Deuteronomio 1:1-46
1 Liʼe jaʼ li kʼusitik albatik yuʼun Moises skotol li Israel ta yosilal Jordan te ta takixokol balumil ta stenlejaltik ta yeloval Suf, ti te xkom ta oʼlol yuʼunik li Paran, Tofel, Laban, Aserot xchiʼuk Disaabe.
2 11 kʼakʼal ta xanel ti chlik ta Oreb kʼalal to ta Kades-Barnea+ ti te ch-echʼ batel ta sbelel vits Seire.
3 Li ta sjabilal 40,+ li ta sba kʼakʼal yuʼun li 11 ue, li Moisese laj yalbe j-israeletik* skotol li mantal albat yuʼun Jeovae.
4 Taje jaʼo kʼalal stsaloj xa ox li Seon+ ti te nakal ta Esbone ti jaʼ ajvalil yuʼun li j-amorreoetike xchiʼuk li Og+ ti jaʼ ajvalil ta Basan ti te nakal ta Astarot ta yosilal Edreie.+
5 Li ta yosilal Jordan ti te xkom ta yosilal Moabe, li Moisese la xchapbe lek smelolal li Mantale,+ xi laj yale:
6 «Xi laj yalbutik ta Oreb li Jdiostik Jeovae: ‹Jal xa tajek liʼ lakomik ta vitstikaltike.+
7 Totsanik, batanik ta vitstikaltik yuʼun j-amorreoetik,+ li ta slakʼnaik ta Arabae,+ li ta vitstikaltike, li ta Sefelae, li ta Neguebe xchiʼuk li ta tiʼ nabe,+ jaʼ li ta yosil jkanaanetike, batanik ta Libano*+ kʼalal to ta mukʼta ukʼum, jaʼ li ukʼum Eufratese.+
8 Yuʼun jchapanojboxuk xa avosilik. Batanik, uʼuninik li osil ti yaloj Jeova chakʼbe li amoltotik Abraan, Isaak+ xchiʼuk Jakobe,+ ti laj yal chakʼbe xchiʼuk li snitilulalik+ chtal yuʼunik ta tsʼakale›.
9 »Xi laj kalboxuk li vaʼ kʼakʼale: ‹Mu xuʼ kuʼun chkikʼoxuk batel jtuk.+
10 La-epajik xa yuʼun li Jeova Dios avuʼunike, epoxuk xa tajek jech kʼuchaʼal li kʼanaletik ta vinajele.+
11 Akʼo to yepajesoxuk li Jeova ti jaʼ Sdios amoltotakike, akʼo yepajesoxuk+ jmil ta velta ti kʼu avepalike xchiʼuk akʼo yakʼboxuk bendision jech kʼuchaʼal yaloje.+
12 ¿Kʼuxi xa noʼox chkuch kuʼun jtuk ti xakoʼolajik ta alal ikatsile xchiʼuk ti jsaʼkʼopoxuke?+
13 Tʼujik viniketik ta anitilulalik ti lek pʼijik, ti lek snaʼik rason xchiʼuk ti oy xa kʼusitik yiloj ta xkuxlejalike sventa jvaʼan ta joliletik ta atojolalik›.+
14 Xi la atakʼbeikune: ‹Toj lek li kʼusi chavakʼ jpaskutike›.
15 Jaʼ yuʼun, laj kikʼ tal li joliletik ta jujuchop anitilulalike, jaʼ li viniketik ti lek pʼijik xchiʼuk ti oy xa kʼusitik yiloj ta xkuxlejalike, vaʼun la jvaʼan ta joliletik ta atojolalik. La jvaʼan ta bankilaletik sventa sbainik jmil ta voʼ, ta bankilaletik sventa sbainik sien ta voʼ, ta bankilaletik sventa sbainik 50 ta voʼ xchiʼuk ta bankilaletik sventa sbainik lajunvoʼ xchiʼuk la jvaʼan j-abteletik ta stojolal jujuchop nitilulal avuʼunik.+
16 »Xi laj kalbe mantal li jchapanvanejetik avuʼunik li vaʼ kʼakʼale: ‹Kʼalal chtal yakʼ sba ta chapanel junuk avermanoike, tukʼ me xachapanik+ li vinik xchiʼuk li yermanoe o mi jaʼ li jyanlum+ ti te nakal xchiʼuke.
