Deuteronomio 24:1-22
24 »Mi oy junuk vinik laj yikʼ jun ants pe ti muʼyuk lek laj yilbe stalelal ta skoj ti muʼyuk jun yoʼonton yuʼun smalal li antse, akʼo spasbe jlik svunal ti bu chal ti tsutes-o sbaike,+ akʼo yakʼbe batel xchiʼuk akʼo stak lokʼel li ta snae.+
2 Mi lokʼ xa batel ta sna vinik li antse, xuʼ xbat xchiʼuk xuʼ x-ikʼat yuʼun yan vinik.+
3 Mi pʼajat yuʼun li xchaʼvoʼal vinike, mi akʼbat li svunal ti bu chal ti tsutes-o sbaike, vaʼun mi takat lokʼel li ta snae o mi cham li xchaʼvoʼal vinik ti nupun xchiʼuke,
4 li sba smalal ti sutesate mu xa me stakʼ xikʼ yan velta ta skoj ti laj xa sokes sba li antse, yuʼun toj chopol chil li Jeovae. Li ta osil chakʼ arextoin* li Jeova Dios avuʼune mu stakʼ xatikʼ ochel li mulil taje.
5 »Mi oy jun vinik ti achʼ to snupunele, mu me stakʼ xbat ta paskʼop xchiʼuk mu me stakʼ xichʼ akʼbel yan abtelaletik. Jun jabil te akʼo komuk ta sna ti muʼyuk kʼusi tsbain jutebuke sventa xkuxet noʼox yoʼonton yuʼun li yajnile.+
6 »Mi oy buchʼu oy kʼusi chʼamunbate, mu me stakʼ skʼanbe ta prental* li molino* ti jaʼ chjuchʼun-oe mi jaʼuk li stanal ta sbae,+ yuʼun mi jech tspase, xkoʼolaj kʼuchaʼal jaʼ tskʼanbe ta prental li kʼusi kuxul-oe.
7 »Mi oy buchʼu chelkʼan* junuk xchiʼil ta israelale, mi laj yilbajin xchiʼuk mi la xchon batele,+ persa skʼan xichʼ milel li j-elkʼanvaneje.+ Skʼan xalokʼes ta atojolal li kʼusi chopole.+
8 »Kʼalal oy bu chchʼi talel leprae,* kʼelo me lek ti jechuk xapas kʼuchaʼal chalboxuk li paleetik ti jaʼ jlevietike.+ Kʼelo me lek ti jech tajek xapas jech kʼuchaʼal kalojbeik mantale.
9 Vuleso me ta ajol ti kʼalal lalokʼik talel ta Ejiptoe, li Jeova Dios avuʼune oy kʼusi la spasbe Miriam ti kʼalal te xatalik ta bee.+
10 »Kʼusiuk noʼox ti chavakʼbe xchʼamun junuk achiʼile+ mu me xa-och batel ta sna sventa chbat atsakbe talel li kʼusi yaloj chakʼ ta prentale.*
11 Te noʼox vaʼal xakom ta pana,* li buchʼu oy kʼusi laj avakʼbe xchʼamune jaʼ akʼo bat yichʼbot talel li kʼusi yaloj chakʼbot ta prentale.*
12 Mi chtun yuʼun li achiʼile, mu me teuk xavichʼ vayel li kʼusi laj yakʼbot ta prentale.*+
13 Li kʼusi laj yakʼbot ta prentale* persa skʼan xasutesbe kʼalal naka noʼox chchʼay batel kʼakʼale, yuʼun jaʼ tskʼuʼin vayel,+ vaʼun chakʼbot bendision. Mi jech chapase, tukʼ chil li Jeova Dios avuʼune.
14 »Mu me kʼusi xavelkʼanbe ta amanyail li jsaʼabtel ti muʼyuk kʼusi x-ayan yuʼune o ti povree akʼo mi jaʼ junuk avermano o mi jaʼ junuk jyanlum ti te oy ta alumale, ti te nakal ta ateklumale.+
15 Ta skʼakʼalil noʼox me xatoj li avaj-abtel kʼalal skʼan to xchʼay batel kʼakʼale,+ yuʼun chtun yuʼun xchiʼuk jaʼ kuxul-o li stojole. Mi muʼyuk xatoje, tskʼan parte ta stojolal Jeova, vaʼun oy amul chkom.+
16 »Li totiletike mu xuʼ xchamik ta skoj smul xnichʼnabik, jech ek li nichʼnabiletike mu xuʼ chchamik ta skoj smul stotik.+ Ta skoj smul stukik ta xchamik.+
17 »Mu me xasokesbe skʼoplal kʼalal chichʼ chapanel li jun jyanlume o li jun olol ti chamem stote.+ Jech xtok, mu me xavichʼbe komel ta prental* skʼuʼ spokʼ li ants ti chamem smalal mi oy kʼusi laj avakʼ ta chʼome.+
18 Vuleso me ta ajol ti la-echʼ ta mosoil li ta yosilal Ejiptoe xchiʼuk ti la spojot lokʼel li Jeova Dios avuʼune.+ Jaʼ yuʼun, jech yakal chkalbot mantal ti akʼo jech xapase.
19 »Mi la sta yorail chatsobbe sat li kʼusi la atsʼun ta avosile, mu me sut atam mi chʼay ta ajol jchukuke. Te xavikta komel sventa li jyanlum ti te achiʼuk ta nakleje, sventa li ololetik ti chamem stotike xchiʼuk li antsetik ti chamem smalalike+ sventa xakʼbot bendision Jeova Dios avuʼun ta skotol li kʼusitik chapase.+
20 »Kʼalal chalilin ta teʼ li steʼel a-olivae, mu me xachaʼlilinbe li skʼobtake. Ti kʼu yepal muʼyuk xpʼaj* ta lilinele jaʼ xa akʼo stsob li jyanlum ti te achiʼuk ta nakleje, li ololetik ti chamem stotike xchiʼuk li antsetik ti chamem smalalike.+
21 »Kʼalal chatsobbe sat a-uvae, mu me sut atsob ti butik kome. Te akʼo komuk sventa stsob li jyanlum ti te achiʼuk ta nakleje, li ololetik ti chamem stotike xchiʼuk li antsetik ti chamem smalalike.
22 Vuleso me ta ajol ti la-echʼ ta mosoil li ta yosilal Ejiptoe. Jaʼ yuʼun, jech yakal chkalbot mantal ti akʼo jech xapase.
Tsʼibetik ta yok vun
^ O «ta apukulal; apartein».
^ O «prentail; xkʼexol».
^ O «tspas sekuestrar».
^ Li jpʼel kʼop ta ebreo ti chichʼ jelubtasel kʼuchaʼal «leprae» ep tajek kʼusi skʼan xal xchiʼuk te smakojbe skʼoplal ep ta tos chamel ti lek xchʼamaj o tspʼasuj ta yan bekʼtalile. Jech xtok, xuʼ van jaʼ skʼoplal chameletik ti chichʼ tael ta kʼuʼil pokʼiletik xchiʼuk ta naetike. Kʼelo Glosario, lepra.
^ O «prentaile; xkʼexole».
^ O «pat na».
^ O «prentaile; xkʼexole».
^ O «prentaile; xkʼexole».
^ O «prentaile; xkʼexole».
^ O «prentail; xkʼexol».
^ O «stsʼuj».
