavchav takʼin* ti oy oxib yee,
14 vaʼun tstikʼ ochel ta perol, ta pʼin ti chib xchikine, ta pulpul pʼin o ta xalten. Kʼusiuk noʼox ti tsta lokʼel li natil chavchav takʼine* jaʼ chichʼ komel li palee. Taje jaʼ jech tspasbeik skotol j-israeletik ti chbatik ta Siloe.
15 Jech xtok, kʼalal muʼyuk to chichʼ chikʼbel li sjupʼemal milbil matanal ti laj yichʼ talel li vinik sventa xtometuk muyel xchʼailale,*+ xi chtal albatuk yuʼun li jun yajkoltaobba palee: «Jaʼ xavakʼbe pale li tseil bekʼet sventa xichʼ voele. Mu skʼan mi lakanbile, jaʼ noʼox li tsee».
16 Xi ch-albat yuʼun li vinike: «Baʼyuk akʼo xichʼ chikʼel sventa tometuk xchʼailal* li sjupʼemale,+ mi laje, xuʼ xa xatam batel ti kʼu yelan chakʼane», pe xi chal li yajkoltaobba palee: «¡Moʼoj, jaʼ lek akʼbun ta ora; mi mu xavakʼbune, ta jtsatsal pojbot!».
17 Jaʼ yuʼun, toj tsots tajek smulik ta stojolal Jeova li yajkoltaobbatak palee,+ yuʼun muʼyuk xa chichʼik ta mukʼ li smoton Jeovae.
18 Akʼo mi kʼox kerem to li Samuele, te chtun ta stojolal Jeova+ xchiʼuk tstunes* jlik mokankʼuʼil ti pasbil ta linoe.+
19 Jech xtok, li smeʼe tspasbe jlik uni natil kʼuʼil pokʼil ti muʼyuk skʼobe, jaʼo chichʼbe batel kʼalal chmuy batel jujun jabil xchiʼuk smalal sventa xbat yakʼik li milbil matanal ti chichʼ akʼel jujun jabile.+
20 Li Elie laj yakʼbe bendision li Elkana xchiʼuk yajnile, xi laj yalbee: «Akʼo yakʼbot junuk anichʼon Jeova li ta avajnil liʼe ta skoj ti jaʼ laj avakʼbeik Jeova li june».+ Jech sut batel ta snaik.
21 Li Jeovae la skolta li Anae, jaʼ yuʼun laj to xchiʼin yol;+ vokʼ to oxvoʼ skerem xchiʼuk chaʼvoʼ stseb. Li kʼox Samuele te chʼi-o batel ta stojolal Jeova.+
22 Li Elie mol xa ox, pe yaʼioj skotol li kʼusi tspasbeik Israel li xnichʼnabtake+ xchiʼuk yaʼioj ti chchiʼinik ta vayel li antsetik ti te chtunik ta yochebal karpana sventa tsobobbaile.+
23 Vaʼun, xi laj yalbe li xnichʼnabtake: «¿Kʼu yuʼun ti jech chapasike? Sjunul li jteklume chalik ti chopol kʼusitik chapasike.