17 Mu me tʼujbiluk yajval avuʼunik kʼalal oy buchʼu chachapanike.+ Skʼan parejo xavaʼibeik skʼop li buchʼu mu tsotsuk skʼoplale xchiʼuk li buchʼu tsots skʼoplale.+ Mu xa xiʼik yuʼun junuk vinik,+ yuʼun jaʼ chchapanvan li Diose;+ li kʼusi toj vokol ta chapanel chavaʼiike tal albeikun, voʼon chkaʼibe skʼop›.+
18 Li vaʼ kʼakʼale, laj kalboxuk skotol li kʼusi skʼan xapasike.
19 »Laje, lijlokʼ batel li ta Orebe, te lijbat ta sbelel vitstikaltik yuʼun j-amorreoetik+ ta mukʼta takixokol balumil ti toj xibal sba+ laj avilike. Te lij-echʼ ti bu laj yal mantal li Jeova Dios kuʼuntike, laje te lijkʼot ta Kades-Barnea.+
20 Xi laj kalboxuke: ‹Liʼ xa oyoxuk ta vitstikaltik yuʼun j-amorreoetik ti yaloj chakʼbutik li Jeova Dios kuʼuntike.
21 Jech ta melel, li Jeova Dios avuʼune laj xa yakʼbot li osile. Batan, bat uʼunino li balumil jech kʼuchaʼal laj yalbot+ Jeovae, li Sdios amoltotake. Mu xaxiʼ, mu xnik avoʼonton›.
22 »Pe akotolik la achiʼinikun ta loʼil, xi laj avalbeikune: ‹Akʼo jtakkutik batel viniketik sventa xbat spaʼiik* li osile sventa xalbutik ti bu beal skʼan xijbate xchiʼuk ti kʼu yelan li jteklumetik ti bu chijbate›.+
23 Lek laj kaʼi li kʼusi laj avalike, jaʼ yuʼun la jtʼuj 12 ta voʼ viniketik, jun ta jujuchop nitilulal.+
24 Bat li viniketike, te echʼik ta vitstikaltik,+ laje kʼotik ta stenlejaltik* Eskol, jech te la spaʼiik* li osile.
25 Laj yichʼbeik talel juteb sat li kʼusitik xchʼi te ta lume. Xi vul yalbutike: ‹Toj echʼ xa noʼox lek li osil chakʼbutik li Jeova Dios kuʼuntike›.+
26 Pe li voʼoxuke muʼyuk xakʼan xabatik, kʼajomal la apʼajik li kʼusi laj yal Jeova Dios avuʼunike.+
27 Lalikik ta bikʼtal vulajetel ta akarpanaik xchiʼuk xi laj avalike: ‹Ti la slokʼesutik ta yosilal Ejipto li Jeovae, yuʼun spʼajojutik sventa xakʼutik ta yok skʼob li j-amorreoetik yoʼ slajesbutik jkʼoplaltike.
28 ¿Bu xa noʼox ti chijyikʼutik batele? La xchibajes koʼontontik+ li kermanotaktik kʼalal xi laj yalike: «Mas toj ven xuʼ yuʼunik xchiʼuk jun to snatikil, toj mukʼtik tajek li lumetike xchiʼuk chkʼot kʼalal to ta vinajel li smuroaltake*+ xchiʼuk te laj kilkutik xtok li j-anaketike»›.+
29 »Jaʼ yuʼun, xi laj kalboxuke: ‹Mu me xnik avoʼontonik, mu me xaxiʼik yuʼun.+
30 Jaʼ jbabe chbat li Jeova Dios avuʼunike xchiʼuk jaʼ tspas kʼop sventa tspak akʼoplalik+ jech kʼuchaʼal la spas ta Ejipto ti laj avil ta asat atukike.+
31 Jech xtok, laj avil ta asat atuk ti laj yikʼot batel ta skʼob stuk li Jeova Dios avuʼun li ta takixokol balumil jech kʼuchaʼal tspas li jun vinik xchiʼuk xnichʼone. Jech la spas jaʼ to ti kʼuxi lavul liʼe›.
