Amos 7:1-17
7 Liʼe jaʼ li kʼusi laj yakʼbun kil li Kajvaltik Jeova ti jaʼ Mukʼul Jpasmantale: ¡kʼelavil! La stak talel epal kʼulub sventa slajes li kʼusi tsʼakal to chʼi* tale. Jaʼ li kʼusi chʼi talel kʼalal yichʼoj xa ox bojel lokʼel li stsʼiʼlel ajvalile.
2 Kʼalal laj xa ox slajesik tsʼiʼlel ta balumil li kʼulubetike, xi laj kale: «¡Akʼo perton avokoluk, Kajval Jeova ti voʼot Mukʼul Jpasmantalote!+ ¿Kʼuxi xa noʼox chkuch yuʼun* li Jakobe? ¡Yuʼun kʼunibem xa!».+
3 Laj to xchaʼnop* li Jeovae,+ xi laj yale: «Muʼyuk chkʼot ta pasel», xi li Jeovae.
4 Liʼe jaʼ li kʼusi laj yakʼbun kil li Kajvaltik Jeova ti jaʼ Mukʼul Jpasmantale: ¡kʼelavil! Li Kajvaltik Jeova ti jaʼ Mukʼul Jpasmantale la stak talel kʼokʼ kʼuchaʼal kastigo. Laj yules li natil voʼ ti mu albajuk sjamleje xchiʼuk la xchikʼ jvokʼ li osile.
5 Jaʼ yuʼun, xi laj kale: «Avokoluk, Kajval Jeova ti voʼot Mukʼul Jpasmantalote, pajtsano xa li vokolile.+ ¿Kʼuxi xa noʼox chkuch yuʼun* li Jakobe? ¡Yuʼun kʼunibem xa!».+
6 Laj to xchaʼnop* li Jeovae,+ xi laj yale: «Muʼyuk chkʼot ta pasel xtok», xi li Kajvaltik Jeova ti jaʼ Mukʼul Jpasmantale.
7 Liʼe jaʼ li kʼusi laj yakʼbun kile: ¡kʼelavil! Laj kil Jeova ti te vaʼal ta sba jun muro ti laj yichʼ tunesel plomo* kʼalal laj yichʼ pasele, te stsakoj jun plomo.
8 Vaʼun xi laj yalbun li Jeovae: «¿Kʼusi te akʼeloj, Amos?». Xi laj takʼbee: «Jun plomo».* Xi to laj yalbun li Jeovae: «Liʼ ta jtijanbe plomo li jteklumal Israele. Muʼyuk xa chkakʼik ta perton.+
9 Xokol xa chkom li tayal kʼopojebaletik* yuʼun Isaake+ xchiʼuk lilijem chkom ti butik chʼul ta Israele;+ chtal jkontrain ta espada li yutsʼ yalal Jeroboane».+
10 Li Amasias ti jaʼ pale ta Betele+ xi la stakbe batel mantal li ajvalil Jeroboan+ ta Israele: «Li Amose yakal me tsnop akʼoplal ti tsmilot ta Israele.+ Li jnaklejetik ta balumile mu stsʼik yuʼunik li kʼusi chale.+
11 Yuʼun xi chal li Amose: ‹Chichʼ milel ta espada li Jeroboane, li Israele persa chichʼ chukel lokʼel li ta slumalike›».+
12 Vaʼun li Amasiase xi laj yalbe li Amose: «Voʼot ti oy kʼusi cha-akʼbat avile, jatavan batel ta yosilal Juda, te xasaʼ aveʼel xchiʼuk jaʼ te xaval albil kʼop.+
13 Pe mu xa xaval albil kʼop li ta Betele,+ yuʼun jaʼ stemplo li ajvalile+ xchiʼuk jaʼ snail li ajvalilale».*
14 Vaʼun li Amose xi la stakʼbe li Amasiase: «Maʼukun toʼox j-alkʼop xchiʼuk maʼuk xnichʼonun j-alkʼop; jaʼ noʼox jchabichijun+ xchiʼuk ta jkʼelbe steʼeltak igo.*
15 Pe li Jeovae laj yikʼun lokʼel ta xchabiel li chije xchiʼuk xi laj yalbun li Jeovae: ‹Bat albo li kʼusi chkʼot ta stojolal li jteklumal Israele›.+
16 Li avie, chikinta-o li kʼusi xi chal Jeovae: ‹Xi chavale: «Mu xaval li kʼusi chkʼot ta stojolal Israele+ xchiʼuk mu xaval ti chichʼik chapanel+ li snitilulal Isaake».
17 Jaʼ yuʼun, xi chal li Jeovae: «Li avajnile chkʼot ta jchonbail ants li ta jteklume, chichʼik lajesel ta espada li akeremtak xchiʼuk atsebetake. Li avosile chichʼ pʼisel ta chʼojon sventa xichʼ chʼakel, yan li voʼote te chacham ta jun ibal sba* lum; li Israele persa chichʼ chukel lokʼel li ta slumalike»›».+
Tsʼibetik ta yok vun
^ Jaʼ xkaltik, li kʼusi chchʼi ta enero xchiʼuk ta fevreroe.
^ Literal «chlik».
^ O «Chopol laj yaʼi sba».
^ Literal «chlik».
^ O «Chopol laj yaʼi sba».
^ Li plomoe ol xchiʼuk oy yakʼil ti tstunesik sventa lek tukʼ xbat li kʼusi tsvaʼanike.
^ Li plomoe ol xchiʼuk oy yakʼil ti tstunesik sventa lek tukʼ xbat li kʼusi tsvaʼanike.
^ O «ta jombe xchʼut igo».