24 Mu jechuk xapasik, jnichʼnabtak, yuʼun muʼyuk lek li kʼusi kʼotem ta jchikin ti tsloʼiltaik li steklumal Jeovae.
25 Mi oy jun vinik tsaʼ smul ta stojolal yan vinike, xuʼ van oy buchʼu skʼanbe vokol Jeova ta stojolal,* pe mi oy buchʼu la saʼ smul ta stojolal Jeovae,+ ¿buchʼu xuʼ tskʼan vokol ta stojolal?». Pe muʼyuk la skʼan la xchikintabeik li stotike, yuʼun li Jeovae snopoj xa onoʼox ti chakʼbe slajebe.+
26 Li kʼox kerem Samuele yantik xchʼi batel xchiʼuk jujun kʼakʼal mas xa lek ch-ilat yuʼun Jeova xchiʼuk li krixchanoetike.+
27 Oy jun yajtunel melel Dios ti xi tal yalbe li Elie: «Xi chal li Jeovae: ‹¿Mi mu jamaluk laj kakʼ jba ta ojtikinel ta stojolal li yutsʼ yalal atot ti kʼalal te toʼox oyik ta Ejipto xchiʼuk ti kʼalal mosoinbilik toʼox ta sna faraone?+
28 Ta skotol li snitilulal Israele jaʼ la jtʼuj+ li amoltot sventa xkʼot ta kajpale xchiʼuk sventa xmuy yakʼ milbil matanal li ta skajleb matanal kuʼune+ xchiʼuk sventa xakʼ li pome,* jech xtok, jaʼ tslap li mokankʼuʼil kʼalal chtun ta jtojolale. Li buchʼutik te oy ta sna amoltote jaʼ laj kakʼbe li chikʼbil matanal chakʼ j-israeletike.*+
29 ¿Kʼu yuʼun chapʼajik* li milbil matanal xchiʼuk li matanal kuʼun ti kaloj chichʼ akʼel ti bu nakalune?+ ¿Kʼu yuʼun jaʼ mas chavichʼ ta mukʼ li anichʼnabtake ti jaʼ mu sta li voʼone? Yuʼun yantik xajupʼik ta skoj ti jaʼ chavichʼik li matanal mas lek chakʼik li jteklum Israele.+
30 »›Jaʼ yuʼun, xi yaloj li Jeova Dios yuʼun Israele: «Melel ti voʼon laj kal ti jech chtunik-o ta jtojolal li buchʼutik te oy ta ana xchiʼuk li buchʼutik te oy ta sna amoltotake».+ Pe li avie, xi chal li Jeovae: «Pe taje muʼyuk chkʼot kuʼun jech ta pasel, yuʼun jaʼ noʼox chkichʼ ta mukʼ li buchʼu chichʼun ta mukʼe,+ li buchʼu tspʼajikune ta xichʼik pʼajel ek».
31 ¡Kʼelavil!, chkʼot skʼakʼalil ti ta jlajesbe skʼoplal li avipe* xchiʼuk ta jlajesbe skʼoplal yipik li buchʼutik te oy ta sna atote, jaʼ yuʼun mi junuk tsta smolibel li buchʼutik te oy ta anae.+
32 Li Israele lek kʼusitik tstaik, pe li voʼote jaʼ noʼox te akʼelojbe sat avajkontra ti bu nakalune+ xchiʼuk mi junuk tsta smolibel li buchʼutik te oy ta anae.
33 Li anitilulal ti muʼyuk ta jnuts lokʼel ti te chtunik ta skajleb matanale, jaʼ chlik lajuk-o sbekʼ asat xchiʼuk chakʼbot ep avokol, pe jaʼ ep ti chlajik ta milel ta espada li buchʼutik te oy ta anae.+
34 Sventa xanaʼ ti melel li kʼusi chkalbote, chkakʼbot jun senyail: ta jun noʼox kʼakʼal chcham xchaʼvoʼal li anichʼnabe,+ li Ofni xchiʼuk Finease.
35 Vaʼun, ta jtʼuj jun kajpale ti tukʼ chakʼ sbae.+ Jaʼ tspas li kʼusi oy ta koʼontone; jech xtok, ta jvaʼanbe jpʼej sna ti te chkom-o sbatel osile xchiʼuk chtun-o ta paleal ta stojolal li buchʼu tʼujbil kuʼune.
36 Buchʼuuk noʼox ti kuxul chkom ta anae chtal snijan sba ta stojolal li kajpalee sventa xbat skʼan yabtel xchiʼuk ti x-akʼbat sveʼele, xi chalbee: «Avokoluk, akʼbun kabtel ta paleal sventa jta jutuk jveʼel»›».+
Tsʼibetik ta yok vun
^ Literal «takin kom».
^ O «chakʼbe xkuxlejal».
^ O «lum».
^ O jaʼ van skʼoplal «yavil kʼaʼep».
^ O jaʼ van skʼoplal «Li buchʼutik tskontrainik Jeovae chnikik ta xiʼel».
^ O «xluchobil veʼlil».
^ O «xluchobil veʼlile».
^ O «xchʼayilale».
^ O «xchʼayilal».
^ Literal «xchukinoj».
^ O jaʼ van skʼoplal «li Diose jaʼ tskʼel buchʼu oy smul».
^ Literal «xnichʼnab Israele».
^ O jaʼ van skʼoplal «xtometuk muyel xchʼailal yuʼun li milbil matanale».
^ Literal «chalikik ta tekʼel».
^ Literal «akʼobe».
