Deuteronomio 17:1-20
17 »Mu me xavakʼbe ta milbil matanal Jeova Dios avuʼun li tot vakax o chij ti oy xchopolil o ti muʼyuk leke, yuʼun toj chopol chil li Jeova Dios avuʼune.+
2 »Nopo noʼox avaʼi ti oy junuk vinik o junuk ants ta junuk lum ti bu chakʼbot li Jeova Dios avuʼun ti yakal tspas li kʼusi chopol ta sat li Jeova Dios avuʼune, ti muʼyuk xa tstsakbe ta venta li stratoe,+
3 ti chbat yichʼ ta mukʼ yan diosetike, ti jaʼ xa chlik snijan sba ta stojolalike o ti jaʼ xa tsnijan sba ta stojolal li lunae,* li kʼakʼale o li soltaroetik ta vinajel+ ti mu jechuk kaloj mantale,+
4 mi laj yalboxuk o mi laj avaʼibe skʼoplale, skʼan me xasabe* lek skʼoplal. Mi melel ti jech yakal chkʼot ta pasel+ ta Israel li kʼusi toj ibal sba* taje,
5 skʼan me xajoch lokʼel ta spat ateklumal li vinik o li ants ti la spas li kʼusi toj chopole, akʼo yichʼ akʼbel ton jaʼ to mi cham li vinik o li antse.+
6 Li buchʼu sta-o xchame akʼo yichʼ milel mi oy chaʼvoʼ o mi oy oxvoʼ testigoe.+ Pe mu xuʼ xichʼ milel mi kʼajomal noʼox oy jun testigoe.+
7 Li testigoetike jaʼ baʼyel chakʼ skʼobik sventa smilik li buchʼu sta-o xchame, jaʼ tsʼakal to chakʼ skʼob li jteklume. Skʼan xalokʼes ta atojolal li kʼusi chopole.+
8 »Mi oy kʼusi kʼot ta pasel ta junuk alumal ti vokol ta chapanel chavaʼie, mi jaʼ skʼoplal smalel chʼichʼ,+ junuk demanda, mi oy buchʼu yayijesvan o mi jaʼ skʼoplal yan paskʼope, skʼan xabat ti bu stʼujoj li Jeova Dios avuʼune.+
9 Batan ta stojolal paleetik ti jaʼ jlevietike xchiʼuk ta stojolal jchapanvanej+ ti stsakoj yabtel li vaʼ orae, jaʼ xbat ajakʼbe yaʼiik, vaʼun chalboxuk li kʼusi kʼot ta nopel yuʼunike.+
10 Skʼan me jechuk xapas kʼuchaʼal kʼot ta nopel yuʼunik ti te laj yalboxuk ti bu stʼujoj li Jeovae. Kʼelo me lek ti jechuk tajek xapas kʼuchaʼal la xchanubtasoxuke.
11 Skʼan me jechuk xapas kʼuchaʼal chal li mantal laj yakʼik avile xchiʼuk ti kʼu yelan kʼot ta nopel yuʼunike.+ Mu me xakʼejpʼuj* ta be ti mu xa xapas li kʼusi kʼot ta nopel yuʼunike, mi jaʼuk ta batsʼikʼob mi jaʼuk ta tsʼetkʼob.*+
12 Li vinik ti ta skoj stoyobbail muʼyuk xchikintabe li pale ti yakal tspas yabtel ta stojolal li Jeova Dios avuʼune o ti muʼyuk xchikintabe li jchapanvaneje skʼan xichʼ milel.+ Skʼan xalokʼes ta stojolal Israel li kʼusi chopole.+
13 Jech chkʼot ta xchikin sjunul li jteklume, vaʼun ta xiʼik, jech muʼyuk xa buchʼu jech tstoy sba.+
14 »Mi la-och xa ox li ta osil ti bu chakʼbot li Jeova Dios avuʼune, mi laj xa ox avuʼunin xchiʼuk mi te xa ox nakalote xchiʼuk mi xi chlik avale: ‹Akʼbun jvaʼan ajvalil jech kʼuchaʼal oy ajvaliletik yuʼunik li lumetik oy ta jpat jxokone›,+
15 mi jech taje, persa skʼan xavaʼan jun ajvalil ti jaʼ tstʼuj li Jeova Dios avuʼune.+ Jaʼ xavaʼan ta ajvalil junuk avermano. Mu stakʼ xavaʼan ta ajvalil ta atojolal junuk jyanlum ti maʼuk avermanoe.
16 Jaʼ noʼoxe mu me stsob ep skaʼ+ mi jaʼuk stijbe yoʼonton jteklum sventa xbat sabatuk tal ep skaʼ li ta Ejiptoe,+ yuʼun xi onoʼox laj yalboxuk li Jeovae: ‹Mu xa me xasutik talel li ta be liʼe›.
17 Jech xtok, mu xuʼ saʼ ep yajnil sventa mu xkʼejpʼuj* ta be li yoʼontone;+ mi jaʼuk xuʼ stsob ep splata xchiʼuk s-oro.+
18 Mi choti xa ox ta spasob mantale, persa skʼan stsʼiba jlik slivro* ti jaʼ skopiail li Mantale, te chichʼ lokʼesel li ta mantaletik skʼejojik* li paleetik ti jaʼ jlevietike.+
19 »Skʼan teuk-o skʼejoj* sventa skʼel jujun kʼakʼal ti kʼu sjalil kuxule+ sventa xchan xiʼtael* li Jeova Dios yuʼune, ti xchʼun li chanubtaseletike xchiʼuk ti spas skotol kʼusi chal li Mantal liʼe.+
20 Mi jech tspase, muʼyuk tstoy sba ta stojolal li yermanotake xchiʼuk muʼyuk chkʼejpʼuj* ta be ti mu xa spas li mantale mi jaʼuk ta batsʼikʼob o ta tsʼetkʼob,* taje jaʼ sventa jal x-ajvalilaj xchiʼuk jal x-ajvalilaj li xnichʼnabtak ta stojolal Israele.
Tsʼibetik ta yok vun
^ O «li ue».
^ O «xachajbe».
^ O «surtokʼob».
^ O «xakʼejev; xatsʼepʼuj».
^ O «xkʼejev; stsʼepʼuj».
^ O «sbalbalvun».
^ O «snakʼojik».
^ O «snakʼoj».
^ O «chkʼejev; tstsʼepʼuj».
^ O «surtokʼob».
