Amos 5:1-27
5 «Aʼio avaʼiik, snitilulal Israel, xi ta jkʼejintaboxuk jun son sventa at-oʼontone:
2 ‹Yal xa ta lum li tojol tseb ti jaʼ li Israele;mu xa xuʼ yuʼun chtots likel yan velta.
Te laj yichʼ jipel komel ta yosil stuk;muʼyuk xa buchʼu xtoyat likel›.
3 »Yuʼun xi chal li Kajvaltik Jeova ti jaʼ Mukʼul Jpasmantale:
‹Li jun jteklum ti tstak batel jmil ta voʼe kʼajomal xa noʼox sien chkom yuʼun;li jteklum ti tstak batel sien ta voʼe kʼajomal xa noʼox lajunvoʼ chkom yuʼun. Taje jaʼ li kʼusi chkʼot ta stojolal Israele›.+
4 »Yuʼun li Jeovae xi chalbe li snitilulal Israele:
‹Saʼikun sventa kuxul xakomik.+
5 Mu jaʼuk xasaʼik li Betele,+mu xabatik ta Guilgal+ mi jaʼuk te xa-echʼik ta Beer-Seba,+yuʼun li Guilgale jpʼel skʼoplal chichʼ chukel batel+xchiʼuk muʼyuk xa sbalil* chkom li Betele.
6 Saʼik li Jeovae sventa kuxul xakomik+sventa mu xtil* kʼuchaʼal kʼokʼ ta stojolal li snitilulal Josee,ti chchikʼ li Betele xchiʼuk ti mu xa buchʼu xtupʼ yuʼune.
7 Chakʼatajesik ta chʼail tsʼiʼlel li tukʼilalexchiʼuk jaʼ chajipik ta lum li kʼusi tukʼe.+
8 Li buchʼu la spas li jtsop kʼanal Kima* xchiʼuk li jtsop kʼanal Kesile,*+li buchʼu tskʼatajes ta sak osil ta sob li ikʼ osile,li buchʼu ikʼ tajek chkom yuʼun jech kʼuchaʼal akʼobal li kʼakʼaltike,+li buchʼu tstsob li voʼ ta nabsventa smal li ta sba balumile+—Jeova sbi—.
9 Jaʼ chakʼbe slajeb li buchʼu tsots xuʼ yuʼunexchiʼuk chakʼbe slajeb ti bu joyajtik ta muroe.
10 Li jteklume tspʼajik li buchʼutik chtukʼibtasvanik ta yochebal jteklume,ibal sba* chilik li buchʼutik melel xkʼopojike.+
11 Ta skoj ti chatsatsal kʼanbeik slokʼ avosilik li povreetikexchiʼuk ti chavichʼbeik batel sat stsʼunobik kʼuchaʼal stojol spatanike,+muʼyuk te chakomik-o ta naklej li ta naetik apasojik ta setbil tonetike+xchiʼuk muʼyuk chavuchʼbeik yaʼlel li lekil uvaetik atsʼunojike.+
12 Yuʼun jnaʼoj ti toj echʼ noʼox xatoy abaike*xchiʼuk ti toj echʼ noʼox tsots li amulike—chavilbajinik li buchʼutik tukʼike,chachon abaik ta takʼin,*chapojbeik sderecho ta yochebal jteklum li povreetike—.+
13 Jaʼ yuʼun li vaʼ kʼakʼale, tstsʼiji li buchʼutik pʼijike,yuʼun jaʼo yorail vokolil.+
14 Jaʼ saʼik li kʼusi leke, maʼuk xasaʼik li kʼusi chopole,+jech kuxul chakomik.+
Vaʼun, te chchiʼinoxuk li Jeova Dios ti jaʼ bankilal yuʼun soltaroetik*jech kʼuchaʼal chavalik ti te xchiʼinojoxuke.+
15 Pʼajik li kʼusi chopole, jaʼ kʼanik li kʼusi leke,+jaʼ akʼo spas kanal ta yochebal jteklum li tukʼilale.+
Li Jeova Dios ti jaʼ bankilal yuʼun soltaroetikexuʼ van xkʼuxubin li skomenal* snitilulal Josee›.+
16 »Jaʼ yuʼun, xi chal li Jeovae, li Jeova Dios ti jaʼ bankilal yuʼun soltaroetike:
‹X-avetik noʼox likel ta okʼel li ta jujun chʼivite*xchiʼuk xi chalik li ta jujun kayee: «¡Ay! ¡Toj abol jbatik!».
