Xchibal Kronikas 3:1-17
3 Li Salomone lik svaʼanbe li sna Jeovae,+ te la svaʼan ta vits Moria+ ta Jerusalen ti bu xchapanoj li David ti jaʼ stote+ ti jaʼ toʼox te yikʼaobil strigo li Ornan+ ti jaʼ jebus vinike. Jaʼ ti bu laj yakʼ sba ta ilel Jeova ta stojolal li Davide.
2 Jaʼo la svaʼan li ta xchibal kʼakʼal ta xchibal u kʼalal xchanibal xa ox jabil yochel ta ajvalile.
3 Li snakleb sna melel Dios ti la svaʼan Salomone jaʼ 60 xukʼubil snatil xchiʼuk 20 xukʼubil sjamlej,+ jaʼ ti kʼu yelan spʼisol ta baʼyele.*
4 Li yochebal stiʼe jaʼ 20 xukʼubil sjamlej, jech sjamlej kʼuchaʼal li nae. Jaʼ 120* li stayleje; la xpix ta batsʼi oro li ta yute.+
5 La xpix ta enebro teʼ li spakʼbal mukʼta nae,* laje la xpix ta batsʼi oro,+ vaʼun te la spasbe slokʼoltak xan+ xchiʼuk slokʼoltak kadena.+
6 Jech xtok, la xnochʼanbe lekil kʼupil sba tonetik;+ li oro+ la stunese te likem talel ta Parvaim.
7 La xpix ta oro+ li nae, li stsʼamteʼaltak sjole, li smarkoaltak yok tiʼ nae, li stiʼtake xchiʼuk li spakʼbaltake;* te la spasbe slokʼoltak keruvin li ta spakʼbale.+
8 Laje, la spas li Batsʼi Lekil Chʼul Kuartoe,+ jaʼ jech sjamlej kʼuchaʼal sjamlej li nae, 20 xukʼubil snatil xchiʼuk 20 xukʼubil sjamlej. Vakib sien talento* batsʼi oro+ la xpix-o.
9 Sventa li lauxetike jaʼ tun 50 siklo* oro; la xpix ta oro li kuartoetik ta jol nae.
10 La spas chib keruvin li ta Batsʼi Lekil Chʼul Kuartoe xchiʼuk ta oro la xpix.+
11 Li baʼyel keruvine voʼob xukʼubil snatil li jun xikʼe,+ staoj to batel li pakʼbal nae,* li jot xikʼ ti voʼob xukʼubil snatil xtoke snupoj sba kʼot xchiʼuk li jot xikʼ yan keruvine. 20 xukʼubil snatil ta skotol li xikʼike.
12 Li jot xikʼ yan keruvine voʼob xukʼubil snatil, staoj to batel ek li jot pakʼbal nae,* li jot xikʼ ti voʼob xukʼubil snatil xtoke snupoj sba kʼot xchiʼuk li jot xikʼ baʼyel keruvine.
13 Li xikʼik keruvinetik ti lichʼajtike jaʼ 20 xukʼubil snatil ta skotol, te vaʼajtik xchiʼuk skʼelojik ochel.*
14 Li kortinae+ ta asul no la spas, ta tsots* ti bonbil ta kuxul moradoe, ta kuxul tsajal pokʼ xchiʼuk ta lekil pokʼ; jech xtok, te la xluchbe* slokʼol keruvinetik.+
15 La spas chib oy+ li ta yochebal nae, 35 xukʼubil snatil. Li xlechlechul sjol jujun oye voʼob xukʼubil staylej.+
16 La spas kadenaetik sventa xojbe ta sjol li oyetike, laje la spas sien slokʼoltak granada* ti te la sjokʼan ta kadenaetike.
17 Vaʼun, la svaʼan li oyetik ta yochebal temploe. Jun laj yakʼ ta batsʼikʼob,* jun laj yakʼ ta tsʼetkʼob.* Li ta batsʼikʼobe, Jakin* laj yakʼbe sbi; li ta tsʼetkʼobe, Boas* laj yakʼbe sbi.
Tsʼibetik ta yok vun
^ Li batsʼi jun xukʼubile jaʼ 44.5 sentimetro snatil, pe li yantike tsnopik ti kʼalal «spʼisol ta baʼyel» xie, jaʼ la skʼoplal jun xukʼubil ti mas nate ti 51.8 sentimetro snatile. Kʼelo Apendise B14.
^ Mu xichʼ naʼel lek kʼusi jtosukal spʼisol.
^ O «spakʼ mukʼta nae; skʼal mukʼta nae; xchʼut mukʼta nae».
^ O «spakʼtake; skʼaltake; xchʼutake».
^ Li jun talentoe jaʼ 34.2 kilo yalal. Kʼelo Apendise B14.
^ Li jun sikloe jaʼ 11.4 gramo yalal. Kʼelo Apendise B14.
^ O «spakʼ nae; skʼal nae; xchʼut nae».
^ O «spakʼ nae; skʼal nae; xchʼut nae».
^ Jaʼ xkaltik, skʼelojik ochel ti bu Chʼule.
^ Taje jaʼ stsotsil chij o stsotsil yan chonbolometik.
^ O «stsʼisbe».
^ Jaʼ jtos sat teʼ ti lek tsoj skoloral ti xkoʼolajtik kʼuchaʼal mantsanae.
^ O «ta sur».
^ O «surtokʼob». O «ta norte».
^ Jaʼ skʼan xal ‹akʼo svaʼan lek›. Jaʼ xkaltik, li Jeovae.
^ Jaʼ van skʼan xal ‹ta tsatsal ipalil›.
