Xchibal Juan 1:1-13
1 Voʼon li molune, jaʼ sventa li tʼujbil ants* xchiʼuk li yalab ti jaʼik li buchʼutik jkʼanojan ta melele, maʼuk noʼox voʼon, jaʼ jech kʼanbilik yuʼun skotol ek li buchʼutik laj xa yojtikinik li kʼusi melele,
2 taje jaʼ ta skoj ti te oy ta jtojolalkutik li kʼusi melele, ti te oy-o ta jtojolalkutik sbatel osile.
3 Ta jtatik slekil yutsil oʼontonal, kʼuxubinel xchiʼuk jun oʼontonal ti jaʼ chakʼ li Jtotik Diose xchiʼuk ti jaʼ chakʼ li Jesukristo ti jaʼ li Xnichʼon Totile, chakʼik ta ilel kʼanelal xtok xchiʼuk chakʼik jchantik li kʼusi melele.
4 Xkuxet tajek koʼonton, yuʼun laj kaʼi ti oy jayvoʼuk avalab ti jech-o stamojbeik sbelel li kʼusi melele+ jech kʼuchaʼal laj yalbutik mantal li Totile.
5 Jech oxal, xi ta jkʼanbot vokol avie, ants, ti akʼo jkʼan jbatik ta jujuntale. (Maʼuk jun achʼ mantal li kʼusi ta jtsʼibabot tale, jaʼ onoʼox li mantal laj kichʼtik ta slikebale).+
6 Liʼe jaʼ smelolal mi kʼanvanemutike: ti akʼo jpastik-o batel ti kʼu yelan chal li smantaltake.+ Liʼe jaʼ li mantal ti jech onoʼox kʼuchaʼal laj avaʼiik ta slikebale: ti jechuk-o xavakʼik ta ilel ti chakʼanvanike.
7 Yuʼun ep jloʼlavanej lokʼik talel li ta balumile,+ ti muʼyuk jamal chalbeik skʼoplal li Jesukristo ti ay kʼuchaʼal krixchanoe.+ Taje jaʼ li jloʼlavaneje xchiʼuk li yajkontra Kristoe.*+
8 Kʼelo me abaik lek sventa mu xchʼay avuʼunik li kʼusitik la jtatik ti tsots laj kakʼbetik yipale, yuʼun skʼan lek tsʼakal xataik li matanale.+
9 Muʼyuk me lek ch-ilat yuʼun Dios skotol li buchʼu chchʼak sbae xchiʼuk mi mu jechuk-o tspas ti kʼu yelan chanubtasvan li Kristoe.+ Pe lek me ch-ilat yuʼun Totil xchiʼuk Nichʼonil li buchʼu jech-o tspas kʼuchaʼal li chanubtasel taje.+
10 Mi oy buchʼu chbat skʼeloxuk xchiʼuk ti mu jechuk chchanubtasvan kʼuchaʼal taje, mu me xachʼam ta anaik+ xchiʼuk mu me xakʼoponik jsetʼuk.*
11 Yuʼun mi oy buchʼu tskʼopon jutebuke, xkoʼolaj me kʼuchaʼal yakal xa tspas ek li kʼusi toj chopol tspase.
12 Akʼo mi ep tajek kʼusi ta jkʼan chkalboxuk, mu jkʼan jtsʼiba ta vun xchiʼuk ta tinta, yuʼun jpatoj koʼonton chbat jkʼeloxuk sventa jkʼelojbe jba jsatik chijloʼilaj yoʼ jech xamuyubajikuk noʼox.
13 Chabanukot la chalik li yalab avix ti jaʼ li buchʼu tʼujbile.
Tsʼibetik ta yok vun
^ Taje xuʼ van jaʼ junuk ants ta melel o xuʼ van jaʼ junuk stsobobbail yajtsʼaklomtak Kristo li ta baʼyel sigloe.
^ O «jutebuk».