Tstakik ta ikʼel li j-abteletik ta osile sventa xtal okʼikuk ta at-oʼontonxchiʼuk tstakik ta ikʼel ek li buchʼutik jaʼ yabtel ch-okʼik ta at-oʼontone›.
17 ‹X-avetik noʼox likel ta okʼel ti butik tsʼunbil uvae;+yuʼun te chi-echʼ ti bu oyote›, xi li Jeovae.
18 ‹¡Abol sba li buchʼutik oy ta yoʼonton tsmalaik li skʼakʼalil Jeovae!+
¿An kʼu yelan avalojik li skʼakʼalil Jeovae?+
Jaʼ yorail ikʼ osil, maʼuk yorail sak osil.+
19 Jaʼ jech kʼuchaʼal jun vinik ti chjatav batel ta skoj jkot leone, pe ti te snupoj kʼotel jkot oso xtokexchiʼuk kʼalal ch-och ta yut sna ti te chlaj ta tiʼel ta jkot kiletel chon kʼalal chakʼ skʼob ta pakʼbal nae.*
20 ¿Mi mu jaʼuk yorail ikʼ osil li skʼakʼalil Jeovae, ti maʼuk yorail sak osile?¿Mi mu jaʼuk yorail ch-ikʼub osil xchiʼuk ti chʼabal kʼusi chakʼ xojobale?
21 Chopol tajek chkil, jpʼajoj li kʼinetik chapasike,+mu jkʼupinbe smuil li atsobajelik ti tsots skʼoplal chapasike.
22 Akʼo mi chavakʼik chikʼbil matanaletik xchiʼuk yan matanaletik,muʼyuk ximuyubaj-o yuʼun;+mu lekuk chkil li jupʼesbil chonbolometik chavakʼik ta milbil matanal sventa jun oʼontonale.+
23 Mu xa xavakʼik kaʼi li akʼejojik ti muʼyuk smelolal ta aʼiele;mu xa xavakʼbeikun jchikinta li ason chatijik ta stijobiltak ti oy yakʼile.+
24 Akʼo beinuk batel kʼuchaʼal voʼ li tukʼilale,+jech xtok, li kʼusi tukʼe jechuk kʼuchaʼal ukʼum ti mu xtakije.
25 ¿Mi yuʼun laj avakʼbeikun milbil matanaletik xchiʼuk yan matanaletikti kʼalal la-echʼik 40 jabil li ta takixokol balumile, jteklum Israel?+
26 Li avi une, jaʼ xa chakuchik batel li Sakut ti jaʼ ajvalil avuʼunike xchiʼuk li Kevane,*jaʼ li kʼanal yuʼun adiosike, li lokʼoletik avuʼunik la apasike.
27 Jaʼ yuʼun, ta sjelavel to Damasko+ chukbil chabatik kuʼun›, xi li buchʼu Jeova sbie, li Dios ti jaʼ bankilal yuʼun soltaroetike».+
Tsʼibetik ta yok vun
^ O jaʼ van skʼoplal «yan-o ta kʼelel».
^ O «stsan».
^ Jaʼ van skʼoplal li jtsop kʼanal Orione.
^ Jaʼ van skʼoplal li jtsop kʼanal Pleyades ti te oy li ta jtsop kʼanal Tauroe.
^ O «tsots la apas amulike».
^ O «chatsakik takʼin sventa xatsʼijiik; chatsakik michʼob kʼabal».
^ O «skomelal».
^ O «kayee; ti bu oy ep krixchanoetike».
^ O «pakʼ nae; kʼal nae; chʼut nae».
^ Li lokʼoletik taje jaʼ van skʼoplal li planeta Saturno ti chichʼik ta mukʼ kʼuchaʼal jun diose.