Deuteronomio 21:1-23
21 »Mi laj yichʼ tael junuk anima ti mu stakʼ naʼel buchʼu la smil li ta avosil ti chakʼ avuʼunin li Jeova Dios avuʼune,
2 li moletik xchiʼuk jchapanvanejetik avuʼune+ skʼan xbat spʼisik kʼu snamal yiloj anima li lumetik ta sjoylejale.
3 Li moletik ti te nakalik li ta jteklum ti mas nopol yiloj li animae skʼan stsakik jkotuk chʼiom meʼ vakax ti muʼyuk to tunesbil ta abtele, ti muʼyuk to xkuchoj jkojuk kʼatlom teʼe,
4 li moletik te ta lume akʼo yikʼik batel ta olon li chʼiom meʼ vakaxe, te akʼo yikʼik batel ta stenlejaltik* ti bu oy lek voʼe jaʼ ti bu chʼabal to lokbil li osile o ti chʼabal to kʼusi tsʼunbile. Te akʼo skʼasbeik snukʼ ta stenlejaltik li chʼiom meʼ vakaxe.+
5 »Ta xnopajik li paleetike, li jlevietike, yuʼun jaʼ tʼujbilik yuʼun Jeova Dios avuʼun sventa xtunik ta stojolal,+ sventa xakʼik bendision ta sbi Jeova.+ Jaʼ chalik kʼuxi ta chapanel jtosuk kʼop kʼalal oy buchʼu chyayijesvane.+
6 Vaʼun, skotol li moletik ta jteklum ti bu nopol la staik li animae skʼan spok skʼobik+ ta sba li chʼiom meʼ vakax ti laj yichʼ kʼasbel snukʼ ta stenlejaltike.
7 Xi skʼan xalike: ‹Maʼuk la smal jkʼobkutik li chʼichʼ liʼe mi jaʼuk laj kil ta jsatkutik kʼalal laj yichʼ malele.
8 Kajval Jeova, mu teuk xanakʼ ta avoʼonton sventa xakontrain li ateklumal Israel ti la apoj lokʼele+ mi jaʼuk xavakʼbe sbain ateklumal Israel ti laj yichʼ malbel xchʼichʼel li buchʼu chʼabal smule›.+ Vaʼun, muʼyuk te chkom ta sbaik li chʼichʼe.
9 Mi jaʼ chapas li kʼusi tukʼ ta sat Jeovae, jaʼ jech chalokʼes ta atojolal li mulil ta skoj ti laj yichʼ malbel xchʼichʼel li buchʼu chʼabal smule.
10 »Mi bat atsak ta kʼop avajkontratak xchiʼuk mi laj yakʼ ta akʼob li Jeova Dios avuʼun ti chukbilik chbat avuʼune,+
11 pe mi te laj avil jun kʼupil sba ants ti kʼot ta avoʼonton ti chakʼan chkʼot ta avajnile,
12 xuʼ xavikʼ ochel ta yut ana. Jaʼ noʼoxe skʼan xjux lokʼel stsotsil sjol xchiʼuk skʼan smeltsan lek sniʼ yichʼak.
13 Akʼo slokʼ li skʼuʼ spokʼ slapoj kʼalal laj yichʼ chukel tale xchiʼuk akʼo te nakiuk li ta anae. Jun u chokʼita li stot smeʼe,+ mi laje, xuʼ xa xachiʼin ta vayel. Chakʼot ta smalal xchiʼuk chkʼot ta avajnil.
14 Mi muʼyuk lek laj avile, akʼo batuk ti bu tskʼan yoʼontone.+ Mu stakʼ xachon batel ta takʼin xchiʼuk mu stakʼ xavutilan ta skoj ti laj avakʼ ta kʼexlale.
15 »Mi oy jun vinik ti oy chaʼvoʼ yajnil, pe ti jun noʼox mas skʼanoje,* mi ayan yol yuʼun xchaʼvoʼale xchiʼuk ti jaʼ baʼyel vokʼ yol li buchʼu jutuk noʼox kʼanbile,+
16 mu me stakʼ xal ti jaʼ sba xnichʼon li yol yajnil ti mas skʼanoj mi la sta yorail chchʼakanbe xrextoike* ti jaʼ muʼyuk xa tstsak ta venta kʼuchaʼal sba xnichʼon li yol yajnil ti jutuk noʼox skʼanoje.
17 Teuk ta sjol ti jaʼ sba xnichʼon li yol ti buchʼu jutuk noʼox skʼanoje, jaʼ yuʼun ta skotol li kʼusitik oy yuʼune, j-oʼlol to x-echʼ yepal skʼan xakʼbe ti jaʼ mu sta li jun xnichʼone, yuʼun jaʼ sba stsʼunbal. Jaʼ oy sderecho ti xichʼ tsakel ta venta ti jaʼ sba nichʼonile.+
18 »Mi oy jun vinik ti oy jun xnichʼon ti toj pim ta mantal xchiʼuk toj toyba ti mu xchʼunbe smantal li stote mi jaʼuk xchʼunbe smantal li smeʼe,+ mi laj xa yakʼik persa sventa tstukʼibtasike, pe ti mu jutebuk skʼan xchikintae,+
19 li totil meʼile skʼan xikʼik lokʼel sventa xbat yakʼbeik ta skʼob moletik li ta yochebal steklumalike.
20 Xi chkʼot yalbeik li moletik ta steklumalike: ‹Li kol jnichʼonkutik liʼe toj pim ta mantal xchiʼuk toj toyba, mi jutebuk skʼan xchikintabunkutik. Mu noʼox x-echʼ yoʼonton ta veʼel+ xchiʼuk toj echʼem xyakub›.+
21 Skotol li krixchanoetik ta steklumalike skʼan xakʼbeik ton jaʼ to mi chame. Jaʼ jech chalokʼes ta atojolal li kʼusi chopole, vaʼun chkʼot ta xchikin skotol li Israele xchiʼuk ta xiʼik.+
22 »Mi oy la spas smul jun vinik ti sta-o xchame, mi laj xa ox yichʼ milel+ xchiʼuk mi laj xa ox yichʼ jokʼanel ta teʼe,+
23 mu me teuk jokʼol xkom ta teʼ sjunul akʼobal li sbekʼtale.+ Li kʼusi skʼan xapase skʼan xamuk ta skʼakʼalil noʼox, yuʼun li buchʼu laj yichʼ jokʼanele chopol kʼoptabil xa yuʼun Dios.+ Mu stakʼ xasokesbe skʼoplal li balumil ti chakʼ arextoin* li Jeova Dios avuʼune.+
Tsʼibetik ta yok vun
^ O «beoʼtik ta stenlejaltik».
^ Literal «chaʼvoʼ yajnil, june kʼanbil, june pʼajbil».
^ O «spukulalike; sparteike».
^ O «ta apukulal; apartein».
