Deuteronomio 18:1-22
18 »Li paleetik ti jaʼ jlevietike, skotol li snitilulal Levie, muʼyuk kʼusi chichʼik xchiʼuk muʼyuk xrextoik* ta stojolal li Israele. Jaʼ tslajesik li matanal ti chichʼ chikʼel ta kʼokʼ sventa li Jeovae, li matanale jaʼ xrexto chkʼot.+
2 Jech oxal, muʼyuk chichʼ xrextoik* ta stojolal li xchiʼilik ta vokʼele. Jech kʼuchaʼal yaloj onoʼoxe jaʼ xrextoik li Jeovae.
3 »Liʼe jaʼ li sderecho paleetik ti skʼan x-akʼbatik yuʼun li jteklume: buchʼuuk noʼox ti chakʼ milbil matanale, mi tot vakax o mi chije, skʼan xakʼbe pale li snekebe, li sbakil yee xchiʼuk li sbel xchʼute.
4 Skʼan xavakʼbe li sba sat kʼusitik chlokʼ avuʼune, li achʼ vinoe, li aseitee xchiʼuk li sba stsotsil achij chalokʼe.+
5 Yuʼun li Jeova Dios avuʼune jaʼ la stʼuj lokʼel xchiʼuk xnichʼnabtak ta skotol anitilulal sventa jaʼuk x-abtejik sbatel osil ta sbi li Jeovae.+
6 »Pe mi oy jun jlevi chlokʼ batel ta junuk lum avuʼun li ta Israel+ ti tskʼan chbat nakluk ti bu tstʼuj* Jeovae,+
7 xuʼ onoʼox te chbat tunuk ta sbi li Jeova Dios yuʼune jech kʼuchaʼal li yan xchiʼiltak ta vokʼele, ti jaʼ li jlevietik ti te chtunik ta yeloval Jeovae.+
8 Koʼol yepal chichʼ sveʼel jech kʼuchaʼal yantike,+ parte-o me ti kʼu yepal tsta mi la xchon li xrexto* akʼbil yuʼun snitilulale.
9 »Mi la-och xa ox li ta osil ti chakʼbot Jeova Dios avuʼune, mu me xlik achanbe li kʼusi ibal sba* tspasik li lumetike.+
10 Mu me buchʼu xchikʼ skerem o stseb avuʼunik+ mi jaʼuk buchʼu xchan tʼunol,*+ spasel majia,+ j-akʼchamel+ mi jaʼuk buchʼu chalbe skʼoplal kʼusi chkʼot ta pasel ta tsʼakal,+
11 mi jaʼuk buchʼu chchan tuchʼ ora, buchʼu chbat skʼopon j-espiritista+ o jtʼunol*+ mi jaʼuk buchʼu oy kʼusi tsjakʼbe li animaetike.+
12 Li buchʼutik jech tspasike toj chopol chil li Jeovae, ta skoj li kʼusitik ibal sba chichʼ pasel taje, li Jeova Dios avuʼune tsnuts lokʼel ta asat.
13 Muʼyukuk me apaltail* ta stojolal li Jeova Dios avuʼune.+
14 »Yuʼun li lumetik ti chapojbe li kʼusitik oy yuʼunike nopoltik noʼox chaʼibeik skʼop li buchʼutik tspasik majiae+ xchiʼuk li buchʼutik tspasik tʼunole,*+ pe li Jeova Dios avuʼune mi jutebuk xakʼ apas li kʼusitik taje.
15 Li Jeova Dios avuʼunike tsvaʼanbot jun j-alkʼop ti te chlokʼ ta stojolal avermanotakik ti xkoʼolaj kʼuchaʼal voʼone. Skʼan me xachikintabeik.+
16 Liʼe jaʼ jech chkʼot ta pasel li kʼusi la akʼanbe li Jeova Dios avuʼun ta Orebe, li ta skʼakʼalil tsobajele,+ jaʼo kʼalal xi laj avale: ‹Sventa mu xichame,+ akʼo xa mu xkaʼibe yechʼomal ye li Jeova Dios kuʼune xchiʼuk akʼo xa mu xkil li mukʼta kʼokʼe›.
17 Vaʼun, xi laj yalbun li Jeovae: ‹Lek li kʼusi chalike.
18 Ta jvaʼanbeik jun j-alkʼop ti te chlokʼ ta stojolal yermanoik ti xkoʼolaj kʼuchaʼal voʼote+ xchiʼuk jaʼ chkakʼbe ta ye li kʼusi chkale.+ Jaʼ xa ch-albatik skotol li kʼusi chkalbee.+
19 Jaʼ jech chkichʼbe ye li buchʼu mu xchikintabun jkʼop ti yakal chal ta jbi li j-alkʼope.+
20 »›Mi oy junuk j-alkʼop ti xtoyet xa kʼusi chlik yal ta jbi ti muʼyuk laj kalbe akʼo yale o ti chlik kʼopojuk ta sbi yan diosetike, persa skʼan xcham li j-alkʼop taje.+
21 Pe xuʼ van xi chlik aval ta avoʼontone: «¿Kʼuxi ta jnaʼtik ti maʼuk laj yal li Jeovae?».
22 Kʼalal chkʼopoj ta sbi Jeova li j-alkʼope xchiʼuk ti mu xkʼot ta pasel li kʼusi chale, jech chichʼ naʼel ti maʼuk laj yal li Jeovae. Ta skoj noʼox stoyobbail ti jech laj yal li j-alkʼope. Mu xaxiʼ yuʼun›.
Tsʼibetik ta yok vun
^ O «spukulalik; sparteik».
^ O «spukulalik; sparteik».
^ Jaʼ xkaltik, ti bu tstʼuj Jeova sventa yichʼobil ta mukʼe.
^ O «spukulal; sparte».
^ Jaʼ li buchʼu tskʼan tsnabe skʼoplal li kʼusi chkʼot ta pasel ta tsʼakal ti tsaʼ koltael ta stojolal pukujetike.
^ Jaʼ li buchʼu tskʼan tsnabe skʼoplal li kʼusi chkʼot ta pasel ta tsʼakal ti tsaʼ koltael ta stojolal pukujetike.
^ O «achopolil».
^ Jaʼ li buchʼu tskʼan tsnabe skʼoplal li kʼusi chkʼot ta pasel ta tsʼakal ti tsaʼ koltael ta stojolal pukujetike.