Deuteronomio 23:1-25
-
Li buchʼutik mu stakʼ x-och ta stsobobbail Diose (1-8)
-
Skʼan chʼuluk ti bu yakʼoj skarpanaike (9-14)
-
Jatvil mosoil (15, 16)
-
Mu stakʼ spas sbaik ta jchonbail ants o ta jchonbail vinik (17, 18)
-
Skʼanbel sjol kʼusi chakʼik ta chʼom; yakʼel eil (19-23)
-
Li kʼusi noʼox stakʼ slajesik li j-echʼelbeetike (24, 25)
23 »Li vinik ti chʼabal ston skʼunil ta skoj ti tʼuseme o ti tuchʼbil skʼunile mu stakʼ x-och li ta stsobobbail Jeovae.+
2 »Mu me stakʼ x-och ta stsobobbail Jeova li buchʼu maʼuk mero alab nichʼnabile.+ Kʼalal to ta slajunkʼolal kuxlejal yuʼunik mi junuk snitilulalik xuʼ x-och li ta stsobobbail Jeovae.
3 »Li j-ammonetik xchiʼuk jmoabetike mi junuk stakʼ x-ochik li ta stsobobbail Jeovae.+ Kʼalal to ta slajunkʼolal kuxlejal yuʼunik mi junuk snitilulalik xuʼ x-ochik jutebuk li ta stsobobbail Jeovae.
4 Yuʼun kʼalal jaʼo lalokʼik talel ta yosilal Ejiptoe, muʼyuk tal snupoxuk ta be sventa xakʼboxuk voʼ avuchʼik xchiʼuk aveʼelik.+ Li kʼusi noʼox la spasike la stojik Balaam li xnichʼon Beor ti te vokʼem ta Petor ta yosilal Mesopotamia sventa xchopol kʼoptaoxuke.+
5 Pe li Jeova Dios avuʼune muʼyuk la xchikintabe li Balaame.+ Li kʼusi noʼox la spas li Jeova Dios avuʼun ta atojolale la skʼatajes ta bendision li chopol kʼoptaele,+ yuʼun skʼanojot li Jeova Dios avuʼune.+
6 Ti kʼu sjalil kuxulote mu me xakoltaik jutebuk sventa lek xbat li xkuxlejalike o sventa x-ayan ep kʼusitik yuʼunik.+
7 »Mu stakʼ xapʼaj junuk j-edom krixchano, yuʼun jaʼ achiʼil ta vokʼel.+
»Mu stakʼ xapʼaj junuk j-ejiptoal krixchano, yuʼun te lanaki ta yosil kʼuchaʼal jyanlum.+
8 Li xnichʼnabike mu stakʼ x-ochik li ta stsobobbail Jeovae, jaʼ to xuʼ x-och li yoxkʼolal yalab xnichʼnabik chtal yuʼunik ta tsʼakal li xnichʼnabike.
9 »Kʼalal chbat ajoyibta li avajkontrae, kʼelo me aba ti mu xapas jutebuk li kʼusi chopole.*+
10 Mi ibal sba* kom jun vinik ta skoj ti lokʼ yaʼlel skʼunil ta akʼobaltike,+ skʼan xlokʼ batel ti bu apasoj akarpanaike xchiʼuk mu me stakʼ sut talel.
11 Kʼalal chmal xa batel kʼakʼale, akʼo spok sba ta voʼ, vaʼun xuʼ xa sut tal ti bu apasoj akarpanaik kʼalal mi chʼayem xa ox batel kʼakʼale.+
12 Skʼan xatʼuj jsepuk osil ta spat ti bu apasoj akarpanaike, jaʼ ti bu lek nakʼal* sventa te xabatike.
13 Skʼan te oyuk avuʼun junuk estaka ti bu akʼejoj* avabtejebtake. Yuʼun kʼalal mi labat ta chʼayobbaile,* jaʼ chajokʼ-o junuk chʼen, vaʼun chamuk komel li avikʼobale.*
14 Yuʼun li Jeova Dios avuʼune te chanav ti bu apasoj akarpana+ sventa xchabiot xchiʼuk sventa xakʼ ta avok ta akʼob li avajkontratake. Skʼan chʼuluk xvinaj ti bu apasoj akarpanae+ sventa muʼyukuk kʼusi chopol te sta ta ilel ti jaʼ xa mu skʼan xchiʼinot-oe.
15 »Mi te kʼot ta atojolal jun mosoil ti jatav lokʼel ta stojolal yajvale, mu me xbat avakʼ komel ta stojolal li yajvale.
16 Xuʼ te xchiʼinot ta naklej ta junuk jteklum avuʼun ti bu tskʼan chnakie, jaʼ ti bu lek chile. Mu stakʼ xavilbajin.+
17 »Mi junuk tseb ta Israel xuʼ spas sba ta jchonbail ants ta templo,+ jech xtok, mi junuk vinik ta Israel xuʼ spas sba ta jchonbail vinik ta templo.+
18 Li stojol jchonbail ants xchiʼuk li stojol* jchonbail vinike* mu stakʼ xavichʼ ochel ta sna Jeova Dios avuʼun sventa xkʼot ta pasel avuʼun li kʼusi avakʼoj ave spasele, yuʼun toj chopol chil Jeova Dios avuʼun li stojolike.
19 »Li kʼusi chchʼamunbot avermanoe mu me xakʼanbe sjol akʼo mi takʼin,+ veʼlil o kʼusiuk noʼox ti ta xkʼexbot ti stakʼ kʼanbel sjole.
20 Xuʼ xakʼanbe sjol li kʼusi chchʼamunbot jun jyanlume,+ pe mu xuʼ xakʼanbe sjol li kʼusi chchʼamunbot avermanoe,+ mi jech chapase, chakʼbot bendision Jeova Dios avuʼun ta skotol li abtelal chapas li ta osil chavuʼunine.+
21 »Paso noʼox me ta anil mi oy laj avakʼ ave ta stojolal Jeovae,+ yuʼun li Jeova Dios avuʼune persa onoʼox ta skʼanbot li kʼusi laj avakʼ ave chapase.+ Jaʼ me amul chkʼot mi mu jechuk la apase.+
22 Mi muʼyuk kʼusi chavakʼ ave spasele, muʼyuk chata amul.+
23 Skʼan me xkʼot ta pasel avuʼun li kʼusi avaloj chapase,+ jech xtok, skʼan me xkʼot ta pasel avuʼun li kʼusi chlokʼ ta ave chavakʼbe ta smoton li Jeova Dios avuʼun ti ta yutsil avoʼonton chavakʼe.+
24 »Mi la-och batel ti bu stsʼunoj s-uva li achiʼile, xuʼ xaloʼ jaʼ to ti kʼuxi x-echʼ avoʼontone, pe mu me stakʼ xatul sventa xanojes batel amoch.+
25 »Mi chabat ti bu tekʼajtik strigo li achiʼile, xuʼ xabul ta akʼob ti bu yijik xae, pe mu me stakʼ xatuchʼ ta jos* li strigo achiʼile.+
Tsʼibetik ta yok vun
^ O «tsokesvane».
^ O «mukul». Jaʼ xkaltik, jun letrina.
^ O «atsoʼe».
^ O «anakʼoj».
^ Literal «la axokʼan abae».
^ O «li kʼu yepal tspas kanal».
^ Literal «jkot tsʼiʼe».
^ Jun lukluk natil kuchilu ti jaʼ sventa xtuchʼobil li kʼusitik tsʼunbile o sventa chichʼ tsobbel-o sat.