32 Akʼo mi jech, muʼyuk xavakʼ xchʼunel avoʼontonik ta stojolal li Jeova Dios avuʼunik+
33 ti jaʼ jbabe batel avuʼunik sventa spaʼi* li osil bu xuʼ xapas akarpanaike. Ta jvol kʼokʼ* laj yakʼ sba ta ilel li ta akʼobaltike xchiʼuk ta jvol tok* laj yakʼ sba ta ilel li ta kʼakʼaltike sventa xakʼ avilik bu beal skʼan xatamik batel.+
34 »Li Jeovae laj yaʼi skotol li kʼusi laj avalik li vaʼ kʼakʼale, jaʼ yuʼun ilin ta atojolalik xchiʼuk xi jamal laj yale:+
35 ‹Li viniketik ta jkʼol chopol kuxlejal liʼe mi junuk ch-ochik li ta lekil osil ti laj kalbe amoltotik chkakʼbeike,+
36 jaʼ noʼox ch-och li Kaleb xnichʼon Jefunee. Jaʼ tskʼupin li osile, jaʼ chkakʼbe li osil xchiʼuk xnichʼnabtak ti bu ay xane, yuʼun ta sjunul yoʼonton*+ la stsʼakli li Jeovae.
37 (Voʼot ta akojik ti ilin ta jtojolal li Jeovae, xi laj yalbune: «Muʼyuk cha-och li ta osil eke.+
38 Jaʼ ch-och li Josue xnichʼon li Nun ti jaʼ avajtunele.*+ Tsatsubtasbo yoʼonton,*+ yuʼun jaʼ chikʼ ochel li Israel sventa xrextoinik* li balumile»).+
39 Jech xtok, akʼo mi laj avalik ti chichʼik pojel batel+ li avalab anichʼnabik ti mu to snaʼik li kʼusi lek xchiʼuk li kʼusi chopole, jaʼ ch-ochik, jaʼ chkakʼbe yuʼuninik li osile.+
40 Li voʼoxuke sutanik batel, batanik ta takixokol balumil, jaʼ xatamik batel li sbelel Tsajal nabe›.+
41 »Xi laj avalbeikune: ‹Laj xa jta jmulkutik ta stojolal Jeova. ¡Chimuykutik batel, chbat jpaskutik kʼop jech kʼuchaʼal laj yalbutik mantal li Jeova Dios kuʼuntike!›. Jaʼ yuʼun, ta jujuntal la atsak avabtejebik sventa paskʼop xchiʼuk la anopik ti kʼun noʼox chavaʼiik ti chamuyik batel ta vitse.+
42 Li Jeovae xi laj yalbune: ‹Xi xavalbe yaʼiike: «Mu xamuyik batel ta paskʼop, yuʼun muʼyuk ta jchiʼinoxuk.+ Mi labatike, tstsaloxuk li avajkontraike»›.
43 La jchiʼinoxuk ta loʼil, pe muʼyuk xachikintabeikun. Kʼajomal la apʼajik li kʼusi laj yal Jeovae xchiʼuk sujom xa lamuyik batel li ta vitse.
44 Li j-amorreoetik te nakalik ta vitse lokʼ snupoxuk ta be, vaʼun la snutsoxuk jech kʼuchaʼal tsnutsvan chanul pom ti te lik snutsoxuk ta Seir kʼalal to ta Ormae.
45 Jech oxal, lasutik talel xchiʼuk xa-okʼoletik xa ta stojolal Jeova, pe muʼyuk xa la xchikintaboxuk li Jeovae xchiʼuk muʼyuk xa laj yakʼoxuk ta yoʼonton.
46 Jaʼ yuʼun, li vaʼ kʼakʼale, jech sjalil lakomik ta naklej li ta Kadese.
Tsʼibetik ta yok vun
^ Literal «xnichʼnabtak Israel».
^ Yaʼeluke, jaʼ skʼoplal li vitstikaltik ta Libanoe.
^ O «spamukʼtaik».
^ O «beoʼtik ta stenlejaltik».
^ O «spamukʼtaik».
^ Jaʼ xkaltik, ti toj toyajtik tajek li smuroaltake.
^ Literal «jtel tok».
^ Literal «jtel kʼokʼ».
^ O «spamukʼta».
^ Literal «lek noj; lek tsʼakal».
^ O «xichʼik komel».
^ O jaʼ van skʼoplal «Dios la stsatsubtas».
^ Literal «vaʼal ta atojolale».
