Xchibal yuʼun Samuel 1:1-27
1 Kʼalal chamem xa ox li Saule, li Davide chib kʼakʼal te kom ta Siklag+ kʼalal sut xa ox talel ta stsalel li j-amaleketike.
2 Li ta yoxibal kʼakʼale, te tal jun vinik ti te lik talel ti bu spasoj skarpana li Saule, sliʼoj ta jatel skʼuʼ spokʼ xchiʼuk yakʼoj pukuk* ta sjol. Kʼalal kʼot ti bu oy li Davide, la skejan sba ta lumtik xchiʼuk la spatan sba.
3 Li Davide xi la sjakʼbee: «¿Bu lalik tal?». Xi la stakʼe: «Te lijatav tal ti bu spasoj skarpana li Israele».
4 Xi to la sjakʼbe li Davide: «¿Kʼusi kʼot ta pasel? Albun, avokoluk». Xi la stakʼ li vinike: «Li krixchanoetike jatavik li ta paskʼope, ep buchʼutik chamik. Te cham+ li Saul xchiʼuk li xnichʼone, li Jonatane».
5 Li Davide xi to la sjakʼbe li vinike: «¿Kʼuxi la anaʼ ti cham li Saul xchiʼuk li Jonatane?».
6 Xi la stakʼ li vinike: «Jaʼo te oyun li ta vits Guilboae,+ vaʼun laj kil li Saul ti te yikobinoj li slansae, yuʼun taat ta be+ yuʼun li karetaetik xchiʼuk li jkajlejetik ta kaʼe.
7 Kʼalal joyij skʼel spate laj yilun, vaʼun laj yaptaun, xi la jtakʼbee: ‹¡Li oyune!›.
8 Xi la sjakʼbune: ‹¿Buchʼuot?›, xi la jtakʼbee: ‹J-amalek+ vinikun›.
9 Xi laj yalbune: ‹Nopajan tal ta jtsʼel, milun avokoluk, yuʼun liʼ chkil jvokole, tsots yayijemun›.
10 Jaʼ yuʼun, linopaj batel xchiʼuk la jmil,+ yuʼun jnaʼoj ti mu xa onoʼox xkuxi ta skoj ti yayijeme. Vaʼun, la jtsakbe li skoronail sjole xchiʼuk li spulserail skʼobe, liʼ laj kichʼbot tale, kajval».
11 Kʼalal laj yaʼi li Davide, la sliʼ ta jatel li skʼuʼ spokʼe, jech la spasik ek skotol li viniketik ti te xchiʼuke.
12 Ochik ta at-oʼonton, okʼik xchiʼuk la spasik ayuno*+ jaʼ to ti kʼuxi chʼay batel kʼakʼale, yuʼun chamik ta espada li Saule, li Jonatan ti jaʼ xnichʼon Saule xchiʼuk ep chamik li ta steklumal Jeovae, ep lajik li j-israeletike.+
13 Li Davide xi la sjakʼbe li vinike: «¿Bu likemot tal?». Xi takʼbate: «J-amalek vinikun, jaʼ xnichʼonun jun jyanlum ti liʼ talem ta nakleje».
14 Vaʼun, li Davide xi laj yalbee: «¿Mi yal noʼox akʼob avaʼi ta smilel li buchʼu stʼujoj Jeovae?».+
15 Li Davide la stak ta ikʼel jun svinik, xi laj yalbee: «Nopajan batel, milo». Jaʼ yuʼun la syayijes, vaʼun cham.+
16 Li Davide xi laj yalbe li vinike: «Te chkom ta aba atuk li achʼichʼele, yuʼun jaʼ la stikʼ amul li ave kʼalal xi laj avale: ‹Voʼon la jmil+ li buchʼu stʼujoj Jeovae›».
17 Vaʼun, li Davide lik skʼejinta jun kʼejoj sventa at-oʼonton, jaʼ la skʼejinta ta sventa li Saule xchiʼuk ta sventa li Jonatane,+ li xnichʼon Saule.
18 Laj yal xtok ti skʼan xakʼbeik xchan li krixchanoetik ta Judae. Li kʼejoj sventa at-oʼonton taje jaʼ sbi «Li arkoe», te tsʼibabil ta slivroal Jasar+ xchiʼuk xi chale:
19 «Li buchʼutik kʼupilik sbae, Israel, te laj skʼoplalik li ta tayal kʼopojebaletik*+ avuʼune.
¡Tsalatik li tsatsal viniketike!
20 Mu xavalik batel ta Gat;+mu xapukik batel li ta skayealtak Askelone,yuʼun ta xlik muyubajikuk li jfilistea tsebetik mi laj yaʼiike,li stsebetakik li buchʼutik muʼyuk yichʼojik sirkunsisione* ta xmuyubajik.
21 Vitsetik ta Guilboa,+muuk xa xyal tal voʼ ta atojolalik, mi jaʼuk xa job osil,mi jaʼuk xa kʼusi xchʼi ta avosilal sventa xichʼ akʼel ta chʼul matanale,+yuʼun te laj yichʼ sokesbel s-eskudoik* li buchʼutik lek xuʼ yuʼunike, te laj yichʼ sokesel li s-eskudo Saule,muʼyuk xa junuk eskudo ti lek jaxbil aseitee.
22 Ta xchʼichʼel li buchʼutik chamike, ta xepuʼal li tsatsal viniketike,li s-arko Jonatane muʼyuk sut ta valopat,+li s-espada Saule jaʼ chkuch yuʼun+ li paskʼope.
23 Li Saul xchiʼuk Jonatane+ lek kʼanbilik xchiʼuk lek kʼuxubinbilik* kʼalal kuxulik toʼoxe,mi jaʼuk laj yichʼik chʼakel+ kʼalal chamike.
Lek xuʼ yuʼunik anil, jaʼ mu sta li aguilaetike,+lek tsots xuʼ yuʼunik, jaʼ mu sta li leonetike.+
24 Tsebetik ta Israel, okʼitaik li Saule,yuʼun jaʼ laj yakʼ alapik li kuxul tsajal pokʼe xchiʼuk jaʼ laj yakʼbe xnichimal li akʼuʼ apokʼike,jaʼ laj yakʼbe slujoaltak ta oro li akʼuʼ apokʼike.
25 ¡Te lajik ta tsalel li buchʼutik lek xtojobik ta paskʼope!
¡Li Jonatane te telel cham li ta tayal kʼopojebaletik+ avuʼune!
26 Chkat tajek koʼonton avuʼun, Jonatan;jkʼanojot tajek+ kʼuchaʼal jbankil.
Mas to toj lek laj kaʼi ti kʼu yelan la akʼanune, jaʼ mu sta ti kʼu yelan chkʼanvan li antsetike.+
27 ¡Lajik ta tsalel li buchʼutik lek xtojobik ta paskʼopexchiʼuk lajesbatik li yabtejebik ta paskʼope!».
