Deuteronomio 13:1-18
-
Kʼusi chichʼ pasbel li buchʼutik chvalopatinvanike (1-18)
13 »Mi chlokʼ ta atojolal jun j-alkʼop o mi oy buchʼu laj yil ta xvayich ti oy kʼusi chkʼot ta pasel ta jelavele xchiʼuk ti chakʼ ta ilel senyail xchiʼuk kʼusi labal sbae
2 xchiʼuk ti chkʼot ta pasel ta melel li senyaile xchiʼuk li kʼusi labal sbae xchiʼuk ti xi chal xtoke: ‹Jtsʼaklitik batel yan diosetik, jaʼ li diosetik ti mu to xavojtikine, bat tunkutik ta stojolal›,
3 mu me xachikintabe kʼusi chal li j-alkʼop taje o li buchʼu chvaychinaje,+ yuʼun li Jeova Dios avuʼunike yakal chakʼoxuk ta preva+ sventa xvinaj mi akʼanojik ta sjunul avoʼontonik xchiʼuk ta sjunul akuxlejalik li Jeova Dios avuʼunike.+
4 Jaʼ tsʼakliik batel li Jeova Dios avuʼunike, jaʼ noʼox stuk xaxiʼtaik,* chʼunbeik li smantaltake, chikintaik li kʼusi chale; jaʼ noʼox xatunik ta stojolal xchiʼuk jaʼ noʼox skʼan xanapʼan abaik ta stojolal.+
5 Pe skʼan xichʼ milel li j-alkʼop taje o li buchʼu chvaychinaje,+ yuʼun la stij avoʼontonik ti xatoy abaik ta stojolal li Jeova Dios avuʼunike —li buchʼu la slokʼesoxuk ta yosilal Ejipto xchiʼuk ti la spojoxuk lokʼel ti bu toʼox tikʼiloxuk ta mosoile— sventa tsnamajesot li ta be yakʼoj avil Jeova Dios avuʼun ti te skʼan xaxanave. Skʼan xalokʼes ta atojolal li kʼusi chopole.+
6 »Mi oy junuk achiʼil ta vokʼel ti jaʼ skerem ameʼ, o mi oy junuk akerem, o atseb, o avajnil ti akʼuxubinoje o li buchʼu lek xavil aba achiʼuk ti xi mukul tsloʼlaote: ‹Batik, bat tunkutik yuʼun yan diosetik›,+ jaʼ li diosetik ti mu xavojtikin xchiʼuk ti muʼyuk laj yojtikin li amoltotake,
7 li sdios jteklumetik ti te oy ta apat axokone akʼo mi nopol o mi nom oy ta atojolal, buyuk noʼox ta jujujot xchikin li lume,
8 mu me xachʼunbe li kʼusi chale, mu xachikintabe,+ mu xkʼuxubaj ta avoʼonton, mu aboluk sba xavil xchiʼuk mi jaʼuk xapoj.
9 Ti kʼusi skʼan xapase, jaʼ ti persa skʼan xamile.+ Voʼot baʼyel skʼan xavakʼ akʼob ta stojolal sventa xichʼ milel, jaʼ tsʼakal to chakʼ skʼob li jteklume.+
10 Skʼan xavakʼbe ton jaʼ to mi chame,+ yuʼun tskʼan ox tsnamajesot ta stojolal Jeova Dios avuʼun ti jaʼ la slokʼesot ta yosilal Ejipto ti bu toʼox tikʼilot ta mosoile.
11 Kʼalal jech chapasike, chkʼot ta xchikin skotol li Israele xchiʼuk ta xiʼik. Vaʼun, muʼyuk xa buchʼu jech tspas ta atojolalik li kʼusi chopol taje.+
12 »Mi oy xi laj avaʼi chalik ta junuk li jteklum ti chakʼ avuʼunin li Jeova Dios avuʼune:
13 ‹Oy jayvoʼ viniketik ti mu kʼusi xtunik-oe lokʼ ta atojolalik sventa sloʼla li jteklume, xi chalike: «Batik, bat tunkutik yuʼun yan diosetik», jaʼ li diosetik ti mu xavojtikinike›.
14 Skʼan xakʼelbe lek skʼoplal, sabo* lek skʼoplal xchiʼuk jakʼbo lek skʼoplal,+ mi vinaj ti melel ti jech kʼotem ta pasel ta atojolalik li kʼusi toj ibal sba* taje,
15 persa skʼan xamil ta espada li jnaklejetik ta jteklume.+ Lajesbo skʼoplal ta j-echʼel+ ta espada xchiʼuk skotol li kʼusitik te oye xchiʼuk kʼalal to ta xchonbolomik.
16 Skʼan xatsob batel ta chʼivit* skotol li kʼusitik x-ayan tee, chikʼo ta kʼokʼ li jteklume. Li kʼusitik oy yuʼunike jaʼ chtun kʼuchaʼal matanal ta stojolal Jeova Dios avuʼun. Jinesbil-o chkom sbatel osil. Muʼyuk xa chichʼ-o vaʼanel yan velta.
17 Mu me xatsak jutebuk li kʼusi jpʼel skʼoplal chichʼ lajesele*+ sventa xlaj skʼakʼal yoʼonton li Jeovae xchiʼuk sventa xkʼuxubinot xchiʼuk sventa xa-epaj yuʼun jech kʼuchaʼal yakʼoj ye ta stojolal amoltotake.+
18 Skʼan xachʼunbe* xchiʼuk xavakʼ ta akuxlejal skotol li smantaltak Jeova Dios avuʼun ti yakal chkalbot avie, jaʼ xapas li kʼusi tukʼ ta sat li Jeova Dios avuʼune.+
Tsʼibetik ta yok vun
^ O «chajbo».
^ O «ta kaye; ti bu oy ep krixchanoetik».
^ O «kʼusi chʼul kʼotem ti mu stakʼ xatsake».
^ O «xavaʼibe yechʼomal ye».
